31/12/2008

 

Nueiche Vieya 08/09

Que nesta nueiche coyáis tola enerxía ya tola allegría ya l'humor pa entrar nel 2009 con tola fuercia'l mundiu... ya recordái que na cena de los cabezaleiros políticos asturinos güei puenen-ys llingua estofada, criada al abellugu d'una llinia d'alta tensión!!!

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 11:52 pm 2 comments

30/12/2008

 

¿Qué pasa cuando tiras un pedu? (Ou la Llingua ya la Financiación autonómica)




Claro, que lligando esta entrada col tema l'anterior siempre pue pasanos cumo a esi señor tan bien llantáu ya d'aspeutu seriu, que tirara un pedu nun ascensor, unde había un mozu.

-¿Pero vustéi tiróu un pedu, señor?

-¡¡¡Claro!!! ¿Ou igual camienta que you güelo siempres asina?



Pa mia idega dalgo paecío-y pasa a Fernández, de nome Javier, ya profesión Secretariu Xeneral de la F$A ya de convinciones Xacobinas ya credu antibablista.

Resulta qu'el probín yía cumo l'home del pedu, tien una reputación, ya tien que la caltener. Anque caiga nel ridículu. Porque a Touriño ocurríuse-y meter la oficialidá cumo escusa pa pidir en Madrid más perras. Os Cartos. Ya los socialistas asturianos tienen un pequenu problema col tema de la oficialidá. Dicen qu'anque nos cueste dineiru, qu'ellos van siguir col sou puntu de vista sobre esta materia.

Claro, negocian colos gallegos la financiación autonómica, ya bien pouco los conocen, nótase. Colos gallegos solo se pue falar de gaita, nunca de perras. Os Cartos. Porque negocian, negocian. La Ilesia en Galicia mandaba muncho, ya los gallegos piden que tal paecen flaires. Habíamos deprender.


Bono, outra vegada más rescampla'l tema llingüísticu d'Asturias. Yía verdá que la xente de la F$A vei tener un problema con ello. Teo que dicir qu'a min préstame, porque total, si quedamos ensin cuartos, you vou siguir igual escribiendo n'asturianu'l blogue. Por eso un paséis miéu, pero bono. Yía una pena. Guapa vegada pa matar dos páxaros d'un tiru, oficialidá ya pa enriba cuartos.


Hahahaha..... Pero non, quedaremos ensin dereichos ya ensin Os Cartos. Yía más, cumo hastasagora siguiremos cola normalización esta gastando perras pa que nun lluzca un migayu, pa nun se traduza en dereichos. ¿Daquién entiende dalgo?



Por cierto, güei entruganon a Javier Fdez. por esti tema ya dixo que nun falaba. Ta enfadáu, porque pa Nueite Vieya van poné-y de cena llingua estofada. Ya de segundu, pita. Ese es el colmo de Javier Fernández.

Labels: ,


# ¡Las cousas qu'acontecen nesti mundu! "Poro, la realidá soupera la ficción" Diestru @ 9:09 pm 1 comments

29/12/2008

 

Votación meyor blogue 2008



Un pedu, mal tiráu, pue afundir nun momentín una reputación bien ganada n'años.



Reflesiono nesti especial Navidá 2008-09 sobre esti tema porque salíu una propuesta na asturblogosfera pa escoyer al meyor blogue n'asturianu nel añu 2008. Yía de xusticia dicir que cumo siempre estas cousas tienen el sou aniciu nel equipu que forman Tin ya Xulio, Trayasgaya, dende Llangréu (el conceyu de la Cuenca que nun ye Mieres; quier dicir, l'outru).

Conque a min convidánonme pa que votara ya feixelo. Cumo nun sou Carlos Rubiera nun me votéi a min miesmu. Non. You votéi, nel primer llugar a Ensinrefaxu, que siempre tien entradas interesantes; llou a la AsturianWeird Foundation, porque esi blogue llégame a las coradas, ya amái entiéndenme bien.

Claro, agora van entender la cita del empiezu. Nel tercer llugar votéi pa l'AsturiesLliberal.



Nun me malinterpreteis. Votelos pa lo de los blogues. Votelos porque sou del Occidente d'Asturias; d'una Asturias na que'l P$OE gobierna dende las Cuencas Mineras ya las grandes ciudades unde negaban l'idioma llariegu, ya inda niegan derechos a los sous falantes (véase la entrevista en Les Noticies a don Fernando Lastra Valdés, cangués de Cangas del Narcea pa más señas).

Nel Occidente teníamos (y caltenemos) a los políticos más anti llingua de toda Asturias, n'especial los que van nel P$OE. Ya na vecina Galicia de nuesu amor la derechona gallega tiraba pol gallegu, el idioma de sou. You reconozo que dende guah.e quixe ver un PP cumo'l gallegu, nel aspectu llingüísticu. Foi una vieya aspiración.

Agora, la sua interpretación del estáu de derechu, la sua visión económica, unde los más ricos han facese más ricos ya los probos apretar el cinchu inda un poucoñín más, el sou conceptu de sanidá ya educación en manos privadas; el sou marcáu confesionalismu ya, en fin, la sua llinia política... ¡Dious nos ampare!

Colo que, por una vegada, ya anque numái sía eiquí, you votéi a AsturiesLliberal, en reconocimientu a un vieyu caprichu de guah.e.





Pa munchos asturianistas oficialmente you sou agora secuaz del Partido Popular, por eso cuidéime de nun actualizar ayeri, día de los Santos Inocentes. Porque vei mui en serio. Esto nun yía una inocentada.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 3:30 pm 3 comments
 

Fin d'añu 2008


Acabase l'añu 2008, ya nun quería deixar ensin felicitar los nadales... Asina que nada, felices fiestas pa todas ya toos.


Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 3:23 pm 0 comments

19/12/2008

 

Fernando Lastra, en Madreña picada




¿Qué tendrán las albarcas que tanto gustan a los políticos? La verdad, es que no lo sé. Hace unas semanas salía en un programa de televisión, en La Sexta, el presidente de Cantabria, e iba en "albarcas". Decía que era el calzado típico del campo de Cantabria, y además de Asturies. ¿Por qué los cántabros siempre se acuerdan de Asturies y los asturianos nunca de Cantabria -aunque sea la Provincia de Santander?



Conque yá n'Asturias, las madreñas -nós dicimos asina, a nun ser pal occidente unde falan gallego-asturianu, entós son "galochas"- tamién marcan a los nuesos políticos.

Tengo na cabeza a Fernando Lastra Valdés, que cuando tien que falar de llingua asturiana ponse malu. Polo menos esa impresión da esta selmana na sua entrevista nel selmanariu Les Noticies.

Resulta qu'a Fernando dienon-y el madreñazu pol sou llabor contra la llingua asturiana, él ta en contra. Si la llingua ta nuna posición mala, él cuida qu'inda pue tar peor, ya vei facer por ello. Colo que Madreñazu 08 pol sou llabor pol desaniciu.

Pero lo que nun tien esperdiciu yía la entrevista que-y feixenon. Atendéi:

Entruga: "L'Estáu español tien firmáu col Conseyu d'Europa una Carta de les Llingües Minoritaries, qu'inclúi expresamente a Asturies, a la llingua asturiana y al gallegu-asturianu. El Conseyu d'Europa, mediante un informe, ta acabante avisar al Gobiernu español que los ciudadanos asturianos nun gocen d'unos derechos llingüísticos que sí s'esfruten nel restu del Estáu".

Rempuesta: Ye una opinión del Conseyu d'Europa que yo matizaría. Yo nun duldo que se puedan facer más coses pola llingua asturiana. Nun lo duldo. Amás, dígolo claramente: si se pueden facer más coses, hai que facer más coses.

¿Entós?

Entruga: "¿Usté piensa realmente qu'Asturies se pue permitir nun planificar la política llingüística d'equí a venti años de manera que la llingua asturiana y el gallegu-asturianu puedan perdurar como realidaes sociales? ¿Nun se trata de preservar p'Asturies, pa España y pa Europa un bien cultural y social como ye l'asturianu?"

Rempuesta: Ta faciéndome una pregunta que nun tien nada que ver colo xurídico. La respuesta que-y puedo dar ye que deberíamos facer más. Ye igual que si me pregunta pol prerrománicu. Nun quiero falar en términos antropolóxicos, sinón en términos xurídicos.

Jo, nin. ¿Entós?

Bono, you nun teo palabras, colo que recomiendo que llean na páxina www.lesnoticies.com la entrevista íntegra.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 3:58 pm 0 comments

11/12/2008

 

ENTREVISTA A XOVELLANOS


N'Entrevistas na Hestoria tenemos güei con nós a ún grande, al políticu asturianista Gaspar Baltasar Melchor Xovellanos, que tien tolos nomes de los Reis Magos.
Pregunta: Buah, Primeiro de todo, dicir qu'esto pa min yía too un acontecimientu, tener eiquí al gran Xovellanos, un pouco'l pái de l'Asturias moderna. Un crack, vaya, una persona almirada pola xente d'izquierdas, dereichas, asturianistas ya Sensatos. Un gran honor facer esta entrevista. Bono, entamo.
Vusté cumo padre de l'Asturias moderna, ¿cúmo vei'l país anguaño?
Rempuesta: Bono. En dellos aspectos el país meyoró, cierto. Comparando cola dómina de mio, dicir qu'anguaño hai agua caliente, que da gustirrinín, y tamién lluz eléctrico, que presta asgaya y da muncho xuegu. Cuido qu'agora, efectivamente, vívese meyor. Arriendes del agua y la lluz eléctrico hai muncha variedá na comida y la sidra pue qu'hasta sepia meyor...

P: Hahaha, claro, vusté ye home de tomar sidra... ¡Pensé siempre que por aquello del protocolu vusté bebía vinu.
R: Bebo con muncha moderación, igual me da vinu (sía asturiano de Cangas o un bon Ribera del Duero o d'ú seya) que sidra. Na vida hai que prebar de too. Y cuando digo de too, quiero dicir qu'hai que prebar de too... ¿Soi lo suficientemente esplícitu?
P: Psíiii... Bono con un asturianista hestóricu como vusté ye imprescindible entrugar pola llingua... ¿Qué-y paez lo referente al idioma?
R: Home, l'asturianu ganó dende los mios tiempos nunes coses. N'otres, pues cenciellamente non. Por exemplu, agora hai meyores escritores, como Xuan Bello, Berta Piñan, Antón García o Roberto González- Quevedo, ente otros munchos. Tamién presten los grupos de música que canten n'asturianu, magar qu'ente la xente de la cai perdérase'l vezu de cantar, o el costume del baille. Xente que xuntó en verdaeres andeches que ficieron un trabayu cola llingua candial... Radio Sele (bono, nos mios tiempos nun s'inventara'l radio), el diariu Les Noticies -pela mio dómina nun s'estilaba la prensa cásique- ou otros; ente ellos el suañu de mio, l'Academia de la Llingua Asturiana... una institución pernecesaria nun país d'Occidente, nel sieglu XXI que quiera caltener de xeitu afayadizu la llingua y la cultura de so...
Pero lo que vien siendo la cai... la cosa ehí perdió, baxo un pocoñín. Non tanto como podiera pensase, pero nos mios tiempos entá se falaba un poco más asturianu. Hai que facer porque nun se perdan falantes, por caltener vivable l'idioma.
P: Ye curioso, la xente que mos gobierna n'Asturies, dende la Transición vien ñegando l'idioma per un llau tanto non faciéndolo oficial como nun usándolu, pero per otru llau gasten dineru abondu nun proyeutu p'Asturies nel que se cuenta y se fai pol idioma y poco a poco facer granible la cultura asturiana... ¿Ye chocante?
R: ¡Ah! Sé per ú quier dir. Nun piense, yo soi de lleer el so blogue... sí, sí, toi al tanto de too lo que socez n'Asturies. Claro, un problema que tien la nuesa cultura (y meto dientro l'idioma) ye qu'esiesti un claro amiestu, un automáticu diría más bien, empate ente "llingua asturiana" y "nacionalismu escluyente". Asina, creese nel imaxinariu -nel de ciertes persones bien dañines- qu'una equiparación ente la cultura del pueblu (nel casu de so, nel so conceyu ente vaqueiros y xaldos, ¿acuéi?) y la elitista que gasten y usen como marca diferencial, pa digamos xebrar como'l pregueru, el rebañu. Que la cultura obrera seya equiparable en derechos a la del "establishment" pue ser engorrosu pa esa élite. ¿Nun cree? Yo, nel casu de mio, pueo dicir que nunca tuve complexos. Yo eché-y carayu y llanté delantre de Xovellanos pá y dixe-y "Tanto me gusten les muyeres como los homes". Y puntu.
P: (Asombru) Vaya. Pues eses élites son les que lu afalaguen nos sos discusos, llévenlu a vusté siempre d'obleru na guiyada... nun sé si sabe... los presidentes, los sindicalistes y empresarios d'Asturies quierenlu muncho.
R: ¡Pues habíen saber que yo toi cola llingua! Y una cosa digo: Yo nun soi nacionalista. Nun lo fui nunca y nun lo sedré. El nacionalismu, seya asturianu, vascu, español o francés ye siempre un amestu ente mieu, odiu, frustración, complexu d'inferioridá y resentimientu qu'a min, francamente dame noxu. De mi dizse que fui un "gran patriota español" y un "gran asturianista"... Non, non, non. Tocome facer la vida per dayuri, y trabayé pol bien común siempre, pero yo nunca nun fui nin asturianista, nin españolista nin siquier monárquicu... Amás identifícome con Albert Plá.
P: Vusté sabe qu'esti blogue ta tildáu de "Nacionalista" por dellos usadores d'internet que tienen parao per equí...
R: ¡Unos ignorante! ¡Faltosos, ignorante y vagos intelectualmente! Nun faiga casu, tala xente ye cobarde, tien complexu d'inferioridá y resentimientu. Son los primeros.
P: Calle, calle, por favor, que va quitame la clientela...
R: ¡Ei!, a callar, que pa eso yo soi Xovellanos.
P: Bono, val. Pero por exemplu, ¿Qué opinión-y merez el Presidente Areces?
R: Non, yo soi más d'Ovidio. Hahaha, non, yera chunga. En realidá Areces ehí ú lu ve ye un gran asturianista. Tanto Ovidio como Areces de la que van adeitase piden por min, pola llingua y pola nación asturiana. Dambos falen nes sos cases siempre n'asturianu, lleen llibros n'asturianu y escuchen muncha música na llingua. Ovidio ye más roceanu pa col gallego-asturianu, magar Fraga defendiera'l gallegu en Galicia, pero yía porque Ovidio tien un problema d'adeprendizax. El que nun ye de la llingua nada ye Jesús Iglesias; bono ési nin siquier reza, pero ta ehí por disciplina de partíu. Xuan Xosé ye así asá, nun se crea que ta mui pola normalización de la llingua, ya Rafa Palacios sí. Rafa Palacios reza toles nueches abondo. Pero en llatín.
P: ¡Wow! ¡Qué interesante! Ye una pena qu'esta entrevista -pa min la más interesante que se fizo nunca nun blogue en llingua asturiana y que se fizo en xeneral nun blogue n'Asturies- tea que finar. Pero ye qu'a quién llea esto va a cansase-y los güeyos. ¿Quier apuntar dalgo pa rematar?
R: Nada, el placer foi míu. Tengo que remarcar que ye la primer entrada que fizo nesti blogue n'asturianu guai, tipu referencial... si me lo permite ha contenstar, por curiosidá per mio parte, ¿cómo-y dio prehí?, colo guapo que ye'l so dialeutu vaqueiru... P: Ai, paecióme bien. Ún nunca nun tien enfrente un prócer del pueblu asturianu (Xovellanos fai un bliecu), perdón, un ilustráu que miró pola cultura llariega tan menospreciada tantes vegaes, y prestábame facelo col asturianu referencial, más cultu, pol que vuste naguara nel so tiempu. Sirva d'homenax... Almítame tendé-y la mano.
R: Munches gracies (apurriéndola). Un día quedamos pa xugar un cinquillu. Entós más nada.

Labels: ,


# ¡Las cousas qu'acontecen nesti mundu! "Poro, la realidá soupera la ficción" Diestru @ 2:08 pm 2 comments
 

VII- FRANCESADA YA SIEGLU XIX (I)


Resulta que los Borbones faense col control del Imperiu, ya centralizan España ya tol Imperiu; colo qu'esfarrapan l'Imperiu ya dan nacencia a los nacionalismos, ya gracias a eso you tou faciendo esta Hestoria d'Asturias, ya l'Americanu ta n'Asturias estudiando sobre'l nacionalismu asturianu. Gracias a los Borbones ya al sou centralismu, que fundíu un Imperiu nel que "no se ponía el sol".

Conque los Borbones fonon mui p'allá ya deixanon que los franceses invadieran España. Ah, por eso'l Cuervu siempre tira pa la pena que-y víu nacer, que dicía'l vieyu.

Napoleón ya Francia invaden Europa menos Gran Bretaña ya Asturias, qu'arresisten con brenga. Napoleón tenía rabia a los ingleses pola sua ironía, que Napoleón nun tenía. A los asturianos cenciellamente Napoleón daba-ys igual, pero Napoleón, na Nueiche Escura, decretóu zarrar milenta chigres ya bodegones a partir de las cinco la tarde. Nel restu del país decretóu toque de queda.

Los Asturianos taban sobrios ya ociosos, ya pa un asturianu nun hai peor cousa. Asina qu'alcuerdan matar franceses, porque estos amái embargan el comerciu sidra asturiana col Imperiu Británicu (los franceses son más de vinu) ya prohíben la gaita, pensando que yía un arma de propaganda anglosaxona. Ya los asturianos revientan.

Bono, nestas apaez Xovellanos, que yera un politicallu que nun rascaba una, ya funda'l Nacionalismu Modernu Asturianu. Sí, cueye la Cruz de la Victoria, ya fai la primer bandera gai de la Hestoria, l'Asturiana. Fou intelixente, d'una cruz feixo una bandera, ya cumo non toos podían tener nel xarré nin nel balcón la Cruz de la Victoria, tenían la Bandera Asturiana.

Por mor de las élites "Bienpensantes y Sensatas" n'Asturias falábase "Amestáu", pero Xovellanos dixo "ai mamina. A estos hai que-ys poner una Academia de la Llingua, pa qu'adeprendan a falar bien. ¡Ya hai qu'iguar la toponimia!", colo qu'a partir de Xovellanos anicia l'usu de topónimos castellanos; fou una cousa psicolóxica, tornanonse al castellanu p'agora tornase, dos cientos años depués al asturianu. Ya al Gallego-asturianu. Esto vei pal estudiosu norteamericanu. Los asturianos somos asina. Total, paga Madrid...

Bono, derrótase a los franceses ya échase-ys, ya Fernando VII prometéu aprobar un estatutu d'autonomía p'Asturias, trayer la democracia ya'l sufraxiu pa toos/as ya vacaciones pagadas en Perlora, pero al final nada.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 2:05 pm 0 comments

08/12/2008

 

La Renovación nas filas del PP

Tres de las pequenas cousas tán los grandes placeres. You al menos, atoupo ún de los grandes placeres en desayunar una taza de caféi feicho "a l'antigua", unos croissants ya... la prensa.

Asina, esti sábadu mentres lleía Les Noticies salía una entrevista a Aréstegui, un cabezaleiru del PP. Avilesín, yía la versión pepera de don Fernando Lastra. Joaquín Aréstigui, amás, siempre me recuerda a los tratantes de Tinéu ya Salas, cuando se xuntan nas ferias, que séi you, en San Pedru de Maicina ou en Salas ou en La Espina.

Diz "El Tratantón" que del congresu del PP ganóu la renovación. ¿Cuála? Pa qu'haiga renovación tien que camudar la xente que taba antias ya que, pa esti casu, llevan trés llexislaturas perdidas.

Pues nel congresu del PP non. Falan de renovación, pero tán los miesmos... A nun ser qu'agora vistan a Ovidio Sánchez de torero ya a Jaime Reinares de Charlot peime que vamos ver lo de siempres.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 6:56 pm 1 comments

05/12/2008

 

Monográficu: Las Misiones Evanxelizadoras


Pos sí. La cousa yía que n'Asturias calecéu'l tiempu del sieglu XVI hasta'l XVII, dambos inclusive, ya los asturianos diban prehí en porrica ya fornicando pola escura viesca, con tola qu'había. N'Asturias afitóu vien la causa ya'l sentir del Coleutivu Gai, ya munchos nobles ya curas del restu del Imperiu diban a la viesca asturiana a fornicar llibremente, porque nun taba mal vistu, nin ente la xente nin pola Res Llariega.

Conque la Ilesia Asturiana yera la primera n'apuntáse. Resulta que n'Asturias había problemas más importantes d'aquella que si a Pin-y prestaba Lin, ou si Nel quería tar con Falo ya Tuxa na miesma nueiche, que yera la muyer de Falo. Sí, Pin, Lin, Nel, Falo ya Tuxa tenían más moleición pola industria llechera, que nun la deslocalizaran col Imperiu, nin -nel casu de Nel- la industria de la construición Naval, en Xixón. Tamién querían la viesca llimpia pa poder enredar ehí al sou aire.

Sicasí, en Madrid tenían outros planes. Llevar la construición de los barcos a outras tierras, cumo pudieran ser plazas africanas, ou la lleiche a los Paises Baxos, que yeran parte del Imperiu, ya producían más baratu. Ya por supuesto, unviar a Pin, Lin, Nel, Falo ya Tuxa a la Ilesia, por cuenta la Viesca.

Bono, básicamente eso fonon las Misiones Evanxelizadoras. Que del murniu Madrid vinieran joder a los asturianos... .. .

Labels: ,


# ¡Las cousas qu'acontecen nesti mundu! "Poro, la realidá soupera la ficción" Diestru @ 5:58 pm 2 comments
 

IV. DENDE 1492 HASTA LA FRANCESADA



Nel sieglu XVI Fernando Valdés-Salas abre la boucona ya xube'l pan. Pa compensar fai la Universidá d'Uviéu.

Un escolín d'estos de categoría, que se sienta p'alantre del too, gasta lentes ya peináu d'estos que dan a ún confianza ya tien voz aflautada cueye cumo asignatura optativa Asturianu. Yía Antón de Marirreguera, ya escribe los primeiros testos n'asturianu rajando contra'l sistema. Si daquella houbiera Internet fadría un blogue llamáu "MunduAntón", "Antón diz", "El Trasgu d'Antón", "Casos que m'asoceden" ou "TraigaMansalva", pero cumo rede nun había...

Bono, nel sieglu XVIII naz en Colunga Agustín Bernardo de Pedrayes, que yera matemáticu, ya va ya inventa'l metru. A los dos sieglos dedican-y el "I DÍA DE LES CIENCIES ASTURIANES", porque claro, cumo tien pinta jarrachu nun val pal Príncipe d'Asturias póstumu, claro, cumo "yera del bable"...

Dare-ysvos cuenta que tou enrrollándome un pouco. Pero yía qu'hasta que llegan los franceses nun ocurre nada importante.

Bono sí. Eiquí, cumo taban cumo Cafres, la Corona de Castiella, por mediu de los Reis declaran Asturias cumo "Paxa Figos", que venía ser que los asturianos tabamos por civilizar inda. Entós dende Madrid propuénse unviar a Asturias "Misiones Evanxelizadoras", talo qu'América.

Sí ho, humildante, pero si por min fora inda las había. ¡Ya misa diaria pa dalgún que you séi!

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 5:47 pm 1 comments

This page is powered by Blogger. Isn't yours?