MunduXaime: ¿A qué vos suena esto?

01/11/2006

¿A qué vos suena esto?

El tema de la vecindá ía un tema bastante importante, nun vos creáis que non. Polonia por exemplu perdeu dellas oportunidades de medrar ya de desendolcase pola sua mala vecindá.

A Asturias puei pasai lu miesmu con dalgún outru veicín (aparte de Castiella, claro). Imáxinai lo peligrosu d'un discursu de medias verdades, ya cumo se puei componer. Imaxinái, imaxinái:

Imaxinade qu'un home/muyer arrel.louriáu/ada garra las riendas del Conceyu Salas. Ya que-y da por espandese a costa d'un veicín someyáu col que siempre houbo bona vecindá. Güéi tocou-y a Pravia.

Primeiru de too hai que crear unos mitos, dalgo que diferencie a Salas del restu. Asina, esta pequena hestoria, un pequenu discursu:

"Los homones son, según la tradición, quien moraba la tierra de Salas (áu las parroquias de San Vicente, Villamar, Santa María Salas (la Pola) ya Godán. L.lou cheganon los salenses ya nuna l.luita feroz derrotan-ys ya fundan la vil.la Salas (esta llenda ía verdá). La hestoria de los homones ía paecía a la de los firborgs n'Irlanda. L.lou, los Salenses son un pueblu harmanu a los irlandeses, que cumo son Celtas nós tamién. Cocretamente nós soumos pésicos, una raza distinta.

La l.lingua nuesa tamién ía especial. Nós falamos asturianu, el dialeutu oucidental. Esti, xébrase en cuatru soudialeutos. Bien. Nuna pequena parte del conceyu fálase cumo en Tinéu, Valdés, Cangas, parte Ayande ya parte Navia. Más en concretu, cumo se fala nas Vil.las de L.luarca, Tinéu, Navelgas, Cangas, La Puela, Trevías, La Espina, Veiga... Que concentran la mayoría de la población del oucidente. Antoncias, nós por mor d'algamar un mayor mercáu comercial veimos usar esi dialeutu. Chamaremos a esa corriente "reintegracionaliega". ¿A que vos suena?

Inda, más. Se na l.lingua nós someyamosnos a la parte alta del conceyu Pravia (ía dicir, nós nun tenemos neutru materia ya nós dicimos "curredor" por cuenta "correor" yá tá armada. Porque en Pravia hai una parte (L'Auteda) que nun tien neutru materia ya diz "curredor", ya outra (los valles baxos, los rañegos) que dicin "correor" ya tienen neutru materia.

Amái, el tema compíicase cuando dellas parroquias del conceyu de los Cuervos patenecieron a la Puerta l'Oucidente fasta 1926-1927. Tou falando de Corduveiru, Folgueras ya parte de Villavaler ( fasta Llomparti, peimeque fora de Salas, pero las tierras altas; el valle siempre fou Pravianu).

Estas tierras, cumo Salas, tienen población vaquera, qu'ía la población de Salas, ía que nós tenemos l'elementu pésicu (ya analóxicamente "vaqueiru" qu'ía la castra pésica más pura n'actualidá, nu sangre. Bien, anque la xente d'esa parte Pravia nun fale salense bonu (falan un deriváu ensin la l.l ya ensin outras cousas más nuesas), tienen rasgos comunes cumo'l caltenimientu de la -d de corredor (curredor) ya la perda del neutru materia.

Ta tamien la coyuntura ya la tendencia política dambos territorios. Salas ía tradicionalmente una tierra d'izquierdas (esto hai qu'entecomillalu). Pravia, más reaccionaria ya conservadora, de derechas. Gran parte de la izquierda praviana ya de l'asturianismu pravianu ta relacionada col conceyu Salas (ya esto na vida real ía verdá, pero nun vou entrar en detayes).

Poro, las tierras pravianas de Folgueras, Corduveiru, Villavaler, Inclán, Arangu, Sandamías ya Courias ya Quinzanas han conformar el quintu coutu del Conceyu Salas: "L'Arangu-Narcea"."

L.lou hai que falsear cuatru cousinas que se paezan ente las duas tierras, la zona "invasora" ya la zona "invadida":

"Amái, esta xente a parte la l.lingua, ya la raza, ía una cultura típicamente agraria, con emplazamientos industriales a "pie corte". El.los tienen "Limpac plastic", la única industria praviana. Cumo Salas cola Danone ou La Espina cola Cerámica. Poro, la sua economía ya'l sou xeitu vida ía vaqueiru, ya Salense"

Ya finalmente, atacar:

"Si, rapaces, Salas son los cuatru antiguos coutos: Llinares (Maeza), Soutu los Infantes (Salas), Las Dorigas (Corniana) ya L.laviu (La Espina); más agora L'Arangu-Narcea, cuya capitalidá nun ta inda mui definida. Ya la población d'esti últimu veimos referinos a el.la cumo "Arrayanos", "estimeiros" ou "Arangunarceyanos". Ya'l sou dialeutu (que conforma la l.lingua Salense) sedrá definíu unilateralmente dende la vil.la Salas (por exemplu) cumo "arangunarceyanu"."

Ya agora, unos testimoninos, pa ciarrar:

"Si, ía verdá. You cuando vou a outras partes del Conceyu Pravia falo n'Asturianu estandard. Pero cuando vou al Arangu-Narcea falo cumo en Salas ya la xente entiendeme"

"Nun chigre en Veigafriosa entréi ya punxeme a falar con unos amigos del pueblu. Falabamos n'Asturianu estandard. Ya díxome la chigrera "Cuatro salenses ya falando cumo nas Cuencas". Ouviamente camudamos el rexistru ya entamamos a falar cumo se fala a 2 km, na Aldeya de Prada (Co de Sl)."

"Ía alucinante. La frontera cultural ente Salas ya Pravia nun ta nada bien definida. Andando por Pravia ía impresionante la nitidez cola que chega la señal de TeleNarcea (la canal qu'emite dende Salas, concretamente dende Corniana). La señal chega muito bien fasta la vil.la Pravia".

"Entrei nuna fiesta prau nu Arangu-Narcea. La cultura de la fiesta Prau ya los chigres adentrase cuasi fasta la vil.la Pravia. La situación yara la miesma que en cualisquiera xira salense. Primeiru sou la 1 los vieyos vein a Misa. L.lou sacan el Santu en procesión. Chega, dempuéis, el vermú. Ya la xente vei a la barra a tomalu. A la houra xintar, la xente xinta en familia nu práu, a vedes ente varias familias, cumo se fai en Salas. Pero hai, nun acaba la cousa. Esta xente amái, suelen dempuéis de comer, revolcase pol práu, ya más sero, cola orquesta dir a la barra "a chumar" ou a beil.lar delantre l'escenariu la orquesta. Todas estas costumes vense tamién, anque con muita más vitalidá, en Salas"

"Ía común ente las fasteras más cercanas a Corniana (Lluercis/ L.luerces, Ripollis/ Repol.les...) ver a la xente en Corniana, facienlo las suas compras ou simplemente tomando polos chigres un caféi."

Voilà! Ehí teneis. Una parte Pravia ía Salense, fou usurpada, ya anque el.los nun lo seipan l.levanlo nu sangre. Hai que-ys lu predicar... Ya al restu pravianos desixi-ys que nós pidan perdón!!!!

Labels: Arango-Narcea

# ¡Las cousas qu'acontecen nesti mundu! "Poro, la realidá soupera la ficción" Diestru @ 1:27 pm

Comments:

Hai que camudar las ordenanzas del conceyu, pa poner que las parroquias del "Municipio de Pravia" que quieran pueden amestase a Salas.

Ya de paso veimos a salenizar los sous nomes d'alcuerdo al dialeutu reintregacioniegu, qu'ía lo que se fai nestos casos pa que seyan más nueso:

Nome antiguu Nome nuevu:
Villavaler Vil.lavaler
Folgueras Folgueras
Corduveiru Cordoveiru
Arangu Arangu
Inclán Enclán
Selgas Selgas
Sandamías Sandamías
Courias Courias de Salas
Quinzanas Quinzanas Baxa

# posted by

Diestru : 1:46 pm

Pd. Ya los Pixuetos, salenses de mar!!

# posted by

Diestru : 2:32 pm

Sí, sí veti pensando n'atacar, que las milicias populares antipravianas tamos naguando por un Davicistán Llibre y soberanu. Puxa la República Democrática Popular del Davizistán! Abaxu'l colonialismu pravianu!

Un abrazu pelgar!

# posted by