MunduXaime

Cuba... Cuba deixóu, con Fidel Castro, de ser colonia d'EEXX pa ser colonia de la URSS, agora ía un estáu al débalu. Pero eso nun tien que ver colos plantegamientos de Cuahtemoc. Cuba ía un país de colonización reciente: Nun hai amerindios. Colo que sedría un casu d'espoliu total (dende'l puntu de vista indíxena). Cuba saldría fuera del discursu de Cuahtemoc ya entraría dafeichu na esplicación del MPIL, col sou líder mesiánicu Fidel, qu'encaxa meyor na descripción del tópicu de dictador latinoamericanu marxista-antiamericanu.

Las revoluciones tan feichas pa camudar situaciones diversas. Una revolución pue ser ñiciu d'un gran cambiu. Por supuestu, munchas vegadas conllevan matanzas ya destruición. Pero cumo na botica, qu'hai de too. Nun se pue esqueicer que fou una revolución la que feixo de Francia'l país más modernu d'Europa. Ya outra, un sieglu nantias, feixo de Gran Bretaña l'estáu más avanzau económicamente del mundiu. Ya rodanon las tiestas más rexas d'esos dos países.

En cuanto a meter nel miesmu sacu a Salvador Allende, Alan García ya Fidel Castro... bono, el lliteratu Vargas Llosa sabrá... son líderes d'estaos hispanoamericanos. Pero eso pa outru día. El día que falemos de los cursos de la Granda ya los lliberales que tan tras ellos.

En fin. El comentariu esi del perfeutu idiota latinoamericanu ía un comentariu ensin munchu xacíu ya creo que nun ía aplicable a la población indíxena, más bien ya en tou casu, ta pensau pa los líderes políticos criollos ou blancos. Ía un documentu lliberalón ya de dereichas, que mira dende una óptica favoratible a las grandes industrias ya capitales americanos.

De todas maneras, el problema estructural de llatinuamérica vien por mor de la educación. Un gran déficit educativu, que fai que nun haiga desendolcu económicu, nin políticu nin social, correutu. Cumo exemplu, n'Arxentina, Menem convida a los sous votantes con un "choripán" (bollu con chorizu criollu) ya una cocacola si lu votan, pero Menem (Partido Justicialista), un políticu que nun se pue dicir que nun fora lliberal, llevou a l'Arxentina a la bancarrota (anque, casualidades de la vida, Vargas Llosa esqueicierase d'él. La vida ta llena de casualidades).

En fin. Gasto'l tiempu contestando a Ayalgueru, porque sei que nun ía un gastu inútil. Ésti home tien un blog mui interesante, ya veise qu'ía un tipu con una visión del mundiu basada na observación in situ ya na reflexón. Lo que se suel dicir, ensín dar puntada ensin filu. Poro, contesto'l sou comentariu, cousa que por outru llau nun suelo facer.

Pero nun s'ha opinar d'estas cousas tan a la lixera. Un líder mesiánicu (de los que tan grillaos) nun llega al poder asina cumo así. Hitler (que taba pa encerrar) nun gobernóu Alemaña (casí nada) porque sí. Fou por unas condiciones coyunturales concretas.

Ya n'América, los problemas nun son porque los indios seyan vagos. Son cousas más profundas... lo que la economía llama "condiciones estructurales".

Xalún

# ¡Las cousas qu'acontecen nesti mundu! "Poro, la realidá soupera la ficción" Diestru @ 6:02 pm