31/12/2007

 

Adiós, 2007

2007, ALÓN



Acábasenos esti añu 2007 yá. Un añu guapu, por eso del "007". Pero eso namái na cultura occidental, ya que outros pueblos cumo'l chinu, l'hebréu ou'l musulmán rixense por outros calendarios distintos. Por nun falar de los países de relixón ortodoxa, tamién con outru calendariu distinto al nuesu.

2007 fou un añu d'inflexón. Fou un añu nel que houbo ralentización económica nel trimestre cabeiru, houbo n'Asturias el fin del "Tayuelín", el gobiernu ente F$A ya IX-BA, ya agora gobierna la F$A namái. Fou tamién l'añu en que la TPA entamóu la sua programación -mínima- n'asturianu. Fou l'añu nel que la sexta llegóu a munchos llares, nos qu'antias inda nun llegaba.

Fou añu n'Asturias d'eleiciones, ya outra vuelta más, la F$A ya'l PP feixenon gala de cumo siendo mediocre se pue gobernar outros cuatro años esti país, ya que la oposición nuna democracia pue ser el mayor cultu a la mediocridá. Tamién l'asturianismu feixo evidente qu'ía'l partíu de la ineficiencia. Tán fora de la Xunta Xeneral non por culpa de los partíos llamaos "españolistas", nin pol votante asturianu "non asturianista", sinon porque ellos miesmos cenciellamente nun lo valen. Ya lo meyor de too, qu'aporfían nas suas erras. IX-BA-LV, renovanon el sou discursu, dempués d'un añu nel que la xebra interna fou un tachón a los años de gobiernu xunto a la F$A, años nos que dexanon dellas políticas interesantes ya qu'albidranon outru futuru p'Asturias meyor. Ehí ta la toponimia, el trabayu de Xusticia ou de Vivienda...

Nel 2007 quitaron a Gustavo Bueno una subvención, polo evidente, más que nada. Fou l'añu en que Gabino falóu n'asturianu. Ya l'añu nel que'l PP dixo eso de, buó, "asturianu sí, hasta...", hasta la llende de siempres. El día que digan lo de xusticia, ganaran las eleiciones, porque ía de xusticia, llei ya dereichu, la oficialidá. Ya qu'en 2007 salienon a glayar lo evidente 20.000 personas a la cai nuna tarde de lluvia por Uviéu. Magar de que dellos políticos asturianos, n'ayén a la sua tierra, ya cola visión puesta en Castiella, Madrid ou Bruxelas nun faigan casu.

2007 fou l'añu del homenax a Juanín, áu fou evidente outra vuelta más lo evidente, ya la F$A touvo, esta vegada que tragar ya arimase al pueblu asturianu. Inclusive'l presidente lleyóu eso de "Juanín, Llabraor de Llibertades", magar que públicamente se-y atragantara la llingua que tien tan atragantada.

La F$A ta cada día más paecía a Democracia Nacional polo menos no identitariu n'Asturias. Anque la Toponimia ou la programación n'asturianu de la TPA sían un éxitu. Anque cada añu haiga un porcentaxe mayor de guah.es que deprendan asturianu, cada añu más escolinos estudian la nuesa llingua en primaria, secundaria ya universidá. La producción musical n'asturianu d'esti añu fou pequena... ¡40 discos! En fin, la nuesa produición cultural ía enforma grande. Merez más que la clandestinidá que-y dan los políticos.

Poro, pa esti añu 2008, esperemos facer las cousas bien, ya consiguir qu'Asturias sía más Asturias, más verde ya más avanzada.



FELIZ AÑU 2007 A TOOS/DAS!!!

Labels:


Comments: Post a Comment



<< Home

This page is powered by Blogger. Isn't yours?