MunduXaime: Morréu'l Tomate

08/02/2008

Morréu'l Tomate

¡CASPA, CASPA!

Acabou'l Tomate, pero pa siempres. Cumo suel pasar, cuando morre daquién la xente atristaya ya remembra al fallecíu con dolor. El casu ía que'l tomate foi un programa que representóu la TeleBasura en tol sou esllendor: basoria polos güeyos ya oureyas.

Carmencita Alcayde ya Jorge Javier Vázquez depués de xantar allegraban las dixestiones a muncha xente, pero la verdá ía que'l programa yera pa meixar ya nun echar gota. Falando de xente muerta, metiendo'l deu na llaga siempre, insultando, azorrando cumo la fouguina, embruteciendo'l país, agora na sua muerte pseudoperiodistas dicen que vei entrar esi modelu de programa nos estudios de las facultades de periodismu... cumo exemplu a nun siguir.

En fin.

You pienso que podían facer una versión asturiana -agora que yá nun s'emite pa tol estàu- na que saliera un Tomate colos personaxes llariegos; que sei you, con Gustavo Bueno ya Josefina Martinez. Alarcos podía ser cumo una folclórica fallecida. Ya con Jesús Neira en plan Duquesa d'Alba (la culpa nun ía de don Jesús, sinon de la "intelligentsia provincial", que lu sacan de paseu, cuando esi home tenía que tar disfrutando d'un bon retiru tranquilu).

Ya Gracia Noriega y Esteban Graciet en plan Mariñas/Karmele. Nun digais que nun diba prestar...

¡Ya los políticos! Qué malos sois... tais pensando na que tais pensando: en Paloma Sainz. Ía un poucu cumo Ana Rosa (la d'AR) pero nuna versión más asturiana, más "de montaña". Si la mona...

Ya que nun dicir de los xugadores del Sporting ou del Uviéu, ou de Fernando Alonso, ou de Letizzzia ya compañía, Arturo Fernández en plan Mark Ostarcevic, ou el gran Villa, el del SOMA; ési ía'l nuesu Humberto Janeiro.

Labels: Culturiya