MunduXaime: Homenax al asturianismu

02/09/2008

Homenax al asturianismu

Resulta que'l domingu fou'l Día Mundíal del Blogue, ya you nun m'enterara, pero'l llunes vi una prestosa dedicatoria nel blogue Escucando Estrelles, compañeiru amás nel blogue Llectores y Llectures.

You podía alcordame de munchos blogues, que pagan la pena, qu'ameritaban una dedicatoria, pero non, siéntolo. Nun vei pa ellos.

Vou facer un homenax al asturianismu, pero non al asturianismu políticu. Porque arímase'l 8 Setiembre, ya un añu más cellebran esi día cadún por sua casa; llou que naide s'estrañe cuando llegan las eleiciones ya nun entran na Xunta Xeneral (que yía lo miesmu que nun rascar nada). Mirái cumo la F$A vei col sou satélite SO-MAFIA-UGT a Rudermu, toos de la manina... ya axuntan a Villa, con Javier Fernández, con Tini... que llou por detrás habia que ver cumo se llevan!

Non. L'Homenax vei empobinau a las figuras de dos Ex-Nuberu; Manuel Asur ya Manolo Quirós.

Manuel Asur, de Samartín del Rei Aurelio fou un de los escritores más significativos del Surdimientu. Un poeta que cantóu a Asturias, a la Mina, a la Llingua... con tol puxu ya'l saber facer que tien. A min las poesías d'él paecenme que tienen muncho sentimientu ya muncha fuercia, ya inda güei, poesías con 30 años ya más tienen tol vigor ya tola frescura ya tola gracia que siguen someyando escritas anguaño. Asturias tanto nun cambióu... polo que dempués de trenta años el probe Manuel Asur tien que tar más que fartucu. Normal.

Manolo Quirós, gaiteiru de Ricáu, conceyu Quirós, fou tamién miembru (ou collaborador destacáu) d'esi proyeutu nomáu Nuberu. Gaiteiru que conservaba tola téunica tradicional de los gaiteiros de la dómina de los años trenta ya cuarenta del sieglu XX, soupo entemecer las piezas de gaita más tradicionales con tolos arreglos de la música pop ya rock de los años 80 ya 90, allegando la tradición a las oreyas de los más mozos, siendo un personax clave a la hora d'allugar la gaita, l'instrumentu más emblemáticu d'Asturias anguaño, óu llegóu. Auquiera que tea, Manolo qué grande.

Los dos artistas touvienon munchas críticas ya detractores, pero ehí quedóu'l sou llabor. Paez que cumo tolo qu'aguanta ya espoxiga touvo bien feicho. A min paezmelo, colo qu'ixo por ellos, mentres amodín vei goñando la sua obra.

Nestos días que viensenos cerca l'Adios a Nuberu. Cumo diz esi final del Cuentu Tradicional, Estos fonon bonos, quiera Dios que los que vengan sían, cuanto menos, meyores.

Labels: Cousas de la vida