MunduXaime: Lletra abierta de MunduXaime sou la Gold Mines Rio Narcea

25/10/2006

Lletra abierta de MunduXaime sou la Gold Mines Rio Narcea

"Miércoles, 25 de Ochobre de 2006

LA MULTINACIONAL FACTURÓ 400 MILLONES D'EUROS EN 10 AÑOS DE LLABOR

Río Narcea entama'l pieslle de les sos mines d'oru nel occidente asturianuRedacción24/10/2006 Los primeros 32 trabayadores afectaos pol pieslle de les mines d'oru que tien la multinacional Río Narcea Gold Mines en Salas y Balmonte van dexar el tayu'l día 2 de payares, cuando va entamar l'espediente de regulación d'emplegu pol que va mandase l'abandonu de les operaciones nes mines y qu'afecta a 161 trabayadores.

El pieslle definitivu de les mines va producise ente'l 15 y el 20 d'avientu, anque van quedar media docena de trabayadores en llabores de caltenimientu de les esplotaciones, en cuantes que la empresa nun cuenta con desfacer les mines entovía. D'equí al mes d'avientu va facese tamién nes instalaciones de la empresa'l procesu de tratamientu del últimu cargamentu de mineral d'oru que llergare de les sos mines en Groenlandia, onde les lleis daneses sobre mediu ambiente nun consienten facer estos procesos.

La multinacional del Canadá Río Narcea Gold Mines (RNGM) anunciare la so intención de pesllar les mines de Cangas y Balmonte'l pasáu mes de febreru, ello dempués de que'l Gobiernu asturianu refugare, énte les protestes de los vecinos, les solicitúes de la empresa pa entamar una nueva esplotación a cielu abierto en Salave, conceyu de Tapia,onde contaba con facer una mina a cielu abierto a pocos metros del mar.

Nun intentu por consiguir daqué beneficiu de la fallida operación en Salave, pa la que llegó a facer sondeos y prebes, RNGM tien entamaos dellos pleitos contra'l Gobiernu asturianu. Dende la so llegada a Asturies nel añu 1996, RNGM invirtió cerca de 50 millones d'euros n'echar a andar les sos mines, estrayendo d'elles alredor d'un millón d'onces d'oru y facturando por importe de cerca de 400 millones d'euros."
(información sacada del diariu dixital Asturies.com)

La Rio Narcea Gold Mines vei peichar. La xente de Salas ta indignada. You alcuerdome de nenu cuando-ys dicía que las minas, nun sei, nun me prestaban. You sintía falar de las Cuenques Mineres que taban en crisis. Cuando entrugaba'l porquéi, dicíanme que yara que'l carbón taba escosáu. Ya nun había, ya tol sistema económicu creau al albor de la minería españaba nuna recesión económica ya social. Amái, el mieu buelu fora mineiru na cuenca'l Narcea, ya morreu silicosu a la edá de 53 años. Entós, you, probe guah.e, nun entendía cumo la xente quería las minas por derriba de cualisquier cousa.

Una economía dependiente del seutor estractivu a la llarga acaba nun llongu períodu de recesión económica. Eso ta probau. Llou, se pa encima ties una clas política dinámica cumo l'asturiana la cousa ía seria. Porque tamién na Gran Bretaña'l carbón escosouse. Pero claro, la clas política inglesa -mau, las comparación seique son odiosas- nun tien nada que ver cola asturiana de la España Autonómica.

La Rio Narcea feixo lo que feixo. Diou trabayu a unos poucos, bien pagaos, ya allégrome por ellos, porque dalgún ía amigu miou, pero lo que realmente feixo ya vieno facer fou sacar l'ouru. Llevalu pal Canadá. Ou los cuartos d'esplotallu. La plusvalía, que dicía Marx. Eiquí quedaron unos sueldos, diez años de sueldos, ya alón. Las riquezas d'esta tierra asturiana foron esquilamadas pa siempre, hipotecadas por una efímera ilusión. Colas minas, remembro que de la qu'entamaron la xente pensaba qu'esto diba convertise nas cuencas mineras nos años 70 ya 80 cuando corrían las perras. Pero eiquí non.

Truxeron maquinaria pesada d'EEUU ya Gran Bretaña ya a esfarrapar monte. Ya cumo'l gobiernín d'Areces ía mui modernu, p'asegurar el progresu ya'l desendolcu económicu de la comarca permitíu que llimpiaran material traío de Groenlandia, ya eiquí llega'l tema de la balsa cianuru. Cuando los trabayadores de la GMRN trabayaban ya producían yara verdá lo del bilordiu esi. Agora que la empresa diz "buó, salaos, ehí vos quedáis" esta xente acoyonóu, ya lo únicu que se-ys ocurre dicir ía que nun esieste cianuru nin degradación mediuambiental. Ya la GMRN, los americanos que dicían en Salas, colos cuartos en bolsu. ¿Áu ta'l progresu?

Salave. Tapia de Casariego. La xente de Balmonte ya Salas sientese traicionada pol conceyu estremoucidental. Porque nun entaman a esfarrapar la sua playa pa producir ouru pal canadiense. ¿Pero con que dereichu nós-ys desiximos qu'estrocen el sou patrimoniu territorial, mediuambiental, familiar, social, económicu, espiritual... en definitiva, lo que ía d'ellos ya naide, nin salenses, nin mirandeses, nin Tini, nin PSOE, nin PP, nin Canadá nin EEUU tienen dereichu a ello?

Los de Salave, a la llarga, ya dici-yslo un salense, nun se vein arrepentir nin un res, feixeron lo correutu. Ixo por ellos.

# ¡Las cousas qu'acontecen nesti mundu! "Poro, la realidá soupera la ficción" Diestru @ 9:30 am