22/09/2008

 

A Ubaldo, dende Llinares


Esti home yía l'empresariu orixinariu d'El Barriu, Meicina, Ubaldo Díaz García.

Ubaldo yía un exemplu d'un home feicho a sigo miesmo. Un rapacín que salíu del pueblín ya feixo fortuna na capital trabayando duro ya con bonfacer. Dalgo que paez xusto.

Ubaldo tien yá -vou permitime la llicencia de poner la sua edá, por aquello del ser veicín- setentayseis años. Ya goza de mui bona salú, cumo pude ver na fiesta de la Virxe del Cobre, en La Puerta, ente las parroquias de Meicina, Llinares ya Maeza, que xunta a xente de la zona con munchos emigrantes Cubanos, ya en menor midida mexicanos ya uruguayo/ arxentinos.




Resulta que Ubaldo prometéu, desprendíu, abrir los caminos todos que pasan polos montes de las parroquias de Llinares, Camuñu, Santuyanu ya que garran nel miesmo pueblu de la sua más tierna edá. Outra cousa encomiable.

You claro, lo único yía que nun me paez qu'amerite facer en Llinares nenguna escavación, ya más a cumo ta agora la hora de trabayu ya'l combustible... non, meter palas ya esas cousas nun me paez lo meyor pa Llinares, pueblu al que-y teo muncho ciñu, mayormente por nacer n'él.

¿Por qué? Por que de tolos mouros (Del Coutu de Llinares, en Salas), los terrucos (los vecinos de la parroquia) son los que peor tán, sacante igual los purilos (aldega de San Andrés, unde you) somos los que peor tamos. Ya cuento a los gochos, las pitas, la raposa, los uxos, los cárabos ya los xabariles.

Cuido que pouca diferencia haiga ente los Terrucos de Llinares ya los Xabariles de Llinares. Conque pa andar pol pueblu vou amosar cumo nun fai falta abrir los caminos ya asina nun abusar del probe Ubaldo:




Esti xaldu yía Marquinos, yía d'ehí del pueblu, la sua buela nun séi que parentescu tenía cola mía. De más guah.es dábamosnos un airín, anque fosemos primos llonxanos, pero el deixóu melena, ya cortola ya veise bien cumo tenemos el pelax diferente. Lo que tien yía los colmillos mui feos... Pero you quiérolo muncho, ya amás yía mui formal ya mui intelixente, yía una lluz. ¡Salú Marcos!


Don Juan fora un cura que s'adaptara mui bien al pueblu. Queríamoslu muncho, tanto fou qu'esta estatuta preside'l cementeriu del Tayón, unde veimos parar todos. Na imaxe sal allegre ya risueñu, cumo fora siempres...

Esti par siempres igual. Bah. Esti matrimoniu son d'una casa d'ehí de la parte baxa del pueblu que nun tan quietos anque los aten. Ya amirái qu'en Llinares somos xente pa estas cousas mui conservadores, pero estos, erre qu'erre... En fin. You por min mandavalos a una residencia d'internos, pero yá dixo l'alcalde que me deixara de tonturas. Que pa eso en Salas gobiernan los socialistas... ya qu'él mentres usen condones...



Eiquí toi you. Nunca nun sacara nel blogue una foto mía, ya cumo la mia mai diz que sou mui sociable ehí toi con unos turistas, dempués de compartir un queisu... que comí casi too you. Saquéi la foto porque yeran pequenacos, ellos porque querían un recuerdo de la xente llariega.. vóilà,el resultáu.

------------>

Conque Ubaldo, agradecesete'l tou interés, pero disfruta del retiru, ya del pueblu, tanto de Llinares cumo d'El Barriu, unde siempres sedrás bien recibíu, pero nun gastes recursos en furar pol pueblu. Nós nun precisamos, pero outra vegada más, agradecíu.

Labels: ,


Comments:
Pa Ubaldo, que desprendíu quier regalanos a la xente Llinares ya alrededores...

¡Los xaldos de Llinares nun queremos que nos furen nel pueblu!
 
Post a Comment



<< Home

This page is powered by Blogger. Isn't yours?