27/11/2008

 

MONOGRÁFICU: ASTURIAS YA AMÉRICA (por X.M.L.)



Nengún continente tien tanta rellación con Asturias cumo América, si esceptuamos Europa, África ya Asia. (Ya si lleemos LNE Oceanía tamién).

La güelga del pueblu asturianu yía fonda, somos parte del ciernu de la identidá americana. Pa entamar, numái hai que ver la cantidá d'asturianos qu'hai nel panorama social americanu, n'especial pola dereichona. Pienso n'Alan Garcia, Vicente Fox, Gloria Estefan... pero tamién pola izquierda, Bill Richardson, Cristina Kitchner... bono, Fidel Castro yía de la raya... Ya esqueizo los que nun traigo a la memoria, pero que tamién son pintorescos.

Pero tamién América marcóu a Asturias. Dende las fabas, a las patacas, pasando polos tomates. Ya'l chicolate. Ya'l tabacu -pa quién lo fume-.

Ya la figura del Indianu, del "Américanu" ya del "Americanu del Pote". Buah, personaxes qu'inda quedan ya revolucionanon la aburrida Sociedá Asturiana dende qu'entramos a pertenecer a Castiella nel 1388. Gracias a los americanos, Asturias mola más.

Mesto de la cultura Astur-Americana sal l'AsturEnglish nos EEXX, eso que dicen "Speaking to my güela", sobre too pa West Virginia,ya tamién l'estereotipu d'Astur-Norteamericanu que semeya Pedro Picapiedra. Pero sobre todo nacen los centros asturianos, unde se bebe sidra, se xuega a los bolos, se toca la gaita ya se bailla ya faise cultu a la Santina de Cuadonga.

Nun faléi de la Santina de Cuadonga hastasagora, pero dicir que nun principiu nel Oriente d'Asturias esistía un Cultu Paganu, a un bóvidu, la llamada "Vaca Gaitera". Col cristianismu, sustitúyese la Vaca pola Santina, pero sigue siendo un cultu mui folclóricu, folclorizáu.

Nun séi si m'esplico.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 2:16 pm 0 comments
 

LA EDÁ MEDIA VEI TERMINANDO YA DESCUBRESE AMÉRICA



Bono, dende 1388 hasta 1492 nun socedéu gran cousa n'Asturias. Foumos pouco a pouco acabando dellas obras públicas pol país. Traigo a la memoria la Catedral d'Uviéu.

En Castiella houbo una guerra ente castellanos ya cumo a nós eso nun nos importaba muncho nun participamos. Bono, dalgún asturianu sí que participóu, pero porque-y pagaban a parte.

A partir de 1388 entaman a venir a vivir a Asturias élites castellanas, sensatas ya cola cabeza bien amueblada. Qué séi you, curas navarros, filólogos salmantinos ou filósofos rioxanos. Pa dar más color a Asturias.

Bono, nel 1492 nun pueo deixar d'omitir que Colón -nun yera asturianu- descubre América, durante una "party". N'Asturias esi añu nun pasóu nada relevante, pero los asturianos que diban na espedición de Colón feixenon una espicha -la primer nel Nuevu Mundu- ya xuganon a los bolos por primer vegada n'América. Dizque una vegada n'América entruganon unde taban ya Colón nun sabía, pero un gallegu d'A Pontenova pidíu por favor que llamaran esa tierra América, n'honor d'una vaca que vendiera nuna feria en Grandas pa colar a América.

Bono, en 1492 paez ser que se funda el primer Centru Asturianu- Casa d'Asturies na Islla de la Española, al casar un mariñeiru d'Avilés con una nativa: touvienon dos fiyos mestizos que fonon los primeiros socios: Ún llamaba Xosé Nel ya l'outru Zapato Veloz. Puru mestizax.

Al tornar d'América Colón pasóu pol Puertu de Xixón pa deixar a los marinos asturianos, ya desembarcanon ya cuando los vienon nos sous pueblos... toos de blancu, col sombreiru ya'l reló de cadena d'ouru... ¡cá! Dixenon: "cuidadín, que somos indianos, andái con cuidáu". Ya feixenon xalés.

Toos menos ún de Grau, que paecía tuntu. Na sua maleta nun había nin puros, nin sombreiros nin cadenas d'ouru, nin novelas sorrealistas... colo qu'echanonlu de la villa, ya llegóu a Salas, unde vivíu feliz en Llaniu.

Na sua maleta había patacas, tomates, aguacates ya unas fueyas llamadas "tabacu"...

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 2:14 pm 0 comments

25/11/2008

 

EL CAMÍN DE SANTIAGO (DOCUMENTU)


Santiago fou un de los doce apóstoles de Xuasucristu. Predicóu pola Península Ibérica, ya morréu, entérranlo -cumo yera cristianu- n'Iria Flavia, Galicia. Durante la época na que predicóu los non cristianos en Galicia comían a los sous muertos, emprincipiando polas oureyas.

Los reis asturianos vienon negociu na tumba de Santiago ya inventanon un de los mayores chollos de la industria del turismu na Hestoria: El Camín de Santiagu.

Consistía nuna especie de ginkana na que los "penitentes" (d'ehí cuando te traen pa que pagues una factura coloquialmente entruguen "¿El penitente?") llamaos agora pelegrinos diban rondando por tolos pueblos ya faciendo un pouco gasto en toos. En Grau Tocinillo de Cielo. N'Ayande pote Asturianu. En Tinéu Fabas. En Salas cualisquier platu. Pero nun te lo perdas; bollinas en Corniana, ya bollu preñáu en La Espina...

Esta ruta gastronómico-espiritual revitalizóu la economía asturiana tres el desastre de la crisis romana, ya "europeizonos".

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 10:53 am 0 comments
 

EL REINU D'ASTURIAS (II) YA'L REINU DE LLIÓN (IV)



El Reinu d'Asturias fou una dómina hestórica que marca'l nacimientu d'Asturias cumo tala. Yía un tiempu nel cual se configura Asturias: entamase a mayar la sidra cumo n'actualidá, apaez el nome d'Asturias, entama a falase asturianu ya los asturianos descubren que'l tambor pega bien cola gaita.

Falábase asturianu tan bien, tan bien que nun había academia de la llingua nin nada paecíu. Yeran asturianos tan bonos, tan bonos que nun había Real Institutu d'Estudios Asturianos. Yera un pueblu feliz.

Cumo se dienon cuenta que vivían bien ya que daba capones cola barbilla a los mouros dixenon: "¡ei! ¿Ya por qué nun nos espardemos?" Ya dicidienon conquistar Llión.

Los asturianos llegan a Llión, ya apaláncanse. Cumo en Llión los praos son llanos, había unas farturas de la de mia madre, ya entaman a tomar más sidra ya más vinu qu'a guerrear.

Conque conquistan outras tierras, cumo Galicia ou Portugal, ya llegan hasta Vizcaya ya'l Dueru.

Hai un datu curiosu nuna provincia que llamaban nesos tiempos Vardulia.

Vardulia tenía una particularidá, un incipiente movimientu llingüísticu llamáu castellanista, que las élites inteleutuales llamaban "Bardulianu" (dicían que yera fala de bardos) ou "asturianu mal faláu". Manifestaba la llamada "Junta por la Defensa de la Lengua Castellana" polas cáis de Burgos ya sacaban una "Oca de la Oficialidad". Ente los sous lemas taban "Castellano en las escuelas" ya "Autonomía para Castilla". Por cierto, llamaban a Vardulia "Castilla".

Resulta que las autoridades llionesas de la dómina nun afloxaban, ya al final los castellanos -que yeran mui necios- acabanon mui cabreaos, ya llevantánonse n'armas; acabanon indepencizándose, ya cumo tenían muncho odiu dientro faza Llión, pueis derrotánonlos ya enguyenon con él Asturias.

Los asturianos taban indiferentes; pero los castellanos yeran un pouco chulinos, ya entós los asturianos dixenon "You más", ya llegóu Gonzalo Peláiz ya Doña Urraca ente outros. A los castellanos depués de tanta guerra fíxo-ys el culu "flo-flo" ya dicidienon llevase bien colos asturianos. Dixenon nel 1388: "Non, perái. Vamos facevos Principáu, ya dotavos de cuartos pa que montéis una Fundación qu'otorgue Premios a estremadas personalidades de la lliteratura, el deporte, las Ciencias Sociales, la Ciencia en xeneral ya la Concordia. Ya nun vais tar integraos en Castiella, caltendréis la vuesa Xunta Xeneral colos vuesos caciques ya opresores propios".

1388 fou un gran añu p'Asturias.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 10:50 am 0 comments

21/11/2008

 

Alcuentru de Pandereta Gallega y Asturiana



Pues yá sabéis, pa'l sábadu 29 Payares, si nun tenéis nada que facer, arimáivos hasta A Estrada ya esfrutái con esi convite, ési cumal pandereteiru-gastronómicu que xunirá un pouco más Asturias con Galicia.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 12:31 pm 0 comments

18/11/2008

 

DON PELAYO (ENTREVISTAS NA HESTORIA)


Don Pelayo, fora fíu d'un inmigrante visigodu ya una astur-romana, ya fou'l cumal del mestizax asturianu. Fou'l Rei del cambéu.

Entruga: ¿Qué pensóu cuando se véu eillí enribona, en Cuadonga, lluchando contra una potencia estranxera mundial, cumo fonon los mouros?
Rempuesta: Una inmensa satisfación, porque touve la oportunidá de defender Asturias; siempre pienso n'Asturias.

E: Dempués de trece sieglos, ¿Cúmo véi anguaño Asturias?
R: Uuuuui dempués de lo que s'armóu cola Reina d'España, nun vou facer declaraciones d'esti tipu, porque la opinión d'un Rei -polo menos n'Asturias- ha tar siempres controlada pol Parllamentu. Sacante, claro de la intimidá de la llariega...
E: Bono, pero por exemplu, ¿qué opina de las bodas gais?
R: Ai nin, you encantáu. De mano la Cruz de la Victoria fou suañada cumo un iconu de la llucha Gai. ¿Sabe vusté quien la financióu? El lobby gai del Reinu d'Asturias. Poro, cuando ví al Xeneralón Francisco Franco sacalla por Uviéu en Santu Corteixu chocóume: Por un llau, un actu de la miesma Ilesia que conderga la homosexualidá, por outru Francisco Franco, gai.
E: ¿Cúmo fou? ¿Franco Gai? ¿Qué yía qu'antes había gais?
R: Sí. De mano gran parte de la Monarquía Asturiana yera gai. Non, nel Reinu d'Asturias siempres houbo homosexuales. Eso sí, penábase a quien nun salía del armariu por indecencia moral. Pero yeran poucos los que nun lo almitían, ya amái la pena nun yera mui dura.
E: Vaya. Dixo vustéi que siempres pensaba n'Asturias. ¿Qué-y paez la situación del asturianu ya la sua posible non inclusión cumo llingua oficial na prósima reforma del Estatutu d'Autonomía?
R: Pos una vergoña mui grande. L'Asturianu ha ser oficial, cumo nel miou reináu. Mire una cousa, daquella nel sistema educativu del Sacru Imperiu ya del Reinu de los Francos, de Carlomagno ya eso los guah.es estudiaban, xunto col llatín obligatoriu l'árabe cumo primer llingua estranxera, ya munchos cumo segunda llingua estranxera coyían asturianu, porque asina venían a veranear al Cantábricu: el mediterraniu yera un mar más inseguru ya'l Cantábricu yera más cálidu.
E: ¡Qué interesante! Quedo ablucáu. Bono, entrando en fariña yá, lo verdaderamente interesante: ¿Sporting ou Real Oviedo?
R: Pero home de Dious, diga Uviéu, ho ¡UVIÉU!. Non, sou rei, toos son subditos míous. You solo sofitu a la Seleición Asturiana cuando xuega.
E: Nun quiero pechar estas palabras ensin entrugar pol mundiu musulmán. Fálenos de los Mouros.
R: ¡Quién los véi ya quién los víu! Non, en realidá una de las grandes mentiras que cuentan del Reinu Asturianu yía que nos llevabamos mal colos mouros. Mentira cochina. Durante'l Ramadán munchos mouros venían a prebar los nuesos embutíos, xamón, chourizu, butiel.lu, choscu... Nós viaxabamos tamién muncho a las tierras de los mouros, a por alfombras... Bono non, a por dellas drogas qu'eillí yeran llegales ya eiquí, pol qué dirán, non. En realidá había bon rollu, lo que pasa yía que por mor d'un prau fumos a la guerra.Desque cruzamos el Cordal -previo pagu del peax del Güerna- ya reconquistamos hasta'l ríu Órigu dímonos cuenta que'l prau nun yera de nengún. Vaya, por un prau.
E: Bono pos nun se fala con un Rei muertu tolos días... ya se sabe'l dichu, a Rei muertu, rei puestu. Conque si quier apuntar dalgo antias de pechar la entrevista...
R: Fou too un placer, ya solo dicir que los asturianos del sieglu XXI nun pueden, tienen la obligación moral de deixar Asturias pa que dientro d'outros XIII sieglos los asturianos que vengan sigan conociendo Asturias. Polo que nun han facer l'embalse Caliao, nun han contaminar cola Incineradora de Serín ya han caltener la esencia d'Asturias. Nós ficimoslo, ya hasta'l sieglu XxI inda se caltuvo Asturias. ¡Ai!, ya que por Dious nun quiten el peax del Güerna por nada'l mundiu. Ési han caltenellu, cumo cualquier monumentu del Prerrománicu Asturianu que na tua magnífica Hestoria d'Asturias nun mencionas. Un placer, ya más nada.

Labels: ,


# ¡Las cousas qu'acontecen nesti mundu! "Poro, la realidá soupera la ficción" Diestru @ 7:57 pm 1 comments
 

LOS MOUROS YA'L REINU D'ASTURIAS (I)


Buah, esta yía la parte que más presta de la hestoria d'Asturias.

Resulta que Mahoma fai apaición nel sieglu VII ya predica la fe islámica, ya la esistencia d'un únicu Dious, Alá. Los árabes, que yeran un pueblu qu'andaba de tres p'alantre pol Desiertu d'Arabia creciénonse, ya dicidienon salir del Desiertu d'Arabia ya propagar la palabra, unas veces polas bonas, outras non.

En pouco tiempu llegan a las península Ibérica ya, cumo los Reis Visigodos taban enfadaos ente ellos, aprovechan ya llántanse n'Hispania. Pero non n'Asturias, porque paez ser que nun yera Hispania. Ou eso ou que nun quixenon pagar el peax del Güerna.

Bono, los Mouros polo visto nun se llevaban mui mal colos ásturromanos, pero nun desllinde nel Conceyu Ponga, ente Ponga ya Castiella saltóu una chispa, ya los ásturromanos van a L'Infiestu a falar a ver que faen. Nesi intre, en Cangues d'Onís una razzia moura mata trés ouveyas: las rellaciones diplomáticas tornan áridas.

Entós el pueblu ásturromanu dicide convocar eleiciones, ya en 50 de los 78 conceyos asturianos gana un mestizu -mestu ente asturromanu ya inmigrante visigodu- Pelayo (yera'l Partíu Monárquicu contra'l Partíu Republicanu), que yía nomáu Rei. Pelayo diz: "Fáigase Asturias" ya a partir d'hai escomienza de verdá Asturias. Pelayu véu qu'Asturias molaba, ya dixo él "falemos toos asturianu", ya inventóuse esto del bable.

Cumo Pelayo entamóu a columpiase los mouros ficienon outra Razzia contra Asturias: coyenon una xata roxa "campeona", tresquilanonla ya pintánonla pinta, ya la xata claro, afogóu. Entós, cumo daquella la lleiche taba mal pagada ya los ganadeiros tiraban más pola carne, ante tal despilfarru Pelayo declara la Guerra al Islam.

Nengún de los dos bandos tenía munchas ganas de pegase, pero al final los mouros entranon n'Asturias, por A Veiga, ya los asturianos dicían, "buo, A Veiga, yá ves tu, eso nun yía nada". Llou aportanon a Tapia, ya los asturianos: "Home... ¡Navia! Bono, si aparan la cousa deixamosla asina" Conque los asturianos fonon deixándolo too hasta que lleganon a Cuadonga, ya nun había nin un prau que-ys dar más.

Entós feixenon la batalla de Cuadonga, ya cumo los Mouros yeran tipos cetrinos que nun llegaban al metru sesenta ya los asturianos facían desayunos ricos en fibra los asturianos gananon la batalla. Yía l'añu 722.

Eso fai que'l Partíu Monárquicu gane la mayoría d'eleiciones depués. Yía los que se llama "Monarquía Asturiana".

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 7:51 pm 0 comments

17/11/2008

 

LOS LLAMAOS AÑOS ESCUROS (MONOGRÁFICU)


Xusto de la que cai l'Imperiu hasta la llegada de los Mouros tán los llamaos Años Escuros. Yía una dómina na que nun apaecen n'Arqueoloxía construiciones ou restos de too tipu.

Yía porque nun amiran bien, porque habellos, hailos. Lo que pasa yía que cumo houbo crisis na dómina anterior contruyenon nos árboles; los humanos volvienon a los oríxenes, ya Asturias tampouco fou ayena a esa moda.

Sí, resulta que la vida volvéu tan dura que nun houbo más remediu que tirase al monte. Pero de xusticia yía dicir que los guah.es vivían felices d'aquella.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 3:54 pm 0 comments
 

LA ROMANIZACIÓN (II)


Los Ástures vivían placidamente nos Castros, que llenaban el paisax d'Asturias, dende Oriente hasta Occidente. Sicasí, un comandu d'Ástures-suicidas inmolóu nel nome de Belenos na redolada del Foru Romanu por una apuesta tonta, lo que llevóu al Senáu a votar a favor del unvíu de las Llexones contra Asturia.

Los Romanos, mui gayaspeiros, nun cuntaban invadir Asturia, porque paecía-ys una cousa que rompía la llegalidá vixente entrar nuna tierra ayena pola fuercia, magar que camentaban qu'había Ouru cumo pa enllenar el Circu Roma. Conque conquistan a güelpe Pilum tola Meseta Hispániensis ya llegan a Asturias.

En La Carisa las Llexones romanas faen la sua téunica mayestra, La Tortuga, pero a un intrépidu estratega ástur, llamáu Ladrillo-Tabiquero (los ástures ya los nomes...) ocurrese-y nun momentu de sobriedá echar la magaya la sidra na llende d'Asturias con Hispania, ya resulta que las llexones patinan, ya caen de güelpe morriendo la mayoría.

Conque Roma unvía al Carisu, que sí, gana n'Asturias la guerra contra Asturia, ya ármala mui gorda, produciendo un feixe de daños colaterales. Houbo una importante batalla en Nembra (Co. d'Ayer).

Afortunadamente los romanos instálanse n'Asturias, pero inda nun s'amestan cola población autóctona; sicasí los ástures deprenden la llingua llatina, ya añeden a la sua dieta la castaña.

Abandonan progresibamente'l cultu a la Faba Cósmica ya pouco a pouco van creyendo nuna secta Xudía llamada cristianismu, que sofitaba l'amor llibre ente homes ya muyeres, muyeres ya homes, homes ya homes ya muyeres ya muyeres. Colo que los ástures faense cristianos tamién.

Bono, los ástures ya los romanos conviven, ya col tiempu van paeciendose los ástures a los romanos ya los romanos a los ástures, asina hasta que llega la Cayida de Roma.

Sí, l'Imperiu Romanu vase al carayu tres la cayida bursátil del Monte Quirinal, qu'arrastra tolas Bolsas de Provincias. Amás los romanos aprovecharan nos años anteriores pa invertir nel llamáu Negociu Inmoviliariu, llenando l'Imperiu de Villas, Calzadas, Acueductos, Termas... Los romanos que vivían n'Asturia diciden nun marchar; primeiro taban feichos a la vida n'Asturias ya segundo nun tenían sestercios pa pagar el peax del Güerna. A too esto hai que dicir qu'Hispania recibe inmigrantes d'Europa, Visigodos ya Suevos, que vienen a trabayar pol efeutu del llamáu Suañu AsturRomanu.

Con too ya eso, cai Roma, pero Asturias sigui...

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 3:51 pm 0 comments

12/11/2008

 

Monográficu sobre los ástures

Los ástures fonon un pueblu indoeuropéu que prestaba a esgaya. Lleganon a Asturias ya afitanon na Tierrina.

Los Ástures proceden de las estepas d'Europa Oriental ya la parte d'Asia, talamente cumo outros pueblos indoeuropeos: celtas, xermanos, eslavos, latinos, Griegos, Viquingos...

Los ástures tocaban la gaita ya'l vigulín, ya cantaban tonadas. Adoraban a los xabalinos, ya'l sou preferíu yera un xabalín místicu al que llamaban "Calcetinos".

Sí, séilo: los ástures tenían un problema llingüísticu. Fou una de las causas que llevóu a los romanos a conquistallos: Ésti pueblu tenía una superioridá llingüística ablucante.

Sin embargo los ástures nun fonon un pueblu féliz porque las suas vidas taban vacías. Too cambióu cuando espichanon por vez primera ya prebanon la sidra....

Ente las suas costumes taba vivir en Castros, que yeran poblaos que llevaban subvención de la tribu, polo que toos vivían en castros.

Amás d'esto los ástures intentanon domar melandros, pero nun fonon quién ya entós tornanon llenos de frustración a los castros a beber más sidra.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 6:39 pm 1 comments
 

Dende l'Entamu (I)



Na edá de piedra no qu'anguaño yía Asturias vivían dos pueblinos: los proto-ástures que yeran humanos que taban por llamber ya los Neanderthales (los Homes del Sidrón). Atribúise-ys a estos últimos la invención de la sidra, al sentase una vieya sobre una bolsa mazanas ya aplastallas. Vivía en paz, pero touvienon una vegada griesca en Col.lanzo, (co. Ayer).

Más llueo llegóu vía Europa un pueblu indoeuropéu, que vivía nas Estepas de lo qu'anguaño más ou menos yía Ucraina.

Sí, resulta qu'en Crimea xuntanon tolos pueblos d'aniciu indoeuropéu, ya echanon a suerte la conquista d'Europa; a los ástures tocou-ys Asturias.

Cumo antias nun había protocolu, el xefe ástur -que llamaban "Ojo de Pato" (sí sona raru, séilo)- touvo qu'esperar pa tener un suañu, ya marchar pa eiquí. Ente los primeiros ástures escoyían pa xefe aquel que touviera más dedas nos pías. "Ojo de Pato" tenía seyes didas en cadún. Ún de los caudiellos más nomaos de la hestoria ástur llegara tener siete didas nun pía. Fou un llargu reináu de prosperidá.

Conque los ástures llegan a Asturias, ya acoyonan a los proto-ástures. Avéiran a los Homes del Sidrón, ya deprenden d'ellos el secretu de la Sidra; una vegada lo faen, garran las espadas ya matan a tolos neanderthales d'Asturias: colo que queda d'ellos faen una cordeirada.

Astures ya proto-astures cellebran la victoria con una espicha nel Val.le del Narcea; dalgún/a ástur casa con proto-astur; de la unión sal el pueblu vaqueiru. Pa conmemorar esta efeméride nel Val.le del Narcea faen vinu; ya nel restu d'Asturias faise sidra un añu sí, un añu non; un añu sí, un añu non, un añu sí, un añu non...

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 6:36 pm 0 comments
 

HESTORIA D'ASTURIAS


Anda (ou anduvo, cumo'l chiste) estos días por Asturias un estudiosu del Nacionalismu Astur que cumo Obama tien la suerte de ser fíu del mestizax americanu.

Bono, a lo que diba. Esti rapaz yía un grande porque vien de tan llonxe a facer esti trabayu. Camiento que tien muncha moral. Ou tar mui folgáu. Ou a lo meyor en verdá sabe lo que fai... ¡vei saber tu con estos americanos!

El casu yía qu'hai que ser agradecíu con esta xente. Cumo tien pinta bon rapaz ya eso, pueis cuido que teo que-y aídar un pouco ya vou facer por él, esplicando-y un pouco d'hestoria asturiana nestos cuatro capitulos de la Hestoria d'Asturias que vienen darréu.

¿Nun diz el dichu qu'en Salas nun hai foranos?

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 6:34 pm 0 comments

05/11/2008

 

Hamilton ya Obama: Trunfardores.


Ganóu'l mestizu. Teo que reconocer que toi arguyosu, porque'l miou buelu yera tamién mestizu: de pái vaqueiru ya mai asturiana.
¡¡¡Pol amiestu racial!!!
Pd. Tamién esta selmana ganóu Obama las eleiciones a la presidencia d'Estaos Xuntos. Estos días falamos más.

Labels: ,


# ¡Las cousas qu'acontecen nesti mundu! "Poro, la realidá soupera la ficción" Diestru @ 11:25 am 0 comments

03/11/2008

 

"¡McCain, McCaín...! ¡¡¡Obama, Obama!!!"


¡McCain na tua mai, neñu! yía una de las consignas que más sonan güei nos Estaos Xuntos, ente las mais de los distritos demócratas, cumo West Virgina, cuna del asturenglish.

Pueis los Estaos Xuntos tán estos días d'eleiciones, ente'l Senador Obama (paez gallegu, pero yía Obama, non O Bama); que yía prietu, tipu Hamilton (pero pouco, ¿eh? -yía caféi con lleiche llargo de café); ya'l empresariu de la pataca (lo qu'a los asturianos pue imprimir más confianza) ya de nome tamién célticu, McCain.

De mano los asturianos tenemos dos senadores con nome asturianu, ún más de pa la mariña ya outru más de pa contra Galicia, asina qu'esto podía ser las eleiciones asturianas. Ún paezse más a Hamilton, yía verdá, ya McCain a Fernando Alonso.

Pero ¡cá! A min Obama más qu'a Hamilton paezme al xugador de fútbol Yago, qu'amái ta casáu con una Vaquera de Salas ya xugóu nel Oviedo ya na seleición asturiana. Vaya, yá m'imprime más confianza.

McCain yía blanquín, todos sabemos que los blancos somos la raza superior, porque nos blancos tán tolas razas: Cuando trabayamos muncho somos negros, cuando tamos cerca la muerte, mariellos; cuando tenemos fríu más blancos, cuando facemos un esfuerciu, más coloraos, si comemos una llacuada, moraos, cuando llegamos a vieyos, verdes...

Yía la gran ventaya de ser blancos.

Anque agora que lo pienso: Obama yía siempre negru. Pa un asturianu por enriba la flexibilidá ta la neciura. Obama, cumo'l color negru yía más sufríu yía más neciu, sabemos que nun vei fallanos. Arriendes d'ello, Obama yía un poucoñín blancu ya un poucoñín prietu: pa las duas comunidades. ¡Vaya ho! Puntín de llargu pa Obama.

McCain yía'l gran xefe de las patacas, pero apuesto que nunca sacóu una. Yía más, siempre sal na xanta comiendo hamburguesas, salchichas ou outru tipu d'esllava. Obama vese-y que na sua familia sí-ys tocóu dir a las patacas. Ya a Obama prestá-y la bona comida, la Bèlle Cuisine Française... Tien más clas ya estilu. Puntu pa Obama. (Si proba los frixuelos ya'l arroz con lleiche... porque tien pinta d'asturianu).


Ta claro. Obama da confianza. Obama yía más asturianu que McCain. Obama Prúi. Votái pol cambéu, votái por Obama.

Puxa Obama!!! (Ai, quién fora de Florida ou de West Virginia pa votar al senador Obama....)


http://www.wvculture.org/goldenseal/fall07/films.html

Labels: ,


# ¡Las cousas qu'acontecen nesti mundu! "Poro, la realidá soupera la ficción" Diestru @ 12:13 pm 0 comments

This page is powered by Blogger. Isn't yours?