30/03/2007

 

Un pequenu conseyu

NA CARRETERA CUIDADÍN



Resulta qu'un amigu miou vei esti finde pa Galicia. D'asuetu. Ya entrugame dalgún sitiu ou cousa pa ver pola ciudá a la que vei (una ciudá de Galicia). You respuendo, pero a parte d'eso dou-y unos conseyos pa garrar nestas vacaciones el coche.


Ten cuidáu, que la xente anda cumo cafres. Ten cuidáu que tu ías el más cafre de toos. Si ties prisa vei despaciu. Nun adelantes en raya continua. Si conduces, bebe augua, lleiche ou zume, nunca alcohol (perdes coordinación) nin caféi nin coca-cola (ganas demasiada).

Porque al volante... al volante la xente tresformase. Sobro too nas situaciones de llímite ya fatiga al conducir. Sal lo más fondeiru d'ún a rellucir.


Hai conductores míticos. Tan los Madrileños. Temerarios nas rectas, cuando vies de Madrid p'Asturias, pásante cumo bólidos en Valladolid. Llou atópaslos en Llión, cuando s'entama a xubir p'Asturias. Cuestan-ys xirar el voltante, nun tan avezaos.

Los canarios. Mamma mía. Energúmenos cuando garran las carreteras de Castiella. Nunca la vieran más gorda, con esas rectas tan grandonas. Bono neso someyanse daquéi a los asturianos.





Llou tamien tan los guardias de tráficu. Vou apurri-ys querios suscriptores, dellos conseyos pa tratar con los miembros d'esti cuerpu del estáu:

Vustedes vein pola carretera ya vein nantias de llegar a una rotonda un coche de tráficu cola pareya guardias. Paranlos. ¿Qué fairan?

a) Ponese a negociar con ellos (Conductor catalán)
b) Ponese a discutir ya pelear con ellos (Conductor vascu)
c) Parar cien metros antias, que veigan a la contra los guardias, entruguen a los conductores que socez ya retruquen estos: "Eu non sei" (Conductor gallegu)
d) "You si ties que multame, múltame, sedrá por cuartos" (Conductor asturianu)







En xeneral, cola carretera prudencia, que deixa más muertos que la ETA, el Prestige yal Casu Campelo (volve a la palestra) xuntos

24/03/2007

 

Pasos pa tramitar

PASOS PA TRAMITAR N'ALMINISTRACIÓN ASTURIANA POR PARTE DE LOS FUNCIONARIOS DE LA MIESMA



(Nada ía tan fácil cumo paez, Llei de Murphy)



D'alcuerdo colas paradoxas de la tramitación n'alministración asturiana por parte de los funcionarios de la miesma, espedida nel BOMX (Boletón Oficiosu de Mundu Xaime):

PRIMERA: Si au se vei tramitar ía Asturias, nun s'ha facer en nenguna de las llinguas asturianas, talo asturianu neto eonaviegu.

SEGUNDA: N'Asturias, ya conforme a la primer paradoxa, ha tramitase preferiblemente en castellanu, gallegu, catalán, vascu, aranés, inglés ou cumo muncho francés ou portugués.

TERCERA: N'Asturias, los funcionarios tan baxu un réxime especial de dereichos ya llibertades, venceyaos a la coyuntura política imperante.


Forma de cumplimentar un impresu de solicitú, ou requerimientu diversu a l'alministración:

MODELU "A": La parte contratante de la primera parte ía igual a la parte contratante de la primera parte ya la parte contratante de la segunda parte. (Siendo la segunda parte contratante'l funcionariu que tramite n'Asturianu ya la primer parte, l'Alministración)

MODELU "B": Ehhhhh, si bono si, ¿non? (Basáu nel principiu xurídicu-social castellanu "Donde dije, digo Diego, y donde digo ya diré")

#Dellos conseyos pa cumplimentar meyor la tramitación:

Briconseyu (1): Si pue tramita-ylo daquién, que-y lo tramite

Briconseyu (2): Si pue tramitallu fora d'Asturias, veiga fora d'Asturias

Briconseyu (3): ¡Afílise si pue al SOMA, cuoñu!




Tolo anterior resúmese nel proverbiu "Quién tien llarga la llingua, val-y tener duru'l llombu"
oficialidá darréu!!! oficialidá darréu!!!

18/03/2007

 

Isa lingua galega!!!




Esta ía una d'esas noticias paranormales qu'asoceden n'Asturias. Resulta qu'un funcionariu del Principáu unvía una tramitación pa sou, pa la sanidá asturiana, ya dicen-y que nun pue tramitar pa sou na sanidá asturiana, you nun sei si por tar n'asturianu, ser funcionariu ou ser asturianu. Eso nun lo teo claro.

A esta riestra concurrencias a nivel xuridicu-alministrativu-asturianu you llámolu la "paradoxa del ciudadanu n'Asturias". Porque n'Asturias ser ciudadanu ía una cousa... chocante.

Na Zapatilla Verde (esti nome inventelu you) ún pue tramitar en catalá ou en galego una solicitú pa ingresar nun hospital pa que te miren la didona, pero nun lo pue facer nas llinguas llariegas, asturianu ya eonaviegu. Primera paradoxa.

Tamien, noutras rexones d'esti Reinu tan Real los funcionarios suelen poder tramitar las solicitudes pa usar las intituciones ou servicios públicos de la sua autonomía correspondiente na sou llingua llariega (gallegu, catalán, Vascu, aranés ya Castellanu), a nun ser que seyan asturianos, que cumo'l restu la población asturiana nun pue solicitallo nas sous llinguas llariegas: asturianu ya eonaviegu outra vuelta. Segunda paradoxa.

Finalemente, los funcionarios suelen tener polo menos tantos dereichos cumo'l restu ciudadanos (por ser ciudadanos a fin de cuentas) n'Andalucía, Lleón, Madrid, Aragón, Murcia... etc, menos n'Asturias, que nesti sen nun puen usar (cumo'l restu los ciudadanos d'Asturias) las llinguas propias d'Asturias, que nun vou volver dicir que son l'Asturianu yal eonaviegu. Tercera paradoxa.

Bono. A estas alturas del xuegu a min esto nun me sorprende res, claro. Pero bono, hai xente que vien de fora ya, pue chocái. Mao, non ía mentira claro que me choca. ¡¡¡¡Fasta a LA NUEVA ESPAÑA-y choca yá esto!!!!

Cono que camiento que pa la prósima reforma estatutaria, el nuevu estatutu asturianu tenía que poner nel sou aparatáu pa la llingua:




Artículo 4 Futuru:
1. Las llinguas propias d'Asturias son l'asturianu ya'l eonaviegu.
2. Numái l'idioma castellanu ía oficial n'Asturias ya toos tienen el dereichu de conocellu ya usallu, ya inda más, la obligación.
3. Los poderes públicos d'Asturias garantizarán l'usu normal ya oficial del castellanu ya potenciaran el sou usu ya difusión na Rexón.
4. La xente podrá ser discriminada por mor de la llingua.


Copíai ya difundí preí!!!

Amiguinos, esto vei por esti camín... Asina qu'a resignase ya fodeses... xuntos ou xebraos


Labels:


17/03/2007

 

Güel a pelotazu en tola riela

UVIEDÓN A LA VISTA!!!


Los asturianos somos lo más grande qu'hai. Ya amás tenemos un presidente que lo val bien. Nel sou primer discu, 50.000 copias, numái sacallu. Nin Llan de Cubel nin Tejedor. Discu d'ouru cumo quien nun quier la cousa.

Ya los asturianos qu'índa tamos axoraos, vei, ya vei más llonxe. Porque eiquí las cousas son a lo grande.

Resulta que na metada d'Uviéu llanta un aparatu pa congresos, áu taba nantes el Carlos Tartiere, l'estadiu fúbol del Uviéu. "Aparatu" nunca meyor dichu. Cuando s'acabe de construyir esi monstruu nun se vei saber que fou nantes, si esi palaciu ou el barriu Bonavista. Porque nun pega nin con cola, pero cumo pelotazu nun houbo tar meyor.

Dempueis d'eso, nun contentos con eso, las nuesas élites políticas vein facer (ya llámase asina, en serio) un "tren-tran" (que you pienso que nun ía esi AVE quieren posar n'Asturias a too trance). You lo del "Tren-tran" ía un asuntu que bien me choca nun vos creáis. ¿Cúmo nun se-ys ocurreiriase nantias a naide? ¡Esa ía la solución a los problemas d'Asturias un "Tren-tran"!

Pos pa Salas pa nun ser menos yá you faléi col alcalde pa que nos punxera a nós ún, dende Corniana a La Espina, con parada en Salas, ya outru de Maeza a Salas, ya esto vei ser la bomba!!!

Pero por cierto. ¿Qué ía un tren-tran? Pa esclacevos lo qu'ía, faigovos un bocetu cumo'l que-y llevéi you al alcalde Salas, ya pa convencellu, punxei una chimenea, pa que vea cumo contamina!!! (Contaminación= progresu= perras)


¿Qué vos paez? Teunoloxía punta!!! El que conduz amái ía primu míu, colo que afítase nel Tren-tran salense esa figura (que nun sei si'l dereichu consuetudinariu compiláu recién pola Xunta Xeneral contempla -fai munchos años qu'estudié Dereichu Asturianu... trés yá) ya que nun ía outra que l'Enchufe.
Bono siguimos. Aparte de qu'esti tren contamina munchu, ya eso ía bono, veimos arrexuntar la xente tol Conceyu Salas nos Piqueiros en Salas, veimos contruyillo too, nun vei quedar en tol valle de Nonaya al sou pasu pola parroquias de Salas, Villamar ya San Vicente nin un metru verde. P€lotazu cumo Tini manda.

Porque nun veimos ser menos que los Uvieínos. Quieren facer alrodiu del Tren-Tran una mega-urbe cumo Llondres, París ou Nueva York, con gangsters ya too. Eiqui a lo grande. Por falta cuartos que nun quede.
Asina, queridos, vei ser esautamente Brañes (Uviéu) dientro d'un par d'años. L'Asturias que quieren los Asturianos. El Paraísu Natural, de Bubu ya Yogui (Bobu ya Yonqui más bien).
Pos nada neños, si l'alcalde Salas nos pon el Tren-Tran en Salas ya vos daréi una vuelta preí con él. Dicen las malas llinguas que ta duldiando...

Labels:


02/03/2007

 

L'Asturias que quier Vidi


Inda lo flipo. Ya nun tomo nenguna droga, nin fumo cousas raras. Pero ía muncho lo d'esti paisanu. Una selmana entera pa dixerillo. Pero you, en tol reinu nunca viera una cousa someyada.

Resulta que Vidi Sánchez diz qu'Asturias precisa un estatutu d'autonomía qu'axeite esti país dientro d'una España Invertebrada cumo una Rexón de Segunda. Esto dizlo un traidor a la patria que presentase a las prósimas elleiciones cumo cabezaleiru del PP. Ya lo peor d'esto ía qu'ía verdá.

You yá, xente, plantégome fasta si nun pudieramos pidir a Madrid la devolución del estatutu d'Autonomía ya que nos gobierne Madrid direutamente. El Reinu d'España xébrase en 16 autonomías más la rexón d'Asturias. La verdá ía que l'estatutu nuesu, con tolo que digan, quédanos inda mui grande.

A min prestábame saber que proyeutu tien ou quier facer Vidi n'Asturias. Qué Asturias quier. Una Asturias colonial.

Trés vegadas presentose Vidi a la presidencia d'Asturias. Perdéu duas, ya esta nun sei por que, pero dame que tamien vei di-y, cumo dicimos en Salas cuando dalguien pierde colas cartas, pa Outeiru.

En fin, nun pueo facer más comentarios, porque nun me cabe na tiesta (ya teola grande) estas afirmaciones del fatu ési. Con mui pouco, baltiaba de la poltrona a Areces, pero paez que nun quier.

Asturias, una rexón con un fuerte calter d'insularidá (de magar tea axeitada ya llende col contienente: ía parte del miesmu), con una personalidá mui fuerte dientro del conxuntu español, con una Hestoria nacional propia. El país ibéricu más européu, país verde, atlánticu, ensín herencia musulmana dala.

Asturias un país con una crisis económica que vien de vieyu, motivada polas deficiencias estructurales de sou ya d'una mala planificación económica. Con necesidá d'autoxestión de lo de sou de vieyu...

Pos non. Pa grandes nós. Vidi promete si gana las elleiciones, dar dellos pasos p'atrás p'averanos al franquismu, ya finalmente, llevar a la Nación Asturiana al débalu, siempre contracorriente, ya fundila na probitú ya la ignorancia provinciana.

Labels:


 

El P$O€ piecha TeleAsturias cumo midida pa fomentar la Llibertá d'Espresión


La dictadura Arecil tranca TeleAsturias (¿l'autonómica?) porque ente outras cousas:
-Facía crítica (social, económica, ecolóxica, ciudadana, política...)
-Nun taba venceya nin a la F$A nin al SOMA(dre)

Ya eso, nesta tierra de mohicanos llamada Asturias ía... ía duru ya chocante polo menos. Entós ya pa poder competir la RTPA ya algamar della audiencia (que veréis cumo nin por esas) pecharon la emisión d'una cadena que tenía mui bonos programas, independiente ya prestosa, porque non. Pero claro, cumo fala llibremente, entós resulta qu'airea munchas verdades, ya los caciques de la Vieya ya Verde Asturias mosqueáronse.

Agora por fin la RTPA vei ser la única Tv llariega. Un pasu p'atrás. Eso sí, ensin alderiques dalos. Ensín faltar al gobiernu d'Areces, oh gran home, prócer de la cultura del Enchufe. L'apuesta de la F$A pola cultura, la llibertá ya'l socialismu.

Agora hai que trancar Radio Sele. Nun veimos parar fasta que piechen. Cumo si hai que llamar a esos payasos de la polícia autonómica. Ou al exércitu. Volvemos cumo nel 1934 a meter la Llexón Española a Asturias, contra'l pueblu. De xuru que xente cumo Gustavo Bueno, Graciet, Javier Neira, Gracia Noriega... aplaudían esta idega.

Pueis TeleAsturias yara un bon modelu pa ver cumo se pue facer una canal de Televisión austeiru, de calidá ya au caban toos, ensín gastar munchos cuartos. P'acó eso nun nos val, que nós cuartos a mansalva. Ya ensinon, rifamos una xata.

Cumo l'Arecismu siga lluchando asina contra la llibertá d'opinión, espresión, comunicación, vein trancame'l Blog!!!

Labels:


This page is powered by Blogger. Isn't yours?