12/01/2007

 

Ya esto ocurréu en dalgún llugar de la Mancomunidá Vaquera...


Esta hestoria socedéu en serio. Nun ía chanciu nengún, esto pasóu de verdá.

Resulta que esieste una Mancomunidá Vaqueira, qu'ía un mancomunidá formada por dellos conceyos del oucidente astur: Tinéu, Valdés, Salas, Cuideiru ya Ayande. L'oxetivu d'esta mancomunidá ía fomentar el turismu nuna comarca de fuerte tradición ganadera, esto ía, diversificar actividades productivas, cousa que valdría pa que los campesinos que s'adauten pior a la política económica del mediu Rural (la PAC, conxuntu directrices comunitarias, impuestas a los estaos miembros de la UE dende Bruxelas) tean más recursos económicos, ya converxa meyor el campu asturianu.

Conque con esi enfotu, llegan fondos LEADER y PRODER a estos conceyos, ya constituín esi amestu. Ya los fondos vein destinaos a duas cousas:

-Proyeutos empresariales rurales ya souvenciones: Por exemplu, montar una fábrica de dulce figu. Ou criar ouveyas xaldas. Ou llimiagos pa xintar ("escargots"). Ou iguar una casina vieya pa turismu rural. Cousas d'esas.

-Meyorar infraestructuras, carreteras, servicios.. etc.

A la comarca buscase-y dalgo que-y dea consistencia, dalgo que xuna a esos cinco conceyos. Ya'l finxu común ía lo vaqueiro. La etnia vaquera del Oucidente d'Asturias. ¡Manteiga!

Conque organízanse mercaos vaqueiros, xornadas gastronómicas vaqueras, amuesas de folclor vaqueiru, rutas polas brañas... Ya se se vende lo vaqueiro digo you qu'había que mirar polas brañas, ¿acuéi?

Pos non. Nas brañas lo que faín ía espropiar tarrén vecinal, que por mor de la costume ía de la brañas ou de la parroquía -de xeitu bastante irregular, numái hai que ver los pleitos, soutoo'l de la sierra Boudenaya-, ya los conceyos llantan aeroxeneradores, esfaciendo las brañas, ya las vistas.

Ía curiosu cumo detrás de cada parque eólicu col tiempu sal dalguna irregularidá a la vista'l públicu. En Salas camudose un proyeutu ya ¡casualidá, cuoñu! dempuéis d'espropiar a mediu conceyu la Sierra Boudenaya, llantan un Molín de vientu nun Bardayu d'un conocíu conceyal. Ya cuntalu con tola cara. Lo qu'a min me choca ía ¿cúmo nun-y espropiarían a él tamién?

La xente nun-y fai muncha gracia'l tema los molinos ya yá houbo quien se queixara. Pero por supuesto, "Los de siempre" tán organizaos. La estructura caciquil respuende pola prensa. Un conocíu periodista argumenta, con tola cara'l mundu "qu'anque-y fadían la vista, agora tase meyor porque esto ía progresu, ya los ecoloxistas nun miran más alló de la sua visera".

A esti fatu integral you respondería-y -se touviera un res de gracia ya pacencia, ya quien me conoz sabe que teo d'eso muncho- qu'estrociar una sierra ensin cuntar col pueblu ía retrotaese nel tiempu un sieglu ou dos. Qu'a Asturias nun-y fai falta producir enerxía. Que se se contamina, que las empresas puengan filtros nas chimeneas, ou que nun traigan cianuru al conceyu. Que-y veiga llamar al Mittal ya-y diga que lo que fai nun ía progresu, ya que nun vei más alló del tupe. Que los aeroxeneradores puen tar mar adientru, cumo la peli d'Amenabar. En Gran Bretaña creyaron un arrecife artificial con molinos de vientu. Nun hai nin contaminación acústica nin visual, anque nun creo qu'entienda esti home esos conceutos. Que nun se pue andar pol mundiu de llistu, pa qu'outros s'enriquezan ya-y tiren a él un güesu debaxo la mesa pa que lu ruque.

Conque los molinos proliferan nas nuesas brañas, ya hailos que-ys presta... H.e h.e... Pero claro, hai intereses detrás económicos. Esto carrula asina. Ya las carreteras feichas una mierda. Ya dicen que van arreglallas. Nun se lo cree naide, por supuesto.

Prestaríame saber pa esta xente qu'ía'l progresu del que tanto falan. Qu'entenderán por progresu, ¿progresu personal seique? Nun sei. Pero nun me gusta.

Conque'l progre esi, ta tamién a favor de las canteras en Llinares, Camuñu ya Santuyanu, anque tol pueblu ta encontra dafeicho. Ya polas bonas, nun-y fain casu. Ya polas templadas tampouco... Colo que'l presidente de l'asociación vecinal de Camuñu tascouse cola Voz del Cacique. Esti ía un home tranquilón, bastante mahu, calláu, que feixo una casa bastante guapa en Camuñu, ya agora quieren poné-y una cantera nel patiu. El titular de la esplotación sedría Ubaldo, el dueñu n'Uviéu de la cafeteiría La Paloma. Pero quién da la cara colo del progresu ía l'outru fatu oficial:

-Que se da puestos de trabayu (mentira, una cantera da poucos puestos de trabayu, ía más, nesti casu mataría esplotaciones ganaderas, semas, montes que dan trabayu a maderistas ya traín cazadores, casas rurales...)
-Que s'Ubaldo tien bonas intenciones (Enriquecese por derriba de tolas cousas, al preciu que seya).

Ya, finalmente, l'home esi de Camuñu llamóulu "sinvergüenza" ou dalgo asina. Nada del outru mundu. Ya ésti, claro, ofendéuse. Pero las cousas son cumo son.

Ya lo más sangrín de too, ía que llaman a la xente que protesta "radicales". Hai que tener sangre fría pa dicir eso...

Pero volvamos a la elleutricidá. Asturias produz más de la qu'usa. Tién escedente. ¡Ya inda llantan más aeroxeneradores! Ya you entrugo ¿Pa qué?

A min prestaríame que se se quier producir inda más corriente, se faiga una "gran autopista" que la saque pa Madrid, Euskadi, Europa... ya se venda, ya lo que se saque, que tribute nuna axencia tributaria asturiana propia, a semeyanza del Conciertu Económicu Vascu... Diba a tar eso bien.

Pero claro las cousas nun son tan fáciles: Tamos n'Asturias. Tamos n'Asturias ya pa facer eso se nun estrozamos un parque natural nun quedamos a gusto. Conque nun se pue sacar al vies de la carretera ou vía Cantabria. Non. Lada-Velilla. ¡Tócate los maichos Pachín!


Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 9:13 pm
Comments:
http://www.lne.es/secciones/noticia.jsp?pNumEjemplar=1516&pIdSeccion=52&pIdNoticia=481851

Ya esto al día siguiente colgar esta entrada. Pa que veais...
# posted by Blogger Diestru : 10:23 am
 
Post a Comment



<< Home

This page is powered by Blogger. Isn't yours?