29/10/2007
Premios Principiegos 2007
Outru añu de Premios Príncipe d'Asturias. Cumo cada añu son iguales, pos esti añu nun vou comentar nada. Namás que'l nivel de bandas de gaitas ya grupos de baille mui baxu: Había poucos ya nun deixaron beillar.
Asturias cada día ía menos Asturias. Ía lo que llaman progresu. Nos chigres nun se pue echar sidra. Na alministración asturiana nun se pue falar asturianu, ya cada día se siente menos asturianu. Ya agora nos premios príncipiegos nun se vei poder yá nin echar unos bailles, con lo prestosos que son.
Gracias a que tenemos a la F$A, promocionando la cultura asturiana. Bono, a lo meyor esto ía lo qu'ellos llaman promoción. Ya a todas éstas, ¿qué significa promoción?
Bono. Lo que paez que ta claro ía que'l campu asturianu tien futuru. Hai demanda de fabas, de mazana pa sidra ya de ganáu de lleiche. En Salas, la Promoción que fai'l P$OE ía clara: Nas veigas, polígonos industriales (naide sabe a ciencia cierta a qué fin), nos valles sidreiros canteras. Ya las vacas... bono, güelen mal.
Busquen nel sou conceyu a qué se refieren los políticos cuando falan de Promoción.
22/10/2007
Sierra Sollera
Más lluéu, nun me sorprendiera nin res cuando Aznar apaecéu n'abertal pa tol mundiu falando xunto a Bush nas Isllas Azores, de la qu'entamara la Guerra d'Iraq. Sí me sorprendiera Tony Blair, pos cuntaba que yera más llistu que too eso, ya bono, él dierase tamién cuenta que muncho nun pintaba con semeyantes elementos. Bono.
Agora resulta que la muyer d'Aznar, la Botella (curiosu nome) diz n'Asturias qu'hai que pidir perdón por Ochobre del 34. Condosco. La Botella ía conceyala de Mediu Ambiente pol conceyu Madrid, ya que sabe muncho del tema: estrema dafeichu las peras de las mazanas. Mui útil a la hora fer sidra. Bono, estos madrileños son mediu raros.
Conque paez ser que la presidenta de la CCAA de Madrid, Esperanza Aguirre, diz que vei apurrir dende el Gobiernu de Madrid un mástil con una bandera d'España a tolos municipios de la sua comunidá autónoma si los solicitan. En Madrid tan mui folgaos.
Nun me malinterpreten. Caenme bien los madrileños, ya teolos por xente allegre, llista ya sirvicial, polo que chócame que tengan semeyantes personaxes na primera llinia política.
Ustedes dirán... hum, hum... A nós préstanos los salenses. Son xente amable, allegre, llista ya sirvicial. Entós chócanos que tean gobernaos por semeyantes xenocidas pa cola cultura asturiana ya, lo más emportante, pa cola ñátura.
Pos sí. Xunto a las canteras, minas, plantas de procesamientu de metales ya velenos chungos pa col mediu, nel marxe izquierdu del Narcea, agora veimos echar manu de la vera derecha'l conceyu (ya nun me refiero a Corniana): A las Dorigas.
En realidá ya furrulaba una canteirona, que cuando tira l'aire llena del povisa l'atmósfera de Corniana. Pero bono. ¿Qué ía una cantera más?
Pos una cantera más ía Sollera. La sierra Sollera, la sierra máxica, que fai llende ente los conceyos de Salas ya Candamu ya Salas ya Grau, ya seique Grau ya Candamu. Digo máxica (tamién sagrada) porque na sua fastera allúgase una capilla, la de Santa Técula,llugar de cultu pa la un montón de xente. Mía bisbuela fora tola vida a pidir pol ganáu. Venía dende'l Conceyu Llanera.
Bono. Agora total, cumo ganáu nun hai... Había que-y facer un museín. Museín del Ganáu asturianu.
Pérdese esa cultura ganadera. Dempués de varios milenios curiando vacas, el P$OE de Salas vei convertir el conceyu nuna cantera. ¿Ya llou qué?
¿Nun deixan cuartos las vacas? Hai que trabayalo. Pero en Salas tenemos una esperiencia de xeneraciones ya xeneraciones especializadas en criar ganáu vacunu, de lleiche ya de carne. Ya del sou procesu ya venta, tanto al por mayor cumo en minoristas. You diría ensin temor a equivocame que somos los meyores, non d'Asturias, sinon del planeta tierra. Si montara una ganadería n'Arxentina, n'Australia, nas llanuras ucranianas, ou auquiera, llevaría capataces ya trabayadores de Salas. Con total confianza.
El casu ía que tamién van esfarrapar, na marxe dereicha del Narcea pol sou pasu pol conceyu, el que quiciabes sía la mayor ayalga verde de tol Conceyu (ya outra vegada, seique d'Asturias): La Veiga de la Rodriga. Van llantar un polígonu Industrial.
A esti pasu nun sei que-ys vei quedar a la xente de la Rodriga. Porque home, el suelu industrial siempre pidi iniciativa empresarial. ¿Haila na zona?
Labels: Actualidá
08/10/2007
Tocando los Borbones
(Foto del Rei nel sou Maybach de papu -un coche mui caru ya esclusivu)
Cada vegada que falo del Rei d'España arízanseme los pelos del renaz (los que tan xusto derriba'l culu). Ía una situación más bien incómoda, pero col tiempu llega ún a convivir con ello. Sí, sei que suena un poucu gai.
Nun me malinterpreten. You en realidá sou Monárquicu. Anque bono, la mía idega de la monarquía nun casa con la de la mayoría del Seutor Monárquicu Oficial (ya oficiosu) Español.
La diferencia mía col restu los monárquicos ía que you creo que los Reis, hai que elexillos. Por sufraxu universal ya mundial. Ya a los seyes años, a la cai.
Cumo verán, la mía idega de la Monarquía difier de la de Peñafiel, ou del Conde Llatores. You sou asina, siempre apurro teorías pintorescas, pero bono ía lo que tien: Cumo'l Rei, sofítome na Constitución pa soltallas según me vienen.
Eso sí, you al Borbón Juan Carlos I nun lu diba votar. Tolo que tien ñiciu nel Franquismu prúyeme noxu. Asina que ¡fute! Amái, creo que Juanca tenía que dar esplicaciones pol 23F, por qué echóu tanto en falar... ¿Qué taba indispuesto por sobreinxestión d'alcohol? Pudiera ser, ¿acuéi?
You pa Rei teo dellos personxes que diban cumplir enforma. Por exemplu:
-Jesús Mariñas (él de "¡qué te calles Karmele!")
-Carmen Sevilla (Ya las suas "ovehitah". ¡Nun diba prestar una monarca con tanta facilidá pa meter la gambaza!)
-Ignacio Gracia Noriega (Pa quitallu d'Asturias d'una vez por todas)
-Fernando Lastra ("idem de lienzo")
-L'Alcalde Salas (los ecoloxistas diban agradecello: ¿Pue un rei abrir canteras impunemente?)
-King África (si con ello para cantar...)
-Jiménez Losantos (si con ello para enmierdar...)
Hai más inda, pero nun los vou poner toos. Con ellos ta bien. Dicir que you si fora'l Rei, tampoucu diba alcordame de Franco, que fou quién lu colocóu no que nun deixa ser un puestu funcionariu d'élite (un chollu, porque nun tien nin qu'aprobar un exame). Conque nada, Rei con tolos sous privilexos sí, ya si poudiera ser you... meyor inda.
Labels: Actualidá
![](http://www.alianzo.com/ranking-blogs/boton.php?url="htpp://www.munduxaime.blogspot.com")
