MunduXaime: MATRIX

24/11/2006

MATRIX

Sí. La rede Matrix esieste. Tá mui vivable. Ía la que nos interrellaciona colos políticos. Polo menos en Salas. La que nos rixe.

Matrix yara una saga de películas de finales de los 90 ya entamos del 2000. Nella, las máquinas garraban a la especie humana cumo fonte d'enerxía, ya pa qu'estos nun morrieran creyabase un mundu nel que vivía, pero numái mentalmente. El cuerpu taba nel mundu real, ya la mente na realidá paralela.

En Salas pásanos un pouco someyáu. Nós vivímos nuna realidá distinta de la qu'un amañosu ouservador apercibiría.

Por exemplo. Entras nun chigre de Salas. Alcuentraste con un/a conceyal/a. Dices-y: "CagonRós, ostia, Fernando Alonso,Canela. El meyor. Campeón del Mundu, había que traelu pa que diera'l pregón nas fiestas... Ya llou, súbilu pall Visu." Ya'l munícipe en custión diríate too seriu que mui bon el rapaz, que lo tien mui mereciu, que esi ía'l resultáu del esfoutu nel llogru d'una meta... etc. (Un/ Mozu/a "Matrix")

Agora, hai xente rara ya bizarra cumo poda ser you. Estos freakies entrarían nel Chigre ya entrugarían a esi/a conceyal/a por, por dicir daquéi, " se por favor, se se podia facer el tema esi pola revisión de la toponimia del Conceyu Salas. Ou, se por favor ya nun ía muncha molestia, que sei you, por unos árboles qu'había nun espaciu públicu ya de sullape desapaecieran. ¿Áu foron a parar?" Nesti casu, el munícipe retrucaríate asina: "Ías un vagu, un maleante, nun ties outra cousa que fer, terrorista, los del asturianu siempre igual, etarra, llocu, fatu, tol día col miesmu cuentu, nun ties outra cousa a la que tar..." ya argumentos similares (Un mal ciudadanu cumo you, pero eso sí, nun lo diran delantre tuya*)

(* Verídicu)

You remembro cumo a fines del sieglu XX facíase na Plaza la Campa, en Salas un festival de música tradicional, que se feixera dellos años, trés peimique. Organizaballu la B.G.Cántara, de La Espina. Yaran malos, trabayaban sou la tradición del conceyu, paseando'l nome pol mundu ya además falaban n'asturianu.

El casu ía que'l primer añu truxeran a la B.G.Candás, con Hevia al frente. Yara l'añu 98, branu-agostu-, ya Hevia llanzara'l sou discu en Setiembre. La xente nun sabía quien yara Hevia nin quien yara la B.G.Candás. Pero inda güéi hai xente que quier volver velos tocar por Salas. Porque na plaza nun cabía nin una aguya, de llen que taba...

Esi acontecimientu marcara un antias ya un despuéis. Salas nun volviera ser igual dende aquella. Tu entrugas-y a dalguien de Salas sou música asturiana ya dizte que de lo meyor ía la B.G.Candás.

Ensin embargo, el festival morriera. Fora pol aciu del conceyu Salas, acabaran col festival ya cola B.G.Cántara, cumo tamién feixeran cola B.G. Cinco Villas. Ya güéi, los conceyales/as dicente qu'esi festival nun prestaba a la xente. Magar qu'inda la xente s'alcuerde de los grupos que toucaran nesas tardes tan prestosas.

Neso consieste la rede Matrix. La xente vive nuna realidá ya los políticos amuesan outra bien distinta. Yá fainte creer eso. Ya cuando veis a la ca'l conceyu a preguntar por que nunca faín nada con música'l país, por exemplo nas fiestas, dícente con tola cara que eso en Salas nun gusta.

Claro. Cumo cuando truxeran a Los Berrones. Outra nueiche máxica, de las que la xente remembra. Xente de tolas edades ya categorías. Ou cumo cuando viniera Llan de Cubel a las fiestas. Tamién outru fiascu. ¡Pos you nunca viera'l Faces con tanta xente...!

Por embargo, se presentas un concierto de música asturiana, en vede colos músicos que train, colos d'outru espectáculu... la xente sí se mosquea. Esto tamién pasara en Salas. Dicían qu diba venir Vitor Manuel. Cuando realmente traían al Conciertu d'Asturies (Vitor Manuel, Mari Luz Cristóbal Caunedo, Nuberu, Tejedor, ya outros más)... la xente picarase un pouco... non pola música, ensenon pola propaganda que feixera'l conceyu.

Eso tamien ía la Rede Matrix.

En fine, la rede matrix ía una cousa compleixa. Ía'l velu qu'esieste ente esa dinámica ya dilixente clás política que nos gobierna que véi las cousas con caleidoscopiu, ya nós, ciudadanos pamestos ya fatinos, probinos, que vivimos na nuesa realidá, pero que nun nos damos cuenta de lo que realmente socede... nun sabemos.

Labels: SaLaS