11/05/2009
Lliteratura... asturiana ya llionesa
Los Mirandeses (talo de Balmonte cumo de la parte'l Douru) tamién aporfian con aquello de la llingua común. Hasta autoridades competentes na materia aporfían, dende Lleón, Zamora, Miranda (de Balmonte ya del Douru) ya Asturias col tema de la unidá llingüística.
You tamién lo creo. Agora, cuando ún llee a González-Quevedo ou a Xosepe Vega (dos autores llioneses) decátase que, anque tea escrito na miesma llingua que n'Asturias, la suas obras (ya n'especial la de Xosepe Vega) nun se pue dicir que perteneza a la lliteratura asturiana.
Quiero dicir, yía más fácil falar de llingua asturiana en Llión (talo valdría si quieren falar de llionés n'Asturias ou Zamoranu n'Asturias ou Asturllionés n'Asturias, Miranda ou Zamora ya Llión) que de Lliteratura asturllionesa.
Nun pienso que, nin la temática lliteraria (sobre too'l tópicu de "l'escaezu", tan cultiváu n'Asturias) puea estrapolase a Llión, colos sous tópicos, ya las suas lleendas, bien sía dicho de pasu casi todas se repiten n'Asturias ya en Miranda.
Ta claro qu'en Llión inda tienen muncho qu'andar ya muncha lliteratura que facer nesta llingua, pero sou de la opinión que, firme defensor de la llingua en común con ellos, ya viendo munchos puntos en común na lliteratura, ellos forman (ou tienen las blimas) una lliteratura aparte.
Qué non too vei ser falar del "Escaezu" ya'l "Desaniciu" ya la "Perda del tiempu pasáu"... (Amén Gratia)
Labels: Actualidá, Lliteratura
18/04/2009
De Lliteratura
Las duas muyeirinas morrienon con más d'ochenta años caduna; ya amái Corín Tellado deixóu abondu testimoniu escritu. Nené Losada tampouco lo feixo mal, vaya.
Siempre se llora pola xente que marcha, ya más si fonon importantes, nesti casu pa la lliteratura. Nené Losada Rico taba considerada anguaño la Decana de las Lletras Asturianas, ya Corín Tellado yera la escritora viva en castellán más lleída, ya la segunda de la Hestoria tres Miguel de Cervantes y Saavedra, aquel que tanto ciñu-ys tenía a los Asturianos. Perceguera, que dirían los falantes más finos.
Todos las lleímos a las duas, menos a Corín Tellado, porque esto yía cumo la Tele; toos vemos la Dos ya Telecinco nunca...
You si intentéi lleer a Corín Tellado. Mia buela Sarah de factum, fou una almiradora de Corín. You púnxeme una vegada a lleer dalgún llibru d'ella. Ya la verdá que nun pudi siguir. Sicasí, mia buela sí lleía a Corín con Santa Devoción. Ya muyeirinas cumo la mia buela Sarah (qu'añu arriba, añu abaxo yera del miesmu tiempu que Corín) tamién.
L'estilu de Corín diba empobináu pa un ensamu muyeres, que fonon potencialmente esqueicidas de la lliteratura de nun ser por Corín, ya dalguna outra/u autora/u cumo ella; que-ys feixo lleer ya la vida un pouco más prestosa, sobre too nos tiempos d'antañu, cuando Su Escremencia'l Xefe Mayor del Establu Francisco Franco promovía aquel tipu de familia na que la muyer yera un mueble cumo un horru, por poner el casu.
Nené Losada yera más bien del tiempu de la mia outra buela; ya escribía nun asturianu mui paecíu al d'ella, lo cual a min prestábame. A Nené sí la lleera you más. Bono, pos esta muyer marchóu, que la tierra-y seya leve, la sua obra tará presente.
Fácil llectura, ya ternura. Ente outros munchos más, son ingredientes de lo más destacable d'estas autoras. You con ellas vienme a la memoria un llibru pa rapacinos, el primeiru que you touviera (tou falando yá de finales de los años 80): un llibru n'asturianu pa neños que tenía esos dos ingredientes d'estas duas autoras. El llibru, que you recomendaría a los páis ou tíos ou demás familia que quieran regalar a los pequenos pa que s'arimen al idioma yía El Pequeñu Llunarín (na sua versión orixinal n'inglés Spot).
Fou'l primer llibru que you touve ya pasóu polas manos de tolos mious primos, asturianos ou madrilanos, con igual éxitu.
Asina que, fácil llectura + ternura= Nené Losada, Corín Tellado ya El Pequeñu Llunarín. [Añediría argumentu trepidante, pero diranme que cumo un llibru pa guh.es ou de Corín Tellado vei ser "trepidante": qu'entruguen a los sou llectores.
Labels: Actualidá, Lliteratura
07/08/2008
El Toucín de las Almorranas
Había un cura en Llinares que tenía un ama, ya vinieran de la parte Galicia ya eran los dos mui galleguinos. Ya acordanon llamar a unu d'ahí que llamaban Cándido L... C... pa cava-ys el güertu. Ya fou p'allá. Ya cuando llegóu la hora xintar diz ella:Labels: Lliteratura
20/06/2008
Lleenda Llionesa, Mirandesa ya Asturiana (¡¡¡Recoyida en Salas!!!)
Dícen los vieyos qu'ellos han oyíu cuntar a los sous abuelos que Santa Lena yera la hermana más galana de todas las suas hermanas: la nuesa Siñora del Valle, la Virxen de la Carbayeda, la de Fresneo, la de Guiana y on ñon m'alcuerdo de las outras. Pos, on dícen que Santa Lena foi roubada de la sua casa por un mal home que la coyéu, montóula ño sou caballu y desaparecíu como'l diabru. Pero al chegar al valle, curtóula la cabeza que cayíu al suelu. Allí encontróronla los pastores, y asina sei que se pusieron a xugar con ella rodándola pol suelu, y quedoron admiraos porquei vieron que la cabeza asina volvía siempre al sitiu en que cayíu la primeira vez. Y ende llevantóuse la ermita.
A LA SIÑORA DEL NASO (Recoyida en Miranda)
No alto dos siete cabezos
moran las siete Señoras:
abenzonan tolas mozas,
llabradeiras y pastoras.
Sùes capiellas todas brancas
culas tellicas burmeillas
parecen rosas floridas
a beisálas cìelo y las streillas.
Sou siete y todas stan altas,
todas altas y harmanas,
a tóla hora se veyen
y falan tólas mañanas.
La localización de los templos que la llienda axunta alredor del númaru siete ye mui significativa yá que muitos están construyíos en llugares que seique yeran sagraos antias de la sua cristianización onde yeran veneradas antiguas deidades femeninas locales sobre las que s'instituyíu, después de la introducción del cristianismu n'Asturia, el cultu a diversas santas y a la Virxe nas suas distintas advocaciones.
[FILANDÓN - LLITERATURA POPULAR LLIONESA - Nicolás Bartolomé Pérez - O LIMIACO EDICIÓNS, Luna (Zaragoza) Marzu 2007]
Ya las Lleendas asturianas correspondientes, recoyidas pa Salas:
LAS SIETE HARMANAS
Había fai munchos años siete harmanas, mui guapas. Ente las siete harmans había envidias, llegando hasta odiase, porque cumo dixera, yeran mui guapas. Entós, cumo nun se soportaban, dicidienon separtase, ya marchanon pa siete llugares distintos, ya d'ehí salienon las siete capillas d'Acebu, Visu, Monxagre, Fresnu, Santa Técula, El Carbayín ya Montarés.
LA LLEENDA DE LA CAPILLA DE LA VIRXE DEL VISU (que val tamién pa LA CAPIYA DE LA VIRXE DEL MONXAGRE)
Resulta que la virxe apaecéuse-y a un pastor qu'andaba llindiando oveyas en Visu, ya pidíu-y que la xente Salas había face-y una capilla, nel sou honor. Los Salenses, fonon facé-yla, pero cumo'l llugar óu apeicéu taba mui arriba, escoyeron un prau- el de La Folgueirúa- pa construyir la Capilla, porque taba más abaxo. Ya entós llevanon hasta ehí los materiales.
Pero cumo la voluntá de la Virxe fora qu'había que construyir la capilla áu s'apeiciera, pos los materiales apeicienon al día siguiente óu s'alcontrara col Pastor. Ya ehí construyenon la capiella.
Labels: Lliteratura
19/06/2008
EL GRANU MAIZ
Había una vegada un paisanu mui reutu. Na so quintana teníenlu toos por xente serio y cuerdo. La xente diba a la so casa a pedí-y opinión sobre enfotu diverso.
Pero, derrepente'l paisanu tórnase miedosu, garra miéu a les pites. Sí, garró-ys mieu, porque dicía qu'él yera un granu maíz y elles quiríen comelu. Dicía'l home a voces: "¡Soi un Granu Maíz, soi un Granu Maíz!, ¡Pechai les pites nel so corripu, que quieren comeme!", Y la xente'l llugar emprincipia a coyé-y miéu a él.
La xente decide llevalu a
-A ver ho, ¿quién ye vusté?
-Yo soi un granu maíz.
-Non home, non. ¿Cómo va ser usté un granu maíz?. Usté ye un home que llámase Xuan García.
-Non, non, yo soi un granu maíz.
Amárrenlu, y dempués d'otru mes de curación tornen entruga-y:
-¿Quien ye vusté?
-Bonu, yo soi un granu maíz... que llámase Xuan García.
-Non, equí nun hai ningún granu de maíz.
Tornen amarralu de nuevu, y al mes:
-Dígame ho, ¿Quien ye vusté?
-Bonu, soi un home que llámase Xuan García.
-¿De xuru?
-Sí.
-Bonu, entós yá ta usté curau. Vamos llevalu a la so casa.
Y nel so pueblu la xente ponse percontento cuando lu ven llegar. Diz el médicu a los sos vecinos:
- Ta yá curáu. Mirái si non. ¿Cómo te llames?- entruga'l medicu.
-Llámome Xuan García.
- Y... ¿Qué yes?
-Soi un home.
-¿De xuru?
-Sí, de xuru.
-¿Tas seguru de verdá?
-Yo sí toi seguru, les pites nun sé si tarán.
Esti cuentu sintieralu fai un bon feixe d'años, n'Uviéu, peime que fora a Dolfo Camilo Díaz, ou nun séi si sedría más bien a Milio'l del Nido... la verdá ía qu'espero sepan perdonar, pero nun llembro.
Bono, esperemos qu'al Partido Popular nun-y pase igual col tema l'asturianu nesta reforma l'Estatutu
Labels: Actualidá, Lliteratura
12/06/2008
Un cuentín gallegu
Mingos de Caión era un mariñeiro galego que viaxaba no Skajerrat. O barco afundíu, como poido agarrado a un madeiro chegóu ata unha pequena illa medio morto, aló no Pacifico. Alí foi recollido polos habitantes de aquela Illa, el e o seu acordeon. Un acordeon alemán que navegóu cando el, loitando pola vida.
Mingos de Caión chegóu a aquel lugar e foi recibido coma un Deus, un deus que tocaba o acordeón. Aquela xente pacífica e entrañable acolleulo de tal maneira que chegóu a casar coa filla do xefe, aquelo que chamaban o home que leva na man o arpón
Mingos de Caión era feliz, máis feliz non se podía ser ente esa xente maravillosa e hospitalaria. E sen embargo, ó caer a tardiña cada día Mingos de Caión collía o seu acordeon e cantaba. Cantaba "Santo Cristo de Fisterra", cantaba "Virxe da barca en Muxia", e a máis bonita de todas, a que diz:
como a miña mai, nengunha
que me quentóu a cariña
co caloriño da súa"
Labels: Galicia, Lliteratura
30/05/2008
Güei, Poesía
Vou amosar un poucu poesía güei. Cuido que pertenecer a una comunidá llingüística cumo l'asturiana, unde la llingua tien una situación diglósica, unde ta arrequeixada, tien tamién el sou encantu. Porque la llingua entós, en munchos casos, aprendentela en casa, ya tien una emotividá especia.
Los buelos tresmiten la llingua, ya eso faila tener una dulzura encantadora. Una amuesa, esta esbilla
La buela María
balincaba'l bierzu
ya con voz mui nidia
cantába-y al nietu
Durme, rayiquín de sol,
durme, paxarín parleiru
que toos los paxarinos
ha muito que tán durmiendo.
Ya'l nenín abría
inda más los güeyos.
La buela María
mirando pal nenu,
chamába-y florina,
chamába-y l.luceiru,
mientras balincaba
con amor el bierzu.
Durme, brisina de branu,
durme, calorín d'iviernu,
que ya pa dormir la nueite
ya'l día pa tar despiertu.
Ya'l nenín quedouse
dormidín nel bierzu.
Nené Losada Rico, Poeta Valdesana.
(la nietina númaru doce)
N'Uviéu nel mes d'abril
nacíunus outra nietina,
cunus güechus azulinos,
sunrusadina, guapina.
Dicen que la nuesa Irma
yía una rousa piquinina,
un clavelín, una prenda,
un sol, una papulina.
¡Ay! ¡Quién pudiera vulare
cumu fain las palumbinas
pa da-tsi muitus beisinus
na sua furmosa carina.
En Palacios del Sil, el día 25 d'abril de 1987, de Eva González Fernández (1918-2007)
Quixera ter el canto
del más bello querubín
pra cantarye á mía nena
qu'hoi nun se quere dormir.
Nun chores, nena mía,
qu'a lúa lougo sale
y ta velándoche el sono
con ternura a túa madre.
Cuatro anxelíos te cuidan
mentres che canto esta añada.
Dúrmete tesouro meu,
que xa chega a madrugada.
Reló, nun marques más horas,
nun quero oír ningún ruido,
qu'a pequenía da casa
esta noite ta dormindo.
Ana Vior (Lantoira, Castripol 1920- A Veiga 1998)
Nun durmas, nenín,
nin peches os oyos,
qu'el coco y as bruxas
llevan solo a os tollos.
Nun temas al coco,
ás bruxas y al demo,
qu'esos sonche bromas
pra engañar a os nenos.
Nun durmas, pequeno,
berra conto poidas,
espernexa y grita
y si queres chora.
Mais si te durmes
meu neno pequeno,
pode que te lleven
as hadas ou el demo.
A noite ta moura,
ximen os carbayos,
el vento y a lluvia
turran nel teyado.
Tou padre durme a cachos,
túa madre fai que durme,
el can ladra ás sombras
chuvisca no llume.
El vento rebinca
por entre el payeiro,
xoga con a paya,
¡chegóu el inverno!
Nun durmas con medo,
meu neno pequeno,
qu'el demo nun lleva
a os neíos buenos.
Francisco Fidalgo Villaveirán (Valdepares, El Franco 1913- Uviéu 1998) pa las fiestas de Santiago de Bual, 1988.
A min, personalmente esti tipu poesía prestame asgaya. Ía una pena que, col gobiernu d'Areces, refúguese una vuelta ya outra la llingua, perdiendo Asturias, los asturianos ya tol mundiu, finalmente, esti tesoru.
Labels: Lliteratura
![](http://www.alianzo.com/ranking-blogs/boton.php?url="htpp://www.munduxaime.blogspot.com")
