MunduXaime

Añu 2006 D.X. Tou l'Estáu ta inmerso nuna reforma d'estatutos d'autonomía... Tou l'Estáu? Non, una Principáu resieste ya resiesterá al envite estatutariu... ya la vida nun ía fácil nesi Principáu...

Arecix: El nuesu héroe, intrépidu a la par que valiente. Cenciellu ya campechanu.

Lastrolix: El sou inseparable amigu, un pouco brutote, pero afatáu. Cuando vei asturianistas lliase a mamporros con ellos. De guah.e cayóu nuna marmita oruxu'l país, ya quedóu ensín aire na tiesta. Gustan-y las xovencinas afiliadas a las Xuventudes Socialistas.

Villanix, el xefe l'aldeya, numái tien miéu a una caída nos fondos mineiros, pero cumo el diz eso nun ocurrirá fasta mañana. Fala "bable" na intimidá.

GustavoBuenix: El bardu de l'aldeya. Las opiniones al rodiu d'él tan xebradas. Pa unos ía un cafiante pa outros simplemente ía fatu.

Bernardofernandix, el druida. El sou llabor consieste n'axeitar "dictamenes realizados por el consejo consultivo sobre la reforma del estatuto de autonomía "para" Asturias", dictames que por outru llau naide entiende, ya él esplica.


Pueis tamién ía mala suerte pa Asturias. Que seyamos tan fatos, teniendo nos cuadros políticos una élite d'estadistas tan brillantes. Areces, un home elegante a l'altor de Villepin... Lastra, ou l'harmanu fatu de Forrest Gump. Villa, cuya cara ta iguada col material más duru que conoz la humanidá, el "Villanio". Gustavo Bueno y los "bienpensantes"... lo bono d'Asturias ía tolo acoyedor de la sou xente. Dacuando nun medimos las consecuencias. La hestoria de Gustavo Bueno ía la de tantos nazis fugaos a sudamérica, ya reintegrados. Esti ía un falanxista fugáu a Asturias, al que ún periodicu falanxista (LNE) da-y coba cuanto pué. Bernardo Fernández... autor del citáu dictame. You lleeralu, ya entendilu a la perfeición. Cumo'l PSOE ta entamando pol estáu reformas estatuarias, n'Asturias tamién. Anque sinceramente, cumo dixera Javier Fernández, nun fae falta dala. N'Asturias tase bien, pero nada, ho, reformaremos daquéi.


La xente de xuru entendióu'l dictame consultivu. Pero esti home, Bernardo Fernández, echando-y cara, diz que naide lu entendiera... Préstame ver lo qu'esta xente piensa sou los asturianos. Que soumos fatos. Poro, el nuesu estatutu vei ser non un estatutu de mínimos, sinon de fatos.¿Ya que ponía'l dictame? Nada importante. Qu'Asturias ía una grande ya llibre, que la llingua d'Asturias ía l'asturianu, qu'ía un estorbu, polo hai que facer una norma programática pa desaniciallu, ya que toos falemos llibremente castellanu, llingua por outru llau imperial, que n'Asturias bébese sidra, que'l feichu diferencial asturianu ía la Universalidá (eso equival a eso de que la identidá asturiana nun vei tar politizada... ¿¿¿entós pa que sirve un estatutu d'autonomía???).


ía increyible. You. una persona tan moderada nel tema d'Asturias... pueis paezo un separatista. Non, numái pido, ya entiendo cumo'l restu d'Asturianos que Asturias merez lo mesmu que la comunidá autonoma que más mereza d'España. Siempre cola llegalidá establecida. Polo menos tanto como Cataluña, País Vascu ou Navarra... ¡FALTARÍA "PLUS"!

Bou, pos you vou facer un estatutu d'autonomía pa las Outedas, cumo parte integrante del conceyu Salas. Bono, vou facer cumo Comisión executiva un proyeutu d'estatutu d'autonomía pa las Outedas. Que ía lo mesmo que dicir que sou un colgau que vou poner lo que me salga de la caxa música.


PROYEUTU D'ESTATUTU D'AUTONOMÍA

1- El nome de la la faza vei ser "OTEDAS".

2- La bandera vei ser una una P escura enriba un fondu blancu (quién seya de Maeza conoz el por quéi).

3- La llingua oficial, l'inglés.

4- La capital de las Otedas vei tar sita na ciudá Pravia.

5- Competencias, las minimas. Nin carreteras, nin montes nin praos. Numái una vede al añu llimpiar un pouco los cementerios, pa fines d'ouchobre.

Esti ía un bon dictame consultivo pa facer una reforma del estatutu d'autonomía pa las Outedas (numái nos faltaba tener un estatutu d'autonomía vieyu). Agora, cumo seique naide lo entendéu (ía lo que tienen estos dictames), vou esplicallu:


FUNDAMENTOS XURÍDICOS

1- Otedas queda más fermosu qu'Outedas. Outedas suena a pueblu, a aldeyanu, a de la braña, ya nós nun nos identificamos con esas cousas. Otedas ía más finu, más de fuera.

2- Home esto ta claru. El carbayu vieyu colas ruedas, símbolu de la casa Maeza, qu'antañu gobernaran las Outedas con manu fierru, a la gueta'l porgüeyu personal... güéi da más el turismu. Hai qu'andar colos tiempos... tiremos tolos carbayos, fayas, fresnos, teixos ya faigamos plazas de garax.

3- Somos Castilla, diz una conceyala del PSOE de Salas a propósitu del tema de lo de los espedientes pala revisión toponímica de los conceyos. Bono. Nas Outedas "semos" europeos. El principal rasgu identitariu de la comarca norte de la montaña Salense, las Outedas, ía la migración de los sous fiyos por años a ultramar, al estranxeiru... La Universalidá. Poro, ¿habrá
idioma más universal que l'inglés?

4- Ía que a nós nun nos prestan esas cousas de gobernanos, ía una pérdida de tiempu. Prestanos más que nos gobierne'l veicín, ya nos trabayar pa él. Poro, trabayamos pa la Ciudá de Pravia, qué amái, ía ciudá.

5- En rellación al artículu anterior, nun queremos competencias nenguna. Tenemos unas carreteras... Son las nuesas vías públicas monumentu nacional. Al qu'alcuentre un llugar pa llantar outru bache damos-y un xamón ya una botella vinu. Queda asina afitáu por llei.

6- Cumo soumos los más grandones, esto ía pa tola xente que quiera esfrutar de tolas comodidades de tar rexios por un estatutu d'autonomía tan llográu (eso sí llibremente).

Bono, agora mesmo lo traduzo al "cajteiano" pa llevallu a la Cá'l Conceyu, a Salas... nun creyo que me lu aceuten... ¡¡¡Ai, si soupiera you catalán!!!