MunduXaime: ¡¡¡Crisis Manolín!!! Hai qu'iguar un Pautu de Gobiernu

24/09/2008

¡¡¡Crisis Manolín!!! Hai qu'iguar un Pautu de Gobiernu

¡Mau Carina! Nun m'algama nin pa echar gasofa al coche. Esti branu p'atoupar trabayu... vímelas. Nada que ver col añu pasáu. Sicasí you cumo siempres sou optimista: veo xente nos chigres ya nun me pruye entós nada cuando lleo la prensa ou siento'l radio falar de crisis.

Conque pol branu'l PSOE-F$A fou de la manina, neto que la fouguina, col PP ya pautóu un pre-estatutu p'Asturias. Un estatutu de Rexonal Preferente, ya hai segunda b.

You dicía, ¡cá! vei pautar F$A col PP pa gobernar n'Asturias. Pero nun se dióu.

Conque paez que p'asegurar unos presupuestos curiosinos pa facer frente a la crisis el gobiernín vei tener que pautar. Ya nun-ys queda outru posible sociu qu'Izquierda Xunida- Bloque por Asturies- Los Verdes. Colos del bable, que tamién yía mala pata.

Perdón. Nun quería dicir qu'esta coalición monopolice la llingua. Mal que mal la llingua tamién yía del PP del P$OE ya d'Andecha, UNA, Unión URAS-PAS, PLADETE ya si esqueizo a daquién, seipa disculpame.

Los d'IX-BA-LV son tremendos. Tienen la boucona... que tal paez que-ysla feixera un flaire. Cumo tol que tanto cuspe p'arriba la coalición glayóu nel sou momento que taban pola oficialidá a rabiar. Ya que nun hai más. Ya que nun-yslo quitas de la tiesta, nin eso nin lo de "Raul Selección"

Crisis haila. Ya depués d'una prórroga d'un presupuestu hai un presupuestu prorrogáu. Ya si agora van prorrogar un estatutu prorrogáu... demasiada prórroga, ya cuando nun partíu de fúbol faen siquiera una ya cansa bastante. Nun digo que nun haiga emoción, pero esa dende fora. Pa los asturianos que xugamos esi partíu... pufffffffffffffffff

Areces, Lastra & cía tán fartos dicir eso que gobiernan pa la sociedá, gobiernan en comuña colos asturianos, van fer d'Asturias un paraísu nel que teamos a la cabeza de dereichos (bono eso nun lo dicen, pero talo paez)... conque ¿vamos tar a mal por unos presupuestos cuando la mayoría del pueblu asturianu ta a favor de la oficialidá de la llingua?

¿Tanto odiu hai a la oficialidá, tanto supón cumo pa que'l gobiernu nun paute cola oposición pa gobernar meyor ya aprobar unos presupuestos que tanta falta faen?