MunduXaime: Acabase esti añu

31/12/2006

Acabase esti añu

Se nos acaba l'añu. El 2006. Casi nada. Un añu interesante. Por munchas cousas. 25 años d'Estatutu d'autonomía (sí señores, anque naide s'alcordare, yá 25). Ya 20 d'Europa. 20 d'Europa ya paez que se nos vei acabar chupar del tetu. El tiempu dirá las consecuencias d'ello.

Fou l'añu que morreu Veriña, Luis d'Arnizu, Andresín d'Insierto, Igor Medio ya Carlos Redondo. Añu malu pa la musica. Polo menos, quedará la lleenda, cumo tantos outros músicos que morrieran na carretera. Cumo'l poeta Andrés Solar. Veriña ya Arnizu (tamien lloraos) yaran paisanos mayores, ya nun ía lo miesmo. Bono, que se-y vei fer. Asina son las cousas, habrá que busca-y dalgo positivu. Anque seya cruel ya hipócrita... en fín.

Polo demás la vieya Asturias sigui igual. Nun paez que veiga camudar muncho. La sidra cada añu ía meyor, ente outras cousas pol calecimientu global de la tierra, ya eso siempre ta bien. Inclusive'l vinu Cangas ta empezando a poder tomase. Bono.

Pa rematar l'añu ETA fai atentau en Barajas, Madrid. Ya palmanla dos Ecuatorianos. De xuru que nun sabían vascu. Siempre morren los miesmos. Agora que por fin había n'España un presidente dialogante, con ganas d'escuchar a la xente, consensuar cumo socedéu en Catalunya, pos éstos fain la gracia. Sientolo polos ecuatorianos ya los afeutaos (tamién nos vei chiscar a nós de xuru, cola zuna que tienen n'Asturias col nacionalismu las élites políticas ya pensantes).

Espero que'l 2007 seya un añu más prestosu. Que se consigan cousas pa toos cumo paz, llibertá de terrorismu, que'l McDonalds veiga a la puta, que la RTPA desapaeza tamién (ou que la faigan cumo ha ser), que la gaita s'afite nel conservatoriu, que l'idioma se reconoza, que las inxusticias ya diferencias sociales, polo menos s'amenorguen, que nun tresformen Asturias nuna casa putas, con campos de golf ya una costa cuyu modelu seya Marbella, ya dellas cousas más.

Ya más nada. Esta ía la cabera entrada d'esti blog nel añu. Gracias por entrar eiquí, astutu llector. Pal añu que vien más, ya prestaríame que meyor.

Feliz añu entrante (ast)

Feliz año nuevo (cast)

Happy new year! (eng)

Bon Année (Fra)

Glückliches neues Jahr! (d)

Feliz ano novo (gall-ast)

# ¡Las cousas qu'acontecen nesti mundu! "Poro, la realidá soupera la ficción" Diestru @ 3:28 pm