MunduXaime: Dende Cantabria... Furaco!

29/04/2008

Dende Cantabria... Furaco!

Asturias ta ensin osos; el nuesu destín ta en manos de Paca ya Tola. Ya la vecina Cantabria unvía un semental pa procrear... ¡non! nun ía Miguel Ángel Revilla... Ía Furaco, un osu que ta feicho un campeón.

Cantabria acudíu al rescate d'Asturias yá unviando a Preciado, l'entrenador del Sporting; anque bono, nós mandaramos-ys a Marcelino, qu'entrena al Racing, ya nun lo fai mal. Bono, que tan n'Europa, vaya.

Centremonos nel mundu Osunu.

Resulta que Furaco ía un semental d'Osu Pardu, que vien a procrear colas osas asturianas, las glamurosas (¿glamurosu ía sinónimu de gayaspeiru?) osas asturianas: Paca ya Tola. Son xunto a la princesa Letizzzia las femas más famosas d'esta bendita tierra asturiana. Casi nada.

Ya Cantabria ía tierra de machos. El Conde Pedro de Cantabria, ya agora Furaco. Dos grandes de la tierruca vecina. Conque Furaco aportóu a Asturias con espectación ya avaláu por outru machu cántabru, Revilla. Paez que si nun valía'l probe animal diba esfoutase Revilla nas osas... mui macabru too. ¡Nun sei cual de los dos osos ía más animal!

Pero, ¡ho! Mala suerte... Furaco deixóu'l pabellón cántabru polos suelos. España entera ta en vilu... Cantabria diou una imaxe mala. Pero non, espertos asturianos nel tema devolven el favor al pueblu veicín: "Esto fou una toma de contautu. Ía que las nuesas osas tan mui mal avezadas. Pero tranquilos, que la mala bestia cántabra (por Furaco, non por Revilla) ta feicho un esbardu... ya vei terminar acabando de dallo too."

Asturias ya Cantabria harmandadas polos osos. Somos países osunos, anque you creo qu'ía Asturias un poucu más... Namái hai que comparar a Tini con Revilla...