25/08/2006
BALANCE DE LAS FIESTAS D'ESTI AÑU
-King África, nun prestóu a nenguén. Pero a los cinco días vi a dalguna paisana con unos lentes cumo los d'esi animal...
-Que las fiestas de Salas tan discurridas pa los vieyos nun ía novedá. Que, anque toque Ulán Bator, ya se lluzcan (son unos "cracks"), con ello nun cubren l'espediente. Que la tal Susana (l'espectáculu pa los guah.es) ía una ofensa pa los neños. Sou too se yía l'únicu que-ys dedican. Que llou la xente'l pueblu nun s'entrugue porque nun vienen mozos de fora. Ya que nun entamen a preguntase por que -ya non los del conceyu, senón los de la propia villa- escomencipian a nun participar nas fiestas...
-¿Velarde cofrade mayor de la Virxe'l Visu?
Veimos ver. Nun ía que tenga nada escontra la Ilexa católica. Nin contra la Virxe'l Visu. Nin vou opinar sobro temas rellixosos, cristianos, católicos, ecuménicos ou conciliares. Cadún ía mui llibre de facer ya creyer no que-y pete. Hai xente que creye en Mah.oma, que xubíu ya baxou dellas montañas, ya acabaron echandolu por cafiante ya fou d'Héxira (que non "de xira"). Outra nos milagros de la circuncisión prepucial, reallizaos por mor d'un alcuerdo col sou señor Dióus. Xuasús predicou col exemplu, ya la Ilexa durante sieglos feixo lo miesmu (h.e h.e). Outra xente haila que creye nel manifiestu comunista de Marx ya Engels (hai xente pa too). Outros en Santiago Bernabéu (suelen ser los del Madrid). Hai xente que inclusive idealiza a Franco (falo totalmente en seriu).
Velarde creye un pouco nos dos últimos. Bono, un muncho. Ya tamién na Santa Ilexa Católica, romana ya apostólica. Creyer na Ilexa honra-y. Se de verdá crei, vaya. Tamién en Don Santiago Bernabéu (se nun lo digo reviento: yera d'aniciu catalán).
¿Pero cumo pue haber xente qu'honre a esti home? Camiento que nun seya por inspiración divina, porque esto foron paisanos ya paisanas del pueblu. Sinon faigome hinduista.
-Lo de tener una anuncia de las fiestas tan esclarecíu, dando-ys una publicidá con tanta antelación, en tolos medios igual (veimos ver, numái que pongan el miesmu programa colas miesmas feichas)... yera una cousa mui d'agradecer. Ya se pa enriba coincide col horariu de los espectáculos/atracciónes sedría ía la hostia... ¡Pal añu que vien de xuru!
-Fou un puntu ya un detaye eso d'eichar el grixu esi que punxeron al pisu del camín del Visu, pal día la romería. 5 Km tragando polvu. Esti añu nun fou de borrachera sinon de coloque. Dalgún vei acabar silicosu. A ver si nuesos brillantes conceyales $ociali$ta$ nos convierten en conceyu mineiru ya algamamos fondos cumo talos.
-La música d'aniciu asturianu nun gusta a naide (ya menos al turista, que quier ver las orquestas que ponen en tolos llaos, por cuenta de la música llariega. Asina sientese cumo na sua casina... hospitalidá ou fatura, esa ía la cuestión)
Eso ta claro cumo l'augua. Sou tou se l'anuncias con media houra d'antelación, el miesmu día de Nuestra Señora de Corniana ya San Roque en Tinéu. ¡Ya inda fou un montón de Xente!
-Facer las fiestas d'una villa nun práu a 1'5 Km del sou núcleu, ya trayendo música pal enemigu ( vei por Missiego), garantiza fracasu total. Anque na ca'l conceyu piensen que non. Que nada, lo meyor que se pue facer col Faces (qu'ía esi prau), ía edificar (ups!).
Bou, siempre nos quedaran las fiestas de San Lluís, n'El Pouzu, que son esti fin de selmana (el cabeiru d'agostu de cada añu). Son las fiestas Outedanas por escelencia. Espero que vayais ya vos presten. That's all folks, Friends! ya dica l'añu que vien en Salas, la meyor villa del mundu colas meyores fiestas del planeta!!!
Labels: SaLaS
<< Home
![](http://www.alianzo.com/ranking-blogs/boton.php?url="htpp://www.munduxaime.blogspot.com")
