23/09/2008
Uviéu Civitas Romana
Yía lo que tenemos los mateínos. Somos parte d'esa ciudá asturiana, pero numái nós esperimentamos esa sensación. La vuelta a Uviéu, colas cousas que tien.
You cuando deixéi Uviéu taba convencíu que marchaba d'una ciudá d'orixe medieval... La Capital del Reinu d'Asturias. Ya yá ven, torno a una ciudá romana. En menos de dos meses. Pa estas cousas Salas yía más aburríu. Nós somos Pola ya puntu. ¡Pola mogollón!
Perdonái pol chiste malu. Yía que toi llen d'emoción.
Esti branu atoupanon nun séi quéi d'unas ruinas romanas, ya resulta qu'Uviéu esistía en tiempos de los Romanos, conque a tomar por culu las tesis celtistas de Gustavo Bueno sobre Uviéu.
La verdá yía que you tenía una corazonada, que pa estas cousas sou un pouco meigu. Golíalo, claro, una ciudá con tal esllendor nun pue ser outra cousa que romana.
Los romanos foran un pueblu bracu cumo ellos namái. Nun quiero dicir que los astures nun lo foran tamién. Lo que pasa yía que claro, los ástures comunicábanse a gruñíos, sacante dalgún con más mundu que salía davezu a la meseta, ya tamién sabía lladrar. Amái, nun comían nada, porque las patacas inda nun vinieran d'América, el meíz tampouco, los tomates tampouco, ya la DANONE inda nun furrulaba...
Los Romanos. Los romanos tenían duas cousas mui bonas: el llatín, que nun deixa ser una asturianu más arcaicu, eso sí más finu, pero más arcaicu al fin; ya las castañas, que menuda fartura p'aquellos tiempos.
Conque gracias a ellos, nós tamos eiquí.
Hai una cousa que muncho me choca, ya yía qu'hai xente que paez que-y garra cumo de sorpresa. ¿Qué pensaban ho? ¡Nós somos romanos modernos!
Pues sí. La cousa yía que lleganon los Romanos ya cola sua superioridá llingüística ya gastronómica llantanon n'Asturias, ya asina hasta que lleganon los mouros. Pero eso yía outra hestoria.
Labels: Antropoloxía
![](http://www.alianzo.com/ranking-blogs/boton.php?url="htpp://www.munduxaime.blogspot.com")
