MunduXaime: Faciendo Amigos

14/11/2006

Faciendo Amigos

Güéi llevanteime cumo cualisquier outru día ya punxe'l radiu. Cumo tolos días cuando me llevanto, puengo'l programa "Alboraes", de la emisora Radio Sele. Ía un programa que ta muncho bien feichu, ya, poro, sientolu mentes me llevanto ya me ducho ya m'axeito; ya grábolu pa llou volver sintilu pa illustrame bien ya empapáme d'actualidá pal restu del día, pa "tar na onda".

Güéi entereime nesi mediu, qu'Areces inauguróu una campaña publicitaria feicha por Migoya, na que Yogui ya Bubu fain turismu por Asturias (nun ía chanciu, ía verídicu); ya a los asturianos vei costanos ¡5 MILLONES D'EUROS! (tamién ía en serio). Ya mentes, pa fora, Asturias proyeuta- por mediu de la F$A- la sua política esterior a la confrontación internacional.

No tocante a lo estrictamente pecuniariu, a min prestaríame saber áu van dir a parar los cuartos esos. De xuru una parte de dereichos d'autor a la Hanna-Barbera, outra a tapecer las deldas de la RTPA (los gastos d'esa TV nun tienen fondu), outra pa pagar a la empresa que feixo entamu d'esa estaya, ya outra en comisiones varias.... Maraviyousa la Inxeneiría Publicitaria del Principáu d'Asturias. Podía salir Yogui, pa promocionar los premios principiegos recoyendo un galardón de la manu de S.A.R. el Borbón.

Ya agora esplico'l tema esi de la problemática xeoestratéxica na que ta soumorguíu'l Principáu. Esiesten trés frentes conflictivos:

-La Rexón Murciana (Región de Murcia, con rangu de Comunidá Autónoma).
-La Comunidá Gallega (Comunidade Galega, tamién comunidá Autónoma).
-Castiella ya Llión (Castilla y León. Anque tapecíu pola confusa denominación de C.A., baixo esas sieglas escuéndese la nación imperial qu'ía l'auténticu xermen del Reinu d'España -ya non Cuadonga, cumo se suel dicir).

Vou esplicar agora una por una l'abegosa coyuntura:

COLA REXÓN DE MURCIA

La problemática con Murcia, rexón de calter típicamente Mediterraneu, ya que s'alcuentra nas "antípodas" (no que se refier a la península ibérica) vien dada por una campaña publicitaria. Si señor, por una campaña publicitaria, cumo la de Migoya. Pero ensin Bubu ni Yogui. Nin cuesta 5 millones de Euros. Numái cuesta 6o0.000 €. Siempre lo digo, n'Asturias nun hai crisis económica, sobranos los cuartos. La crisis ía moral ya política.

Paez ser que Murcia copiou un logu d'una campaña publicitaria d'Asturias, na que apaez el ventanu prerrománicu, los cumales, los montes ya la viesca ya la playa, la campaña d'Asturias Paraísu Natural.

La reacción del gobiernu del Principau nun se feixo esperar; Yogui ya Bubu vein dar una imaxe seria d'Asturias pa tol mundu, nuna campaña d'Escandalu, munchu más costosa ya moderna que la de Paraísu Natural.

Llou, Migoya púnxose fecha un rabiscu col sou homólogu murcianu que copiou una imaxe d'Asturias que caltríu por años, d'un eficaz xeitu. Pero claro, las cousas asturianas, ya lo diz Gracia Noriega, son cousas de rango inferior, cumo los cuélebres respeuto a los dragones, ya asina nós nun rexistraramos polo visto la nuesa campaña turística antigua. ¡Cousas de la vida, amiguinos!

COLA COMUNIDÁ GALLEGA

Galicia. Un pequeñu sector del galleguismu feixo un mapa -que la Xunta Gallega declarou illegal en sou día- nel que garra tierras que nun pertenecen a la Comunidade Galega, definida pol sou estatutu d'Autonomía. Las inxerencias fechas por Galicia n'outros territorios non gallegos, cumo los 18 conceyos Asturianos más oucidentales más Degaña, nun tienen en nengún casu FUERZA VINCULANTE. Cumo se meten toul Principáu nel mapa esi, lo mesmo dea.

Lo que pasa ía que tolo que venga de Galicia hai un miéu enorme. You nun sei porquéi. La Hestoria diznos que, magar de Franco ya las tropas gallegas d'Aranda, nunca Galicia invadíu Asturias, nin impuso la sua llingua, relixón...etc. ¿Por qué entós se fomenta esi odiu ente Asturias ya Galicia? ¿Por una engarradiella ente dos partíos minoritarios -unu gallegu ya outru asturianu- de cuatru freakies?

You más bien pienso que la problemática de Galicia ta dientro de las suas llendes actuales ya la d'Asturias, nas suas tamién. Ya colos gallegos, bona vecindá, de xeitu recíprocu. Ente nós lo demás ía PURA INORANCIA.

CASTIELLA YA LLIÓN

Una vegada más delata-ys el nomatu. Quiero dicir, ¿porque la llaman Castiella ya Llión cuando quieren dicir Castiella? Nun me malinterpretéis, nun teo nada escontra la Castiella campesina nin proletaria, escontra'l pueblu llanu. Pero ¿que nación impuso ya impón, colonizóu ya coloniza más tarrenos que Castiella?

Castiella sometéu, ente outros pueblos a Incas, Asturianos, Gallegos, Llioneses (güéi Llión ta cuasi asimiláu),Aztecas, Aymarás, Quetchuas, Marroquíes, Catalanes, guineanos... etc, aculturizandolos de xeitu xabaz. Anguaño, en Venezuela, el día 12 d'Ochobre cellebrase'l día de la Resistencia Indíxena...

Pues tamién nel sieglu XXI, en plena Europa de la Converxencia fasta la Unidá, Castiella quier medrar más a costa de pueblos pacíficos ya enfermos, nesti casu, a costa d'Asturias.

Dempués d'anexonase impunemente parte de Somiedu (las fontes del Sil), ya inda llou tomalo a guasa llantando una señal qu'afita qu'esas tierras siempre foron Castellanas, agora quieren parte Caso, pidin las Fontes del Nalón. Ya nesto de garrar Tarrén, la recia Castiella ía la tierra -nación- secularmente más apta.

Un gobiernu normal, responsable ya trabayador, que nun se prodigara en inauguraciones ya espichas preí; que touviera una idega pal desarrollu d'Asturias ya un conceutu d'Asturias resolvería esto nun plis plas. Pero yá se conoz la hestoria. Esti gobiernu gasta perras a lo tonto, dilapida la riqueza d'Asturias con campañas cumo la del Osu Yogui; ía incapaz de ciarrar l'inexistente conflictu con Galicia oficializando el gallego-asturianu ya l'asturianu nel sou casu, ya afayando'l sistema escolar d'un xeitu que los guah.es deprendan la hestoria ya la cultura asturiana. Lo que de verdá ía más sangrín, esti gobiernu ante Castiella CÁGASE NOS PANTALONES. Con Castiella hai miéu escénicu, Valladolid ía cumo'l Bernabéu. La F$A ya'l PP (Partidos castellanistas, al menos n'Asturias) fomentan el castellanismu:

-Torgando una ya outra vede la oficialidá del asturianu, marxinando en conclusión la cultura popular asturiana.
-Nun contestando a las provocaciones anexionistas de Valladolid.
-Capitulando ante'l tarrén perdíu en Somiedu que siempre fou ya ía por dereichu Asturianu.
-Inorando al pueblu, nun faciendo política social, marxinando la etnia vaquera, fadiando las Brañas d'hibiernu colos campos d'aeroxeneradores; ya capitulando nas de branu, cediendo los praos a Castiella (esti gobiernu asturianu siempre vei colos ricos, non colos probes).
-Nun aplicando'l miesmu criteriu qu'aplica Valladolid pa roubanos territoriu, qu'ía'l d'Auguas vertientes. Asina, Sayambre parteneznos con tolas de la llei a nós.
-Permitiendo a "intelectuales" Castellanistas, cumo Gustavo Bueno, Gracia Noriega, Esteban Graciet... etc etc etc soltar la llingua a pacer ya, yá non desmentillos, ensenón que los aplauden.

Ya en definitiva, ensín una idega clara ya un proyeutu claro pa Asturias. Más alló, Areces creóu una Policía Autonómica. Esto diz muncho d'Areces ya de la F$A. Cuando atacan ya reprimen l'Asturianismu nuna concentración na qu'hai DIEZ CIUDADANOS (esto ía, personas lluichando ya defendiendo los sous dereichos) sacan pechu ya ía cumo los abusones de la escuela, que te sacan 3 años con sous 3 cabezas, ya vein contra ti. Pero contra Castiella, la F$A, POR CUENTA DEFENDER ASTURIAS, CÁGASE NOS PANTALONES, YA ASOLEYAN LA SUA BRAERA CARA, la de secuaces del poder central castellanu.

Labels: Actualidá