19/05/2009

 

Muerre esti blog


Bon, pueis esto acábase. Con esta cabera entrada fino'l blogue MunduXaime. Asina que, ehí vos véi la despedida.

Zarro'l blogue porque veo una baxada na sua calidá. Sí, si fai un par d'añinos reconocía qu'esti yera'l meyor (ou d'ente los meyores) blogues n'asturianu de la rede, güei digo que yía un blogue mediocre. Yía una cadarma que cumo siga menguando vei tresformase nun calabre, yá yía penina.

Hai milenta blogues n'asturianu. Hai blogues políticos de tolos colores, ehí veo yá l'AsturiesLliberal, qu'axunta la dereicha; hai blogues xeniales cumo GonzálezyGonzález, hai blogues xeniales "normales" cumo Coses que (me) pasen; hailos que falan del verde, de fúbol, de cocina, de pornu, de música, de cine....

De la que you entaméi namái había blogues que falaban de duas cousas: Por un llau de que n'Asturias había una llingua con trés dialeutos ya por outru qu'Asturias yera mui nacionalista ya "salvábase lluchando". Esto yía, Llingua ya Nación.

Nesi contestu nacéu MunduXaime, esti blogue introduxo un tercer tema "El Mineralismu". Sí, falemos de Mineralismu. Ya houbo xente que-y prestóu, ya dixo "mao, si se pue falar n'asturianu del mineralismu... ¡Vaya virguería ho! You vou falar de llucha llibre. ¡Cúmo presta!". Ya nacía un blogue nuevu.

Agora veo blogues xeniales que falan de llingua, cumo falarylleer ou TierraAlantre. Hailos d'escritores consagraos, cumo Xandru Fernández, Vicente García, Humberto Gonzali ou Xuan Xosé Sanchez-Vicente. Bono, ya'l tremendu trabayu del filósofu marxista Carlos X. Blanco.

Deixo amigos ya conocíos, Fueya en Blanco, Trayasgaya, From Xixón To London, Na Lluna hai una vieya Filando, El Xanu'l Caborniu... ya más, toos ellos xeniales blogues, ya más qu'esqueizo de xuru.

Quixera remembrar Ta pa Ponga ya tol equipu que feixo posible que güei tengamos tornáu al asturianu l'Ubuntu... eso cuando you entaméi nun había nada; esta xente vei unos añinos por delantre. De momento you yá teo instaláu nel miou ordenador el sistema operativu UBUNTU, que ta xenial.

La llingua meyoróu d'esti tiempu p'acá, polo menos n'internet, na TPA ya pola cai no que cinca al sou reconocimientu, si yía verdá qu'inda queda muncho trabayu que facer, pienso you, pero en trés años, faciendo balance mental en fríu, pienso que s'anduvo. Agora práuticamente tenemos casi tola topinimia d'Asturias iguada ou en procesu d'ello. You veo qu'esti blogue sigue ancláu n'outra dómina, na que seique touviera más razón; yá digo, güei yía un blogue mediocre. Ya, cumo dalgunos entrenadores de fúbol, cuando los cesan,"you asumo tola culpa".

Quiero quedame nel tiempu nel qu'esti blogue taba "nel cumal de la fola" (cumo sou d'interior, puengolu asina...). Aquello fora tremendo, queríu llector. Pola cai, pola caleya, polos chigres, tola xente en plan "eeeeeeeeeeeeeeh". Por un tiempín sentime dalgo asina cumo'l "Groucho Marx del Bable" ou'l "Cesar Vidal de la causa asturiana". En xeneral, un home d'estáu, una especie de Winston Churchill ou un Charles de Gaulle llariegu, siempres pensando n'Asturias. Cumo'l Presi, cuando dixera aquello de "Cada nota que canto vei dedicada a Asturias". You fui d'esos.

Sí, fora prestosu. Cutre seique, pero prestosu.

Agora siéntome cumo Charles Chaplin en Candilejas. Sou un payasu triste, pasáu, d'outra dómina. Conque veimos quedanos colo que MunduXaime fou, ya yá nun yía.

Sí quixera alcordame de tola xente que siempre me sofitara. Tamién a xente cumo Gracia Noriega, Javier Fernández, Fernando Lastra ou Antonio Masip, que feixenon d'Asturias un llugar... "¿Pintorescu?"

Bono, ya de Paco Grande ya Radio Sele, por da-y llugar al blogue; a los que nun tán, pero tán pa char una mano, cumo El Trasgu d'Areces ou Xabeldiz...

Ensin embargo quiero dicir que nun marcho pa l'Arxentina nin nada pol estilu. Sí yía verdá que camudaréi l'estilu... ya'l rexistru, pal branu de 2009 abriréi una nueva bitácora, en castellán. Queixera mantenella por un añu p'asina tornar con fuercia con outru blogue n'asturianu, más guapu ya meyor, cumo vós merecéis.

A la llingua asturiana inda-y queda muncho camín que trillar; esti blogue nun yía nenguna presea apta pa ello. Asina que zárrolu; ya espero que nun tea que nunca más abrillu. Foi prestosu, pero la broma acabóu yá.

Asina, que vémonos. Un abrazu, salú ya que nun esqueiza.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 10:40 AM
Comments:
Si ia verda lo del tou 'epitafiu', a min prestabame abondo MunduXaime. Xunto con 'From Xixon to London' yera de los mas criticos de la blogosfeira n'asturianu, siempre fadiendome rir con noticias 'cutres' de Lastra, Areces, Masip, Fernandez, Migoya. MunduXaime foi un antidoto escontra esi l.longu etcetera que fai qu'Asturias tea sumio na inconsecuencia mas grande. Suerte, ne!
# posted by Anonymous paul : 2:21 PM
 
Un blogue ye un blogue, hailos a mamplén, pero de verdá que siéntolo. Nun ye por chupanos los perendengues, pero ye verdá que MunduXaime apurrió dalgún de lospost más descoyonantes y con brillo. Nun ye que diera cera por dala, ye qu'echaba polish y depués frotaba. Avisa cuando teas perhí, en castellán o n'asturianu.
...Y disfruta l'Ubuntu!!
# posted by Anonymous Jesusito : 2:34 PM
 
vaya, hom... Una allegría pa Lastra y la so corripa...

Yo nun toi triste, por que conózcote y sé que yes activu ya inxeniosu y esa creatividá, tas obligáu a compartila... seya en forma de blogue o como te de la gana...!
# posted by Anonymous Chamicu : 5:08 PM
 
Una pena, prestábame muncho'l to blog y tengo escacharraome de risa con dalguna entrada.
Como diz Jesusito, avisa cuando tornes, ne, que vamos echate en falta.

Salú.

Ateyavana.
# posted by Anonymous Anonymous : 5:42 PM
 
"Cumo'l Presi, cuando dixera aquello de "Cada nota que canto vei dedicada a Asturias". You fui d'esos."

un home que cita al "Presi" con tanta propieda y que lo sigue con un "You fui d'esos" que nun quedaria mal na boca d'un Frank Sinatra ,,, el que diz eso ye un home que sigue de xuru nel cumal de la fola ,,,

Un saludu !

PS- has de mantenenos informaos de los tos pasos y no que andes .. promesa ?
# posted by Blogger ayalgueru : 10:32 PM
 
Pues vase un de los blogues que meyor supo observar la realidá dende un fondu sentíu del humor asturianu y con un prestosu emplegu de la nuestra llingua.
Dacuando dexéte dalgún comentariu, pero visitete siempre. Vase un blogue prestosu. Güei ye un mal día. Un saludín
# posted by Blogger El xanu'l caborniu : 10:44 PM
 
Bono yo nun m'esmolezo pola muerte d'esti blog porque tengo la grandísima suerte de tener al autor a la distancia d'un sms, hasta que quede ensin saldu.

Y agora ¿qué? ¿abandones les güelgues de Tristan Tzara? ¿o vas facéi la competencia a mimesacojea? En cualquier casu, un conseyu: los chistes sobre Madeleine McCann yá tán entamando a pasar de moda...

Ah, y gracies polo de "normal", nunca me dixeren tal cosa (bono, sacante una cosa asina que ponen na nómina).

Un bisu gurdu

p.d. Y yo que taba esperando que coordinares dende'l blog la campaña de recoyida de firmes ponéi Tini al fíu de Tola y Furaco...

p.p.d Nin se t'ocurra esborriar el blog. Ha de tar ehí pa cuando los nuesos descendientes tengan qu'estudiar historia d'Asturies
# posted by Blogger Dígotelo yo : 12:46 AM
 
Munchas gracias a toos. Siguimos, sicasí, cumo parte del blogue Daquién esnalóu penriba'l nieiru del coruxu (www.lagueyadacritica.blogspot.com); nel blogue de cine, destripando la realidá de la industrial del celuloide...
# posted by Blogger Diestru : 11:13 AM
 
Un abrazu, collaciu. Siempres son tristes los adioses, pero supongo que va ser un tallueu. Pos eso, hasta pronto. CarlosXBlanco.
# posted by Anonymous Anonymous : 11:31 AM
 
H.oder que pena, cumo dicen outros blogueiros esti ye (inda ye) ún de los blogues asturianos onde se respira humor y pasión, y amás na variante occidental. You tampouco voi dicir adiós.

Regalate amigu.

NA LLUNA HAI UNA VIEYA FILANDO
# posted by Anonymous Anonymous : 6:05 PM
 
Ye una pena que nun cayeres na cueYnta de que tamien hay un dialectu gallegu n`asturies. A parte de los tres dialectus asturianos. Pués velu en gallegoasturiano.com
# posted by Anonymous Quique Roxios : 7:54 PM
 
Post a Comment



<< Home

This page is powered by Blogger. Isn't yours?