MunduXaime: Une Histoire Royale

28/12/2006

Une Histoire Royale

Una Hestoria d'Asturias: Inteleutualoides políticos "machaca" ya Clientelismu

Don Toñín

tenía un pollín

sacoulu pal camín

ya escapouse-y al ratín.

Arturo

el del güevu duru

tenía un canguru

con él dormía seguru

Pascuala

tenía un koala

llevoulu de safari

engancho-ylu un impala

Mario

salíu del armario,

nunca ía tarde

anque seya octoxenariu

Bou. Con esta poesía infantil entamo esta entrada. (La poesía feixela you. Que quede claro. Pol Copyright ya esas cousas. You llou nun quiero problemas). El casu ía que lo que vou cuntar poudo soceder en Salas, pero por cambiar de Conceyu, socedéu en Balmonte. Pero na Ría Miranda, que ía lo más averáu a Salas.

Na Ría Miranda había un paisanu que beillaba la Jota.... Mialma cumo-y daba. Un as de la Jota. Llamábanlu pa dir beillar la Jota a Aragón, a Zaragoza, a beillalla pa la Virxe del Pilar. Ya feixera tamien xiras por Sudamérica, participara nel Conciertu de Bangladesh (el de George Harrison), hasta saliera nel especial de Navidá de Raphael. Yara una autoridá mundiala nel beille la Jota.

Conque cumo destacaba neso, el periódicu local de Balmonte (El Nuevu Balmonte), espublizaba-y too lo que mandara. Ya lo que'l dicía, pal periódicu diba a misa. Ya l'home esti falaba de Vectores Matemáticos (pa quien nun lo sepa, la xente Balmonte ía xente culta ya instruída), ya dicía cousas cumo:

"Los vectores matemáticos nun esisten. Son inventos d'unos poucos, de xente con escuros intereses"

"Los Vectores nun son económicamente rentables"

"Entamase estudiando vectores, ya acábase construyendo bombas nucleares: You touve n'Hiroxima ya Nagasaqui"

Ya l'alta sociedá de Balmonte dicía que sí, que claro, que tenía razón. Que vaya luxo tener a esti paisano eiquí.

Conque en Balmonte había matemáticos tamién. Ya estos quexábanse. Dicían que, nomenon, que los vectores matemáticos yara una parte de la ciencia que conformaba la sabiduría del ser humanu. Que yara patrimoniu de la Cultura Académica Mundial. Ya nas manifestaciones que facían, vestíanse de Esbardu. Ya'l de la Jota subíase polas paredes.

Curiosamente, cuando se falaba de Jota, nun-y entrugaban a él. Él namai falaba en "El Nuevu Balmonte" de matemáticas.

Se vusté, bon llector, camuda "Jota", "beillador de Jota", "Balmonte", "vectores matemáticos" ya dellos terminos más, decatarase de qu'acaba deprender un bon métodu pa escribir nos periódicos asturianos, mui fiable (lleva más de 70 años asina furrulando).

Pos eso ía un intelectualoide. Una figura carismática ou esperta nuna rama, pero que fala de las demái ramas cumo se fora un espertu ou una autoridá moral nello, ya la xente apláude-y. Asina ía una parte d'Asturias.

Manolón ía grandón. En tolos sentios. Mide 1'90 ya pesa 135 Kg. Tien numái una ceya, un bon bigotón ya'l restu la cara ía un ladriyu. La sua conversación ía tamien cumo un ladriellu.

El calter de Manolón ía duru. Ía un home d'acción. De los de "Mayestras, las d'antes. Cumo nun soupieras la lleición, partiante la riela de cantu na tiesta. Ostia que tiempos aquellos, que recuerdos". De los que cuando-y fain penalti dudosu contra'l sou equipu "arbiiiiiitru mecagontoputamdre maricón, cumo lu garre..." en claro xestu de duldia. Un home cuyu primer estímulu ía agresivu ou violentu siempre. Lo que se llama un home de poucas lluces.

Xente asina haila en tolas casas conceyos d'Asturias, ya na miesma Xunta Xeneral ya nel nuesu Gobiernín. Toos tenemos na mente a dalguién conocíu ya dalguien que se se metiera na política encaxaría nesi perfil. Hai que puntualizar una cousa, cuando esta xente nun ta metida en política, son los primeros que nun entienden pa que val la política. Son los que la definen cumo "dir votar, ya llou que s'arreglen ente ellos". Ya desentiendense, fain lo que-ys mandan los políticos (non al revés) ya cuando por causa "los políticos" vinen-ys las cousas mal dadas espresanse cumo Manolón, colo del penalti (camudan arbitru pol nome del politicu). Pero vuelven enseguidina al puntu anterior, al d'asociar democracia a votu.

Esta xente, cuando se mete en política you llámolos políticos "machaca", porque'l sou discursu nunca vei ser constructivu, siempre vei ser machacar al que nun tea d'alcuerdo col "partíu".

Finalmente, l'aparatu propagandísticu ya la censura baxo cuerda fain el restu. Por exemplu, nel casu de Balmonte, los medios de comunicación, heriedes de, por exemplu, una dictadura ou un sistema caciquil. Ou pal casu Asturianu, dámbas. Había que falar de las conexiones del poder colos MassMedia, que daría que falar. Souvenciones, anuncios...

Esto, llámolu you, Clientelismu.

Ya cumo non, esti sistema nun furrularia sin el pueblu. Un pueblu supersticiosu (non pa cola cultura tradicional ou popular, senón pa cola cultura política, la cultura civil ou ciudadana), incultu (que de xuru sabe de vectores, pero nun conoz los sous dereichos), zarrau, desganau, resignau a la sua suerte, desmoralizau, miedosu, fai el restu.

You polo que a min me toca, intentarei a partir d'agora ser meyor ciudadán.

Labels: Antropoloxía