25/01/2008

 

Españolidá

Eleiciones a España nesti prósimu Marzu. España más rota que nunca, acude al rescate'l PP, tamién más rotu que nunca. En Madrid, boutan al centrista Gallardón ya apuestan por políticos de llinia dura cumo Esperanza Aguirre (curiosu, tien nome vascu).

N'Asturias nun quixeron fer menos, ya tamién escachanon el PP provincial: Gabino de Lorenzo dixo la verdá a Ofidio "áu vas, si nunca ganesti unas eleiciones". You pienso que diba con segundas a Isidro "tía Nemesia" Rozada, pol casu Pilar Pardo. Una Pilar Pardo, que ser sedrá de dereichas "cumo Dious manda", pero polo menos fai oposición, ya amai ta más averada al centru que "Tía Nemesia" Rozada. Amai, d'amái de too, fala asturianu, ya ía una cousa mui guapa, cuando una muyer guapa lo fai. Anque sía del PP.

Sí, España ta más rota que nunca ya nun hai igua.
Non obstante, espertos norteamericanos atoupanon el nexu d'unión de tolos españoles, lo únicu que nos une (Descartamos el tema l'himnu, nun ponemos nada por ridículu... ya porque danos pena l'autor)



LAS PATACAS BRAVAS


Pos yá yera hora. Las patacas bravas son -según espertos americanos- lo que más une a tolos españoles. Tán ricas, son bonas ya accesibles de preciu. Amai, col cuentu que pican, cumo que llaman a ser comida pa un grupu personas.

De toas maneras, yá houbo xente que se desmarcóu "balcanizando" (¿ou yera "vulcanizando"?) España.

Sí, un tal Jiménez Losantos aprució diciendo (en tonu acusica) que Carod Rovira andaba diciendo que, a él, prestaban-y más al "all i oli".

En Euzkadi dicen que patacas sí, pero non bravas. Eillí las patacas tien que ser al "pil pil" mínimu. Ou sinon la salsa brava a puru güevu, ensín patacas.

Dende Galicia dicen qu'ellos nun comen patacas, qu'ellos comen "Grelos".

Los Andaluces dicen qu'ellos nun comen patacas más que fritas, ya ensin salsa.


Pos bien, dende Asturies, houbo xente qu'afitóu que las patacas tenían que ser al cabrales, ya pa que nun haiga alitosis, con un bon cachopu. Ya un poucu vinu. Ya arroz con lleiche. Ya una copaya d'oruxu. Ya una booona siesta -española- dempués.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 6:43 pm 0 comments

14/01/2008

 

Nun querías taza, pos taza y media

GOBERNAR EN COALICIÓN COLA SOCIEDÁ

Albert Einstein, l'alemán esi que taba cumo una paxa figos, ya que nun se peinaba'l pelu, dixo una vegada que "too yera relativu" ya enuncióu la "Teoría de la Relatividá". Por tamaña tontería dieron-y un grammy. ¿Ou fora un oscar?

Bono. Si por esta pamestada lu premianon... ¡qué nun fadrán cola última de la F$A! Si ho, la de "gobernaremos en coalición cola sociedá". ¿Cuála sociedá? ¿La miesma qu'esti 24 de Payares, nun día de lluvia, salíu a la cai pidiendo lo que lleva pidiendo trenta años? ¿La que ta farta dicir eso de "Caliao non"? ¿La qu'asoróu colo de Cándido ya Morala? ¿La que marcha pa fora porque n'Asturias nun hai trabayu por mor de la política de turismu baratu que (bien-y diba prestar) quier sacar alantre'l Gobiernín de "Provincia"?

Ía cousa chocante cumo Jesús Gutiérrez, Fernando Lastra ou Javier Fernández (ésti nun ía'l "macacu" nin mayor, nin menor nin del mediu; esti ía un monu-tití más bien) dicen eso de que cumo nas eleiciones cumo la xente votóu F$A, l'asturianu -por más que los medios d'información qu'ellos controlan (RTPA) digan que "20.000 personas (ensin eso de "según la organización") salieron a la cai nuna mani pro-oficialidá" pos nun tien demanda social.

Digo qu'ía chocante ya confusu, porque agora, cumo siempre qu'ún cuspe altu -ya estos llevan ya duas décadas- cai too enriba, a estos asocede-ys lo miesmo. Nun son quien sacar unos presupuestos alantre porque la sociedá sofitóu nas eleiciones de 2007 al PP ya a IX-BA-LV.

Yá ven, entroncando col razonamientu d'Einstein (premiáu, por outru llau) si la sociedá votóu a los que nun quieren presupuestos cola F$A... ¿Cúmo vei gobernar la F$A cola sociedá? ¿Con Cuála? ¿Cola que vota nacionaliegu? ¿Ou cola que vota coloráu -siguiendo fieles a los principios marxistas más clásicos?

En fin. Esto ía Real Politik. Diba tar bien que dalgún partíu minoritariu d'esos que tán sapozaos -asturianistas- sacara tayada. Pero nun se vei dar el casu. Pa outru día falamos de los asturianistas.

Labels: ,


# ¡Las cousas qu'acontecen nesti mundu! "Poro, la realidá soupera la ficción" Diestru @ 11:46 am 1 comments

This page is powered by Blogger. Isn't yours?