27/06/2008

 

Asina tenemos la llingua


Huas huas huas.... ¡Patada a la filoloxía asturiana, ya con ella a la llingua!

Bono, pa quien nun lo seipa, esto ía lo que la xente de la F$A llama "promoción ya defensa ensin obligatoriedá", ou cumo dicimos pa Salas " a tomar por putu culu". El dialeutu salense ía muncho más espresivu, por eso que somos de pueblu...

Tengo munchos amigos que coyenon asturianu na Universidá... ai probinos. You garréi Alemán ya Castellanu, llingua. Cumo tol mundiu sabe, precisamente las llinguas de los países que ven xugar la final de la Eurocopa. Porque, cumo bien diz Félix Fernández de Castro López-Patiño, ilustre científicu de la llingua, hai llinguas más importantes unas qu'outras; qu'ía igual que dicir qu'hai pueblos ya razas más importantes unas qu'outras. Qué profundidá d'argumentos...

Conque resulta que, a too esto, dende la F$A dicen que prudencia, qu'hai que respetar la decisión, que fou tomada democráticamente mediante una eleición... cumo la eleición de Hitler n'Alemaña, nel 1933... ¡Cúmo se paez too! ¡Cuántas coincidencias! ¡Qué prestosu ía!

Que conste que, nesta situación tenía que sentime insultáu ya humilláu, porque amás nestos días rínse a la cara un pouco más, sacando un manifiestu en defensa del Castellanu, que truxenon cuando las votaciones a los Premios Principiegos (Somos "Principáu", cumo un reinu, pero en piquñín... bono cumo l'asturianu, ía una llingua pero en piquiñín) García de la Concha, el nietu de Caveda y Nava, ya esi inteleutual de pandereta, machista ya misóxinu qu'ía Sánchez Dragó...

Bono, pol castellanu eso ya más... namái tien 400 millones de personas que falan esta llingua...

Pero bono. Eiquí sacanon al asturianu de la facultá, ¿daquién dulda de la política de "defensa ya promoción del bable de la F$A"?

You sí. Vese bien que l'asturianu precisa promoción ya defensa, ía una llingua con un status ya una proteición mui feble, si na Universidá tien una presencia mui sonce, qu'a naide-y estrañe, ya agora inda más. Asina que, pa esto llevamos 30 años n'Asturias pidiendo -democráticamente- la institución d'oficialidá pa la llingua asturiana, porque ía l'únicu camín afayadizu pa la llingua... ya pueden ganar una batalla -siguiendo la terminoloxía militar que tanto-y presta a Don Gustavo Bueno- pero non la guerra...

Parafraseando al xeneral americanu McArthur, de la que lu echanon del Pacíficu: SALIMOS DE LA UNIVERSIDÁ, PERO VOLVEREMOS

Labels:


Comments: Post a Comment



<< Home

This page is powered by Blogger. Isn't yours?