31/12/2006
Acabase esti añu
Fou l'añu que morreu Veriña, Luis d'Arnizu, Andresín d'Insierto, Igor Medio ya Carlos Redondo. Añu malu pa la musica. Polo menos, quedará la lleenda, cumo tantos outros músicos que morrieran na carretera. Cumo'l poeta Andrés Solar. Veriña ya Arnizu (tamien lloraos) yaran paisanos mayores, ya nun ía lo miesmo. Bono, que se-y vei fer. Asina son las cousas, habrá que busca-y dalgo positivu. Anque seya cruel ya hipócrita... en fín.
Polo demás la vieya Asturias sigui igual. Nun paez que veiga camudar muncho. La sidra cada añu ía meyor, ente outras cousas pol calecimientu global de la tierra, ya eso siempre ta bien. Inclusive'l vinu Cangas ta empezando a poder tomase. Bono.
Pa rematar l'añu ETA fai atentau en Barajas, Madrid. Ya palmanla dos Ecuatorianos. De xuru que nun sabían vascu. Siempre morren los miesmos. Agora que por fin había n'España un presidente dialogante, con ganas d'escuchar a la xente, consensuar cumo socedéu en Catalunya, pos éstos fain la gracia. Sientolo polos ecuatorianos ya los afeutaos (tamién nos vei chiscar a nós de xuru, cola zuna que tienen n'Asturias col nacionalismu las élites políticas ya pensantes).
Espero que'l 2007 seya un añu más prestosu. Que se consigan cousas pa toos cumo paz, llibertá de terrorismu, que'l McDonalds veiga a la puta, que la RTPA desapaeza tamién (ou que la faigan cumo ha ser), que la gaita s'afite nel conservatoriu, que l'idioma se reconoza, que las inxusticias ya diferencias sociales, polo menos s'amenorguen, que nun tresformen Asturias nuna casa putas, con campos de golf ya una costa cuyu modelu seya Marbella, ya dellas cousas más.
Ya más nada. Esta ía la cabera entrada d'esti blog nel añu. Gracias por entrar eiquí, astutu llector. Pal añu que vien más, ya prestaríame que meyor.
30/12/2006
Lo que son las cousas. El peor Sporting dende que teo usu de razón (a priori) ía'l que meyor vei. Nun remembro velu tan arriba (yá pouco m'alcuerdo velu na primera división. Ya pue ser qu'esta temporada acabe en primera.
Asina qu'esti cursu l'sporting partía con una plantiya mala a priori. You nun pensaba que quedaría a estas alturas tan bien. Camentaba que se llegara a la metá de la tabla taría de sobra. Pero fúbol ía fúbol que dixera Vuljadin Boskov, entrenador ente outros del Sporting.
Ía chocante. Nun tien nengún xugador con cierto renome. Vendeu a Samuel, a Juan... etc, pero hai ta. Terceiru ya con partidazos, cumo'l del Cádiz. Puxa l'Sporting. A ver s'apartir d'agora nun la cagan ya desfain l'equipu.
You nun vou dicir más nada. Espero que l'Sporting xuba a primera esti añu, ya, polo menos me vuelva la ilusión pol fúbol, ya que lo faigan bien. Nun pido un equipazu, pido un equipu seriu, que faiga las cousas bien, pasín a pasín, ya que nun sirva pa que cuatro llistos s'enriquezan a costa'l Club. Porque un club ía de muncha xente, de munchos guah.es, de munchos asturianos de pol mundiu, ya non pa que unos sinvergúenzas garren las perras ya las souvenciones del Conceyu Xixón ya del Principáu.
A ver se s'entama a facer bien las cousas nel Sporting Xixón ya despueis, cuando echen al indeseyable, nel mieu Real Uviéu del alma. Puxa Xixón ya Puxa l'Spooooooooorting!!!!
Labels: Actualidá
28/12/2006
Une Histoire Royale
Bou. Con esta poesía infantil entamo esta entrada. (La poesía feixela you. Que quede claro. Pol Copyright ya esas cousas. You llou nun quiero problemas). El casu ía que lo que vou cuntar poudo soceder en Salas, pero por cambiar de Conceyu, socedéu en Balmonte. Pero na Ría Miranda, que ía lo más averáu a Salas.
Na Ría Miranda había un paisanu que beillaba la Jota.... Mialma cumo-y daba. Un as de la Jota. Llamábanlu pa dir beillar la Jota a Aragón, a Zaragoza, a beillalla pa la Virxe del Pilar. Ya feixera tamien xiras por Sudamérica, participara nel Conciertu de Bangladesh (el de George Harrison), hasta saliera nel especial de Navidá de Raphael. Yara una autoridá mundiala nel beille la Jota.
Conque cumo destacaba neso, el periódicu local de Balmonte (El Nuevu Balmonte), espublizaba-y too lo que mandara. Ya lo que'l dicía, pal periódicu diba a misa. Ya l'home esti falaba de Vectores Matemáticos (pa quien nun lo sepa, la xente Balmonte ía xente culta ya instruída), ya dicía cousas cumo:"Los vectores matemáticos nun esisten. Son inventos d'unos poucos, de xente con escuros intereses"
"Los Vectores nun son económicamente rentables"
"Entamase estudiando vectores, ya acábase construyendo bombas nucleares: You touve n'Hiroxima ya Nagasaqui"
Ya l'alta sociedá de Balmonte dicía que sí, que claro, que tenía razón. Que vaya luxo tener a esti paisano eiquí.
Conque en Balmonte había matemáticos tamién. Ya estos quexábanse. Dicían que, nomenon, que los vectores matemáticos yara una parte de la ciencia que conformaba la sabiduría del ser humanu. Que yara patrimoniu de la Cultura Académica Mundial. Ya nas manifestaciones que facían, vestíanse de Esbardu. Ya'l de la Jota subíase polas paredes.
Curiosamente, cuando se falaba de Jota, nun-y entrugaban a él. Él namai falaba en "El Nuevu Balmonte" de matemáticas.
Se vusté, bon llector, camuda "Jota", "beillador de Jota", "Balmonte", "vectores matemáticos" ya dellos terminos más, decatarase de qu'acaba deprender un bon métodu pa escribir nos periódicos asturianos, mui fiable (lleva más de 70 años asina furrulando).
Pos eso ía un intelectualoide. Una figura carismática ou esperta nuna rama, pero que fala de las demái ramas cumo se fora un espertu ou una autoridá moral nello, ya la xente apláude-y. Asina ía una parte d'Asturias.
Manolón ía grandón. En tolos sentios. Mide 1'90 ya pesa 135 Kg. Tien numái una ceya, un bon bigotón ya'l restu la cara ía un ladriyu. La sua conversación ía tamien cumo un ladriellu.
El calter de Manolón ía duru. Ía un home d'acción. De los de "Mayestras, las d'antes. Cumo nun soupieras la lleición, partiante la riela de cantu na tiesta. Ostia que tiempos aquellos, que recuerdos". De los que cuando-y fain penalti dudosu contra'l sou equipu "arbiiiiiitru mecagontoputamdre maricón, cumo lu garre..." en claro xestu de duldia. Un home cuyu primer estímulu ía agresivu ou violentu siempre. Lo que se llama un home de poucas lluces.
Xente asina haila en tolas casas conceyos d'Asturias, ya na miesma Xunta Xeneral ya nel nuesu Gobiernín. Toos tenemos na mente a dalguién conocíu ya dalguien que se se metiera na política encaxaría nesi perfil. Hai que puntualizar una cousa, cuando esta xente nun ta metida en política, son los primeros que nun entienden pa que val la política. Son los que la definen cumo "dir votar, ya llou que s'arreglen ente ellos". Ya desentiendense, fain lo que-ys mandan los políticos (non al revés) ya cuando por causa "los políticos" vinen-ys las cousas mal dadas espresanse cumo Manolón, colo del penalti (camudan arbitru pol nome del politicu). Pero vuelven enseguidina al puntu anterior, al d'asociar democracia a votu.
Esta xente, cuando se mete en política you llámolos políticos "machaca", porque'l sou discursu nunca vei ser constructivu, siempre vei ser machacar al que nun tea d'alcuerdo col "partíu".
Finalmente, l'aparatu propagandísticu ya la censura baxo cuerda fain el restu. Por exemplu, nel casu de Balmonte, los medios de comunicación, heriedes de, por exemplu, una dictadura ou un sistema caciquil. Ou pal casu Asturianu, dámbas. Había que falar de las conexiones del poder colos MassMedia, que daría que falar. Souvenciones, anuncios...
Labels: Antropoloxía
25/12/2006
Ródase en Salas!!!
Labels: SaLaS
23/12/2006
Culturiya
Ía una cousa chocante cumo un país del tamañu d'Asturias (no físicu: estensión ya población), cumo un país tan insignificante nel mapa d'Europa ou d'España, cumo un país que pinta tan pouco na escena española, na escena política, cumo cuando se fala de música asturiana entós los valles Asturianos ensanchanse de tal forma qu'Asturias miedra ya paez que se ta falando d'Arxentina.
Paez una esaxeración, pero nun ía tala. Esta selmana pasada presentouse na Casa Pousafuelles d'Uviéu, nel Chigre de la Xunta Pola Defensa de la Llingua Asturiana, l'Anuariu de la Música Asturiana 2006 (magar qu'inda nun morréu l'añu). Correu a cargo l'AMA 06 de la empresa L'Aguañaz, ya presentou Xune, el cantor de Dixebra.
La cousa ía apovoriante. La llingua Asturiana vei deixar -se nun deixou yá dafeichu- ser una llingua de las clases baxas ya rurales pa ser la llingua culta d'Asturias. Pola calidá de la música collechada esti añu de xuru que mialma nun digo nenguna babayada.
Presentaron ente outros discu: Dixebra, La Caunedo, K-Nalón, La BG La Raitana, Carlos Rubiera, Xuacu Amieva, Isaac Turienzo, Muyeres, El Pravianu, Alfonso Les Regueres, BG Corvera... artistas toos ellos de reconocíu prestixu. ¿Qué veimos dicir d'ellos? Artistas consagraos ya reconocidos nel estranxeiru.
Los estilos vein dende'l Rap a la gaita ya'l tambor, dende recopilaciones ya reediciones a debuts discográficos, dende'l Jazz , al rock, a la música llírica, a lo más tradicional, tonada, música clásica... siendo las suas duas notas comunes: El Bon Facer ya l'usu ya conceución de la llingua Asturiana.
Ya vou comentar outros discos que convien falar d'ellos a parte:
-Toli Morilla col sou "Entropía" ía outra grata sorpresa d'esti añu 2006. Un discu Pop actual, de muncha calidá, con mui bonas lletras. Outru discu pa regalar a dalguien ya quedar bien, pa dicir "esto ía lo que se fai na mia tierra, n'Asturias, ya ponenlu na radiu. Esti home n'Asturias tan tol día sacandolu pola Televisión d'Asturias". ¡Ai se fora verdá!
-Joaquín Pixán, fiel al asturianu col sou discu "Palabres de Muyer". Cúmo me presta qu'un grande de la música, pero a nivel internacional ya de categoría, dalguien que se codea colos más grandes de la música lírica del planeta, asoleye un discu nel que las lletras seyan de poetas asturianas ya, inda más, n'homenaxe a las muyeres. La música ía d'outros grandes: Jorge Muñiz ya Ramón Prada. Esti discu ía pa sacar peichu pol mundu. Pa dir a México ya cuando t'entruguen d'au sos poner el discu ya dicir d'au son los del discu... Ya nun cabes polas puertas de México.
-Niundes ("Enxamás ye pa siempres") ya Asgaya ("Escontra'l tiempu"), dos grupos folc asturianos. Clásicos, pero al miesmu tiempu son cumo un soplu d'aire frescu. Dambas bandas, pola sou mocedá, tan destinadas a facer cousas de muncha valía,ya esperemos qu'asina seya.
-Miembru d'Asgaya ía'l gaiteiru Esconxurau Roberto Junquera, qu'asolayou esti añu tamien "Una Gaita de Cine". Nun para esti home. Nesi discu amuesase lo que vien yá siendo granible de fai unos añinos: que la gaita asturiana ía un instrumentu con unas posibilidades cumo pueda ser un oboe, un travesu ou un saxu (perdón pola comparanza).
-Tejedor con "Música na Maleta". You Tejedor nun vou dicir nada yá. ¿Qué dicir? Lo único qu'esti discu ía'l discu de la mayoría d'edá de l'harmanina pequena, nesti discu Eva Tejedor afonda na sua calidá interpretativa. Poro, ía un aliciente más esto pa facese con un de los meyores ya más esperaos trabayos del cursu.
-Tuenda ("Tuenda"), Aires del Palo ("Aires del Palo ...ya collacios & Friends"), Dolfu, Pangua ya Ambás col "Música Tradicional d'Allande)... son discos qu'hai que tener. Pero meyor tovía, velos en direutu. Ía too un espeutáculu con puru sabor asturianu. Mui bonos los trés.
-Finalmente deixo palo postreiro, el discu cabeiru d'Igor Medio, "Dual", d'Igor Medio ya Lisardo Prieto. Ía una cousa sangrina que nos propios medios de comunicación asturianos se-y deya tanto palique a astistas de la farándula cumo la del "Pachurri" esi que foi pa la cárcele por fatu, ou outros qu'hai preí, ya s'esqueiza a estos dos grandes músicos finaos na carretera la nueiche del 26 de Xunu: Carlos Redondo ya Igor Medio.
Convenía tener presente siempre na memoria qu'estos dos homes llevaron el nome d'Asturias por tou'l mundiu, ya siempre d'un xeitu curiosu, elegante, prestosu...
El discu "Dual" tien canciones que son yá miticas, cumo "Ribesella", ou "Las l.laranxas de Balsera" ou los "Trés Arbolinos". Pa quién las vimos executar en direutu quédanos el meyor recuerdo que -camiento you- se poda tener d'Igor Medio (valga tamien pa Carlos Redondo): El velos tocar nun escenariu, ya cantar, esas canciones rescatadas siempre del olvidu, pero actualizadas pa los tiempos d'agora, con tol sabor asturianu, que tan bien-y sabian dar. Ixo por ellos.
Labels: Culturiya
Dende Salas
Menudu títulu, ¿a ho?. Pos ía verdá, la reaccionaria agrupación salense sucursal del PP, asoleyou estos días na villa Salas la sua formación cara a los siguientes comicios del añu entrante.
El tipu que presentan ía veicín de la parroquia Maicina, nun ía mal paisanu. A min personalmente paezme honráu, honestu, trabayador ya bona persona. Hai ta'l problema. Ía un bonon. Ya trás cada bon home hai una bona muyer, anque nesti caso, cumo ésti ta solteiru, lo qu'hai ía un bon pigarra: El nuesu amigu Ubaldón, natural tamién de Maicina (cuoñu, coincidencia).
Home claro, por supuesto esto nun se diz oficialmente, pero tola xente lo sabe (anque piensen que la xente ía tonta nun ía esautamente asina.
Buó, la dereichona siempre feixo muncho bien pa Salas. Dende la época caciquil fasta la democracia. Por exemplu, una hestoria braera, esto pasou en Camuñu:
-Un mozu (cumo'l mozu esistíu ya morreu fai pouco, nun vou dicir quién fora, pero qu'ía verdá) vivía nuna casina colos sous páis. Yaran más bien probes. El cacique local de la zona (esti sí vou dicir quien ía: Un antepasau de Jose Manuel el Bataneiru, de Camuñu -non Jose Manuel, qué ía una persona cándida), nos años de la Guerra Melilla. El casu ía que mandarase-y al probe rapacín dir a la yerba a casa d'esi home. Ya él dicia que non, que prefería quedar colos sous páis, que taban vieyinos ya malinos. Él diba trabayar a cambéu de las sopas, daban-y polo menos de xantar, pero él quería quedar colos pais, pa curia-ys la salú. Conque por nun dir a lo que-y mandaban, unviaronlu pa Melilla, a la Guerra, a matar mourinos. Mandaronlu espresamente, por desobediente. Ya cuando volvéu, atopóu la casa trancada, vieya, ya los páis muertos... ESTO ÍA UN CASU DE CACIQUISMU NEL CONCEYU SALAS.
-Cuando la guerra, la población autedana, cumo na mayoría del Conceyu, siguíu acatando fielmente la llegalidá de II República d'España, al Réxime democráticu. La dereichona entós tirarase tamién al monte, ya recibíu colos brazos abiertos a las tropas Gallegas del Fascismu Rebelde Franquista, que disparou contra la población en Maeza. Contra las milicias ya los ciudadanos que las taban sofitando, porque nun querían dar cuentas al Señoritu La Granxa, al conde Toreno, ou al apoderáu nel sou casu. Ésti, personaxe, un lladrón ya un sinvergüenza, dedicábase a roubar tierras a la probe xente: Pasaba por un práu, llebaba un cubu con tierra, entrugaba de quién yara esa tierra (la del cubu), la xente dicía que del Conde, ya llou tirabala al práu ya dicía qu'entoncias el práu yara agora d'él. Hai que remembrar que la clas campesina de Maeza de la época yara mui supersticiosa ya mui pouco instruida. Asina, el sinvergüenza del Conde feixose con muncho tarrén a bas d'engañar a personas probes ya cenciellas. Fasta que díu con una paisana vieya, que cuando se-y dixo lo de "agora esti práu ía del conde tamién" retrucou ella dalgo asina: "mira, quitateme d'eiquí nun te veiga meter una ostia que caigas de culu delantre d'esta xente que trais ya te quedes con ella". Ya l'home esi nun xantaxiou nin estafou a la muyeirina. Esto fou verdá tamién ya constitúi OUTRU CASU DE CACIQUISMU NEL CONCEYU SALAS.
-¿Ya esi conceyal del PP, yá na democracia, que dicía cuando dibas a él, a la ca'l Conceyu, "se nun hai sobre, you nun trabayo" con tola cara? Sí ho, esi que tresfugara (costaranos a los ciudadanos una bona suma) ya pasara pal P$O€ por un empléu fixo... Finalmente eso ía CACIQUISMU EN SALAS TAMIÉN.
Pos el PP representa toda esa España d'esos vieyos valores. Polo menos el PP de Salas representa esos vieyos valores. Porque'l PP gobernara en Salas, antias que llegara'l Roxu. Alcuerdome, Salas yara un villa gris ya cutre. Too yara vieyo, del añu la polca. La villa taba trieste, los edificios vieyos, las aceras nun se puei dicir que touvienan cayéndose, claro, pero... Éntos, el P$O€ cargose la UCD salense (ou seique yá CDS... más bien) ya l'home ési camudou la xamarra por un empleu fixu, ya sofitóu al Roxu, ya yá se conoz la hestoria, el PP nun gastara un duru en duas llexislaturas, ya estos nunas fiestas fundieran munchos cuartos, colo qu'en llegando las elleiciones al añu ou al pouco, arrasaran nas Urnas. Por aquella época, "Natxin"(vou ponellu en vascu que-y fode de xuru más) Gracia Noriega, esi impresentable representante bufón del caciquismu llariegu, con un güecu afitáu nel Boletín del Establishment Provincianu, escribía, too ofendíu ya agresivu, lo de la famosa pintada de Boudenaya (Salas) que ponía "Asturies ye Nación". Eso diou-y muncho que dicir, sacou un bon filón d'ehí. Pero d'esto outru nunca más s'alcordou. Si, de Salas siempre diz lo miesmo, eso ya nun se quéi d'un cura de tiempos de Franco...
Home, you queixome muncho de lo qu'hai nel equipu municipal del Conceyu, pero lo qu'había yara peor. Ya esti home nun ía mal paisanu. Tou fixu que se nun touviera naide detrás, sedría un bon Alcalde, pero tela col outru, col Ubaldón. ¡QUE NUN QUEREMOS CANTERAS!
Labels: SaLaS
16/12/2006
Morréu Pinochet
Vaya por Dious. Morreu'l DICTADOR chilenu ensín pode-y enxuiciar por dar un güelpe d'estáu, deponer un gobiernu llexítimu ya mandar matar ciudadanos chilenos ya d'outras partes.
Pinochet gobernou en Chile 17 años, de manera dictatorial ya tiránica, ya reprendeu a tolos que nun taban con él, ou pensaban de xeitu estremáu. Houbo torturas, xuicios amañaos, muerte terror... Güéi munchos chilenos creen que llevou'l progresu a Chile; nada más llonxe, retrasou'l progresu, con un gobiernu siempre favoratible a los EEXX.
Pinochet (you vou poner Pinochete, que suename más asturianu) yara un Sanguinariu-Dictador-Psicópta-Tontu del exe del Bien, frutu de la estratexa "Cóndor" (los cóndores son unos páxaros d'América que someyan el pitu del escudu de la España Franquista).
Esto teo qu'aclarallo. Hai Dictadores-Sanguinarios-Psicópatas-Tontu (DSPT) bonos ya malos. Por exemplu, son bonos Pinochete ya'l de Guinea, primeiru Española, llou Ecuatorial, ya agora Obiang. Teodoro Obiang ía un DSPT (DÉSPOTA) bono. Anque mate xente, bien a España ya recibese colos brazos abiertos. Ya bien abiertos. Numái los malos españoles nun lu quieren nel Congresu Diputaos ¿un dictador nuna cámara democrática? Non, gracias. Nel Congresu presta que la xente entre por mediu'l votu, ou en calidá de ciudadanos. Non dictadores que basan el sou gobiernu na represíón ya na imposición. Anque buó, al Guineanu cumo se-y cayera'l bigote. Dixo con tola cara que "eso son problemas internos de los españoles". ¡Tócate los güevos!
Pinochete, cumo Videla, yara d'estos dictadores sudamericanos títeres almiradores de Franco. De dalguien que tea cumo faru a Fraco nun veimos poner nada. Lo únicu dicir que todos los almiradores sudamericanos yaran más cobardes, patéticos ya en xeneral peores, imitaciones baratas de Franco. Esperemos que xulguen a Pinochete áu tea, ya que-y faigan xusticia, ya non xuicios cumo los que se facian nel Chile que matóu a Victor Jara. Ya que outros dictadores nun volvan nin a Chile, nin a Arxentina, nin a nengun outru país. Na memoria, non de Pinochet, senon, d'Allende (non Ayande) ya de las Víctimas del Réxime Pinochetista.
Labels: Mundu Mundial
Aclaraciones d'Antonio Masip sou'l nacionalismu
Esto diz Don Antonio Masip, pero podría salir de cualisquier políticu de la F$A. Ya por cuenta del Fusu Horariu podía ponesa "llingua", "autogobiernu"... etc.
Se los gallegos quieren tar una houra más na cama, pos nada, palantre. Agora la F$A tamién quier imponer el pensamientu únicu xacobinista que predica n'Asturias tamién en Galicia. A ver se-ys mandan "protexer el gallegu, pero que-y quiten l'estatus d'oficialidá". Cumo n'Asturias. Total, "el gallegu ía "portuñol", nin portugués nin castellanu, un amiestu dambos, que naide fala, porque en Galicia pa entendese ente concellos distintos falan ente ellos castellán. El gallegu fomenta'l nacionalismu".
Las miesmas chorradas que n'Asturias. Pero a outra houra.
You a min lo que me prestaría yara que m'esplicara'l P$O€ d'Asturias por qué siempre asocian las cousas d'Asturias (la llingua), Galicia (usu horariu), Euskadi (llingua, nacionalismu) con retrotraese nel tiempu.
¿Qué ía más modernu despreciar la llingua d'ún miesmu? ¿Usar fusu horariu distintu al que marca'l sol? Mialma, you sou antiguu, antiguu.
Ya eiquí vien lo bono:
Lejos de mí bromear con cosas tan serias. Gellner, profesor en la London School of Economics y director del Centro para el Estudio del Nacionalismo del multimillonario George Soros, dividió los nacionalismos en Europa según cuatro supuestos husos horarios. Para desgracia de los del Bloque engloba a Francia, España e Inglaterra en un mismo huso, al tratarse de «una región en cuyos países existían áreas lingüísticas y culturales predominantes, cuyo desarrollo se propició por los Estados absolutistas y fuertemente centralizados, sobre todo a partir del siglo XVIII».
Mialma! Pero nun ía un chanciu por parte de Masip. Íalu por parte Gellner. Asina que yara eso, el nacionalismu esplícase non por conceutos cumo la llingua, la identidá, factores raciales, socioeconómicos, culturales, xeográficos... ensinon pol fusu horariu...
Meca, pueis con esto, yá ta cuasi resueltu'l tema de la oficialidá: La llingua nun ía'l factor que veiga truxir ou fomentar el nacionalismu n'Asturias; con nun camudar l'houra (ou camudalla dacordias con Madrid) ta too feicho. Pueis yá saben amigos nacionaliegos asturianos, dende esta páxina veimos fomentar p'Asturias el non cambéu del fusu horariu asturianu, ya siguir calteniendo'l miesmu fusu que Madrid, p'a ver se con ello oficializan la llingua asturiana.
09/12/2006
La miesma hestoria d'antias
Labels: Dadaísmu
08/12/2006
Una Hestoria d'Amor braeiru
-----------------------------------------------------
-----------------------------------------------
Pá ta pa Ponga
Labels: Dadaísmu
03/12/2006
Llión
La Comunidá Autónoma de Castiella ya Llión (C.A. de Castilla y León) nun ía outra cousa qu'un invento, un "enxendru hestóricu" que se feixo na transición pa facer mayor Castiella, ya que en realidá güéi nun tien muncho xacíu (anque daquella, tampouco). ¿Por qué? Por que Llión tien una marcada personalidá dentro d'esi conxunto. Tanto pola parte llionesa cumo pola Castellana, la CA, nun ía mui popular.
Llión ta comprendíu polas provenzas de Salamanca, Zamora ya Llión propiamente dicha. Ía lo qu'antiguamente llamaron los hestoriadores romanos l'Asturias Cismontana, estremada de l'Asturias Tresmontana (Principáu d'Asturias). Poro, Llión tien daquéi d'Asturias, eso ía indudable. Ou meyor dicho, Asturias participa daquéi en Llión.
Vou haber se m'esplico. Esti ía un tema mui delicáu. Llión nun ía Asturias. Pero tampouco ía Castiella. ¿Por que nun ía Castiella? Porque, magar de qu'en Llión haiga dellos rasgos identitarios Castellanos (cumo la llingua Castellana, fala patrimonial de bien de comarcas), hai outras partes de Llión que son asturianófonas. Ya inda más, tamién hai outras partes de Llión de falaxe "asturianogalegoportugués", pero eso ía outru tema. mui compleixu, mui vastu, ya qu'inda nun ta resuelto nin en Asturias, nin en Galicia, nin por supuesto en Llión.
La llingua Asturiana en Llión llamanla "llïonés". El nome ía lo de menos. Ta claro que ía lo mesmo de lo que se fala al outru llau de la Cordalera:
La llingua asturiana ía tán d'Asturias cumo de los llioneses del sur del cordal. Porque las llinguas nun son de los estáos. Son de la humanidá, de los seres humanos. Bien. Nesti mapa amuesase l'ambitu llingüísticu llionés. Esto ía, au se fala gallegu, au se falaasturianu, ya au se fala castellanu.
D'ehí pue sacase las siguientes conclusiones:
-El Castellanu ía la llingua que más se fala en Llión. Esto pue se por la coyuntura política ya hestórica, yá qu'anguaño la capital de Llión ta en Valladolid. Se la capital fora Ponferrada, l'asturianu tendría, seique outra consideración.
-Anque l'asturianu realmente nun tien muncha consideración. Tien más el gallegu (reconocíu nel estatutu d'autonomía de Castiella ya Llión) que'l propio asturianu, que cumo se ve, ocupa un espaciu muncho mayor. La esplicación ía cenciella: Galicia potencia más la sua llingua qu'Asturias. Habría que ver s'el presidente Areces promoviera l'asturianu (ya los presidentes anteriores) el prestixu que la llingua tendría entós...
-El llionés tien bastante uniformidá dialeutal. Sí, yá que xira too sou'l dialeutu oucidental. Esto puei truxir engarradiellas con Asturias, por mor de que l'standard asturianu xira sou las variantes centrales. S'esistiera una tradición educativa n'asturianu vieya, cumo la del castellanu esto nun tendría problemas. Pero cumo toos sabemos lo que socede...
Por supuesto que llionés ya asturianu ía sinónimu. Ía la miesma llingua. Lo peligrosu ía precisamente eso, que'l llionés arrequeixa los dialeutos centrales ya orientales ya toma cumo bas l'oucidental; mentanto n'Asturias gárrase'l central. Anque las normas seyan las de l'ALLA.
Asina, nas comarcas gallegofonas las normas son las de la Real Academia Gallega, nas comarcas asturianófonas, las de l'Academia de la Llingua Asturiana, ya nel restu, castellanófonu. las de la mal llamada Real Academia Española (en serio, ¿nun sedría más propicio llamalla "Real Academia Castellana*"?).
A parte de la llingua, Llión fou un reinu hestóricu. Al marxe de Castiella, ya anteriormente, yá esistiera Llión. Esi ía un rasgu hestóricu a tener en cuenta.
Llou, outros, ía la psicoloxía del pueblu llionés, qu'en munchos de los casos identificanse más llioneses que Castellanos... ya identifican Llión cumo una realidá material distinta de Castiella. Ía esto, cumo una rexón aparte que podiera constituíse Comunidá Autónoma. La 18ª Comunidá Autónoma del Reinu d'España...
¿Cumo afeutaría esto a Asturias? Dende llou, el Principáu d'Asturias nun tien nengún dereichu sou Llión. Que Llión nun ía Asturias. Cumo tampouco ía nin Galicia nin Castiella. Llión ía Llión.
Primeiru de too, yá nun tendríamos llende con Castiella, ya eso ía una cousa bona. Llendariamos con Galicia, pol Ueste, ya colas fasteras asturfalantes de Cantabria ya Llión (cumo agora, solo que con un pequeñu matiz: agora las comarcas llionesas ya son llionesas, caltendrían la sua identidá llionesa, ya entós yá nun "irradiaría" Castiella a las miesmas puertas del Principáu. En pasando Payares, yá nun s'entraría en Castiella, senón en l'Asturias Cismontana).
En rellación con ello, hai que pensar que Castiella ía una superpotencia mundial hestórica. El poder aculturizador castellán ía abondo granible: la llingua que naciera ente Burgos, Soria ya La Rioxa fálase angüaño nos cinco continentes ya en tolos foros internacionales. Ya ía la segunda llingua más estudiada trás l'inglés.
Segundu, Llión tendríamos una comunidá harmana al outru llau del Payares. Esto ía una cousa mui interesante. Agora l'asturianu pasaría a falase (a institucionalizase cumo llingua propia) en duas comunidades autonomas. Pero habría que negociar, claro ta, en que términos l'ALLA actuaría sou los dialeutos llariegos...
Esto ía interesante, yá qu'esti mes d'Avientu, cellebróse en Cangas la "II Xunta d'escritores n'Oucidental", ya vinieran del País Llionés unos poucos...
02/12/2006
Los Asturianos ya las suas cousas d'ellos
Dedícase a facer campos de golf na rasa de la Mariña en Cuideiru, ¿pa quién, pa los pixuatos retiráos, ou pa la xente las Lluiñas? Ou construyendo a tou trapu. Ou tendiendo llinias d'alta tensión nel "Paraisu Natural". Ou especulando colos aeroxeneradores nel oucidente. Si señor, vusté lleéu bien, ¡ES-PE-CU-LAN-DO!, xente que nun-y importa un res el mediuambiente, nin la convivencia, nin tienen un migayín d'educación. Ou cumo se fai en Salas, abriendo canteras.
Puéis bien, 6.000 manifestantes a los que nós nun nos pudiemos sumar, por problemas d'intendencia d'última houra, toman las cáis d'Uviéu, col envís de parar esta tendencia de destrociar dalgo que ía de toos, non d'unos poucos, ya que presta más ya fai más proveichu talamente cumo ta agora, non dempuéis de deteriorallo pa sacar unos cuartos.
Retirarase esti home felizmente n'Uviéu, ya feixose-y una homenaxe. De xuru trabayóu a esgaya na sua vida. Felicidades Ubaldo, a disfrutar en paz de la xubilación.
Pero non. Cumo tolos ricos, esti home inda quier más. Ya cumo seya. ¡A daquién-y choca que "Palabrinas" -l'alcalde de Salas- veiga a la Cabeza de la embaxada salense! Cumo reza'l dichu, Dious los cría ya ellos arrexuntanse.
L'Alcalde Salas, nun nos cansamos repetilo nesti día de protesta, vendéu'l sou pueblu (Biescas Carllés) a la Río Narcea Gold Mines (suena a "Chicano") ensín dereichu dalu, ya ensin cuntar pa nada colos sous vecinos. Güéi, Biescas Carllés nun tien nin ouru, nin paisaxe, nin cuartos: Numái una balsa cianuru al viés del Narcea ya una bolsa paru -más bien tán en paru los antiguos trabayadores ou una parte d'ellos.
Ubaldo meteuse con un sociu nel negociu de la esplotación de las canteras. Ya con esi home, el probe Ubaldo cuntaba esfarrapar un par de valles ya trés ou cuatro montes ente Salas ya Pravia, nuna estensión de sobro unos 10 km2, más ou menos. Un conceyín pequenu. Pero nun cuntaba cola xente los pueblos. Ya la xente los pueblos deixolo bien afitáu:
"¡Canteras Non!"
Pero cumo los cuartos nun conocen de vergoña, el nuesu "intrépido y audaz paladín de la especulación, engañado por su fiel secuaz" siguíu porfiando. Ya la xente de la comarca, "los malos autedanos", de xeitu inxustu, "soez, malsonante, insultante" ya outra vede inxustu, nomaron a esti individuu:
"Treidor"
A min nun me cabe na mollera cumo puen llamallu treidor, se numái quería esfarrapar unos poucos pueblos, nun quería treicionar a naide. You más bien llamábalu "F__ __ _____".
Asina que la noticia diz que "avalóu a un amigu por munchos millones, ya'l final nun sabía pa que yaran los cuartos, porque l'amigu xugóu-y una mala pasada, que él numái quería dar unos puestos de trabayu -(h.aaaaaaaaaaaa h.a h.a h.a)- que fou too un mal entendío, ya la xente'l pueblu unos vándalos, ya pa enriba falan "bables"".
(Paréntesis d'unos minutos ríndome)
Asina qu'al probe Ubaldo un bon amigu d'él (n'apariencias, en realidá yara un empresariu lloucu) engañoulu pa que metiera una riñonada cuartos -qu'Ubaldo de puro bonu qu'ía nun entrugóu siquiera pa que yaran- col esfoutu de crear puestos de trabayu, ya ¡coíncidencia!, cou'l sou pueblu. Probe Ubaldo. Cumo diz la noticia, "¿a quién nun-y pasóu esto dalguna vegada?" A min l'outru día ensín dir más llonxe. Un amigu mieu convencioume pa que fora queimar Muniel.los. Eso ía una mala pasada. You, llou pa vengame, quixi qu'outru amigu de miou entrara en Parque Astur con una metralleta ya en nome del Islam matara a tolos presentes. Se nun fora la moza d'esti yá ex-amigu míu, agora saldría en tolos períodicos. Son cousas que pasan.
Pero non, los malos autedanos creen qu'Ubaldo numái quier sacar cuartos, que nun tien escrúpulos ya que lo miesmo-y da la xente de Llinares, Ponteveiga, Camuñu, Santuyanu, Villamar... Ya esta xente, maleducada ya "soez", dempuéis de quexase (que se quexaron por tolos medios) pon una pancarta nel sou pueblu (non nel d'Ubaldo, ensenon nos pueblos áu se fadrá la macrocantera) denomando-y a Ubaldo "Treidor"... ensín comentarios.
Buó, espero que s'agudicen dellas sensibilidades, que la mani llegue a bon puerto, que los políticos escuichen ya que la macrocantera d'Ubaldo nun la faiga, porque recapacite sou lo que vei facer, ya yá verá cumo la xente los pueblos quitan las pancartas, ya aprecian-y más entós.
Labels: Ecoloxía
01/12/2006
Bienveníu MrSarkozy
Milagru, pero cierto. La FSA ía un partíu que presenta unos rasgos únicos nel mundu de la política. A parte de la refuga de la llingua, tamién, siempre que pudo, foi contra la meyora en infraestructuras que xunan Asturies cola Meseta. You pienso qu'esto vei unío. El gobiernín eiquí n'Asturies, nun quier gastar cuartos en carreteras, pero pa nun perder la conexión con Castiella protexe ya fomenta'l Castellanu con especial esfoutu (hai que remembrar namái qu'esta selmana pasada, a pitición d'un aconceyamientu d'escritores organizáu pol "Govern de Catalunya", el Gobiernín del Principáu (Cataluña ía "Principat", ou polo menos una parte) univióu una representación d'escritores en llingua Castellana, que nun ía que nun tean dereichu a escribir en castellán -a min paezme muncho bien- pero, nun ía la llingua que, pienso you, más represente a Asturies.
Buó, la hestoria de la F$A colas comunicaciones cola Meseta ía mui simpática. El partíu más Castellanista d'Asturies -ya d'España- nun quier xunir Asturies con Castiella col AVE.
Antias de nada. L'AVE ía la versión española del TGV francés. Ía una hestoria increyible, la de cumo'l gobiernu francés-y vendéu al español l'AVE, fabricando España'l TALGO. Ía mui estrañu tamién que dende qu'España negociara con Francia pa qu'ALSTOM fabricara en Cataluña l'AVE, el gobiernu Francés s'implicara na llucha antiterrosita con ETA...
Asturias negociara a fines de los 80 ya entamos de los 90 la llamada variante de Payares. Nun veimos entrar se moralmente Asturies ou Andalucía (que fou la beneficiaria en detrimentu de nós) tenía más dereichu. Pero se que veimos criticar que'l PSOE asturianu en Madrid votara NON a la variante de Payares que xuniría Asturies cola Meseta. Un políticu nun puei votar contra'l sou elleutoráu. Nunca enxamás.
Paei ser que la prensa del Réxime F$A vende que vei llegar l'AVE a Asturies (non, realmente vei ser "una combinación de mercancías ya pasaxeiros, con anchor variable en varios puntos del trayeutu." Ya la prensa erre qu'erre col tema l'AVE. ENGAÑANDO AL PUEBLU ASTURIANU CUMO LA FOUGUINA!!!
Parez que non tien nada que ver, pero esto ía una de las cousas que tienen rellación cola oficialidá. Esto espeya'l porquéi de la F$A na sua cruzada particular cola llingua. Oficializar la llingua supondría facer política en clave asturiana. Dalgo que'l gobiernu nun fai, dende nunca. Faín lo que Madrid-ys mande dende la Cai Xénova ou Ferraz. Un PSC, un PSdG, nunca votaría contra la propia autonomía que representa. Nunca. Llonxe inda, negociaría con Madrid de tu a tu. N'Asturias, la obediente F$A agacha las oureyas ya fai -ensin rechistar- lo que-y manden.
Poro, ía tan difícil acolumbrar una F$A favoratible pa cola llingua. Sedría camudar años d'una tendencia política xacobina-centraliega, aóu'l centru ta en Madrid.
Nun ia custión de oficialidá ou non oficialidá. Ia custión de facer política dende Asturias ou dende Madrid. Esto nun ía nacionalismu. Esto ía la España de las autonomías, àu cada autonomía ha resolver las suas cousas que-y competan dientro de las suas llendes.
Tampouco a la xente de la F$A-y interesa que l'asturianu viaxe. Que conoza la realidá d'outras autonomías (Cataluña, Galicia, Andalucía, Navarra, Valencia...) ya vean que nun solo perdemos colo de la llingua ya l'AVE, senón que nós tamos perdiendonos munchas cousas que nos correspuenden, cumo al resto de ciudadanos nuna democracia.
Labels: Actualidá
![](http://www.alianzo.com/ranking-blogs/boton.php?url="htpp://www.munduxaime.blogspot.com")
