24/02/2007

 

Bono, yá sabiamos con quien xugabamos...



LA DEREICHONA FALA DE CUARTOS... PERO DE PATRIMONIU PÚBLICU


Meca, cumo ta'l patiu. Teníanlo a güevu. Un PP qu'apostara pa estas elleiciones na oficialidá de la llingua asturiana diba a ganar de xuru, xuráu. Pero qu'apostara con compromisu.

Pero non. Ovidio (¿De Vicente "Tini", de Ovidio "Vidi"... nun sei, asomeyanseme tanto...?), Vidi diz que non, que l'asturianu nun ía competitivu nun mundu globalidáu. Camiento que nun seya competitivu en terminos económicos.

Meca. Tampouco los vieyos son competitivos na nuesa economía. Al Estáu Español cuesta-y muncho pagar pensiones, melecinas, seguridá social... ¿Ya los paraos? Una lacra social. ¿Ya los enfermos ya minusválidos?

Si aforraramos nesos gastos numái, España tendría seique un PIB muncho mayor, ya sedríamos una potencia cumo Alemaña ou Xapón quiciabes. Ya si entramos en Portugal polas armas ya facemos un llimpieza étnica, tendríamos el nuesu espacio vital, p'aniciar una España meyor, con bonos falantes de castellán.

Casique tou pensando que podíamos abrir campos de Concentración ya Esterminiu pa facer una nueva ya meyor España, más competitiva, ya afrontar meyor el fenómenu de la globalización. Ya de campos de concentración ya esterminiu sabe muncho la dereichona. Franco, Mussolini, Vichy, Cecil Rhodes, por nun falar de Hitler...

Bono, yá sabemos que Vidi apuesta por Asturias, anque lliteralmente cague pa las asturianu (por favor, perdonái esti vocabulariu, pero nun alcuentru outra palabra que diga tanto de xeitu tan nidio).

Por ello, Vidi apuesta pola sanidá privada, "ya quien nun tenga perras, que nun enferme", ya asina xebrar la sociedá inda más en dos capas: Pudientones ya Probetones. ¡Cuoñu! ¡Cumo Dious Manda, acuéi! En fin, you teo muncho miéu.




Pa outru día deixamos el tema la reforma l'estatutu que quier el P€P€

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 10:36 pm 2 comments

23/02/2007

 

LA HOURA DE LA VERDÁ

PRE-ELLEICIONES!!!


Arímanse las elleiciones al Parllamentu Asturiana, la Xunta Xeneral, áu tolos asturianos tamos representaos. Bono, esti añu parez que las cousas vein tar mui clarinas. Vein participar cuatru grandes partíos, ou cuatru grandes bloques, de magar outros partíos tamién concurran nas urnas. Los partíos sedrán:

-Dende la más rancia dereichona, heriedes del Franquismu, defensores de la Santa Unidá de la Nación Española Indestructible pola gracia de Dióus, ya del Llibre Mercáu pola gracia'l Euru, el P€P€ (Partíu Popular).

-Dende la Izquierda Virtual (dereicha tamién, digan lo que digan), heriedes del Franquismu cultural ya formal, defensores de la Santa Unidá de la Nación Española Indestructible pola gracia las Souvenciones, ya del SOMA ya la cultura l'enchufe, la F$A (P$O€).

-Outra vuelta dende la Dereicha (quien dixo qu'Asturias ía un país proletariu), un partíu bicéfalu, roblau baxo los auspicios de Cuadonga, polo menos tienen conciencia (espero) d'Asturias, la naciente UAS (Unión Asturianista). A ver lo que duran.

-D'Izquierda, la Izquierda Verde, Asturianista, Internacionalista, (lo que fai nun pintar nada dende fai cuantayá), cada día menos dogmáticos, menos puros, menos... ellos, IX-BA-Verdes (Izquierda ¿Xunida?- ¿Bloque? por Asturies- Los Verdes)




Por supuesto, hai outros partíos más: Andecha (ou lo que queda d'ellos), Humanistas... etc, pero estos son los cuatro grandes partíos (desgraciadamente unos mayores qu'outros).

Dos d'ellos creen nuna Nación Ejpañola (siempre puengo "Ejpaña" ensin querer, ía Essspaña), outros dos (ensín ser Nacionalistas, creen nel potencial de la nación asturiana, dientro d'una España plural, áu Asturias tome, finalmente, las decisiones de sou.

Respective al mediuambiente, el PP nun pienso que mire muncho por él. P$O€ yá se sabe, esfarrapar verde= progresu económicu. UAS nun sei lo que pueda aportar a la Ecoloxía. You confío que d'estos partíos, el que más faiga nesi sen seya IX-BA-Verdes.

You numái dicir que quedéi abondu fartucu del P$O€, de las tesis reaccionarias de Lastra, de la chulería de Javier Fernández, de las tonturas de Migoya (demuestra que n'Asturias cualisquier pue ser conseyeiru de Cultura), de la hipocresía del Fartón (cumo se paez esa palabra a "Faraón"), del socialismu asturianu en xeneral.

¿Ya'l P€P€? Esos p'Asturias nun vien mirar. Numái pa los sous negocios. Eso ta cantáu.

Colo que you nun sei quien lo faidrá meyor ou quien non. De xuru ganen P$O€ ou PP. El casu ía qu'IX-BA-Verdes garren más fuercia na Xunta Xeneral, ou qu'UAS meta un pía. Con eso... andaríamos un bon treichu

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 6:05 pm 4 comments

18/02/2007

 

Xeopolítica pa burrinas I

CHEGA LA BALCANIZACIÓN D'ESPAÑA, TEMBLÁI MORTALES!!!!


You tou tol día camín del bañu. Nun faigo outra cousa. Cada vuelta que lo pienso, cágome vivu. Perdonái la espresión. Pero ía que tou too revueltu, ya axoráu. Ía una cousa superior a min ya al restu de los mortales d'esti estáu tan prestosu ya chanante llamáu Reinu (porque somos Reinu) d'Ejpaña, perdón, Esssspaña (sientolu pero sou Asturianu ya digo Essspaña).





Pero ía que los inteleutualoides asturianos tienen una idega afitada dientro la tiesta ya asustanos a nós: Con ZP, vei llegar la Balcanización del Reinu!!!

Asina ía, seguidores de FF (Francisco Franco) metiendo llercia al personal con cuentos cumo "España ruémpese", vei llegar la "Balcanización d'España" (que nun saben nin lo qu'ía, ya you tampouco). Pero yá vos digo neños, you ando colos pantalones embaxo tol día...

El casu ía qu'esieste una zuna tremenda ente esi seutor pro-DANAES (Defensores de la Nación Natural Una, Grande ya Llibre Ya Indivisible d'EJPAÑA, digo Essspaña!!!) d'asociar reivindicaciones civiles cumo'l dereichu de los gais ya las llesbianas a casase, ou la llaicidá na enseñanza, ou l'usu del asturianu a tolos niveles col desmembramientu del Reinu Español. Tienen miéu que la Monarquía Borbónica marche pa Grecia (nun creo, a la familia de la Reina echáronla colas armas) ou pa Francia (a la familia del Rei pasaronla pola guillotina).

Bono la cousa ía asina (polo que you pescancio d'eiquí ya d'eillí): La España Gris (Ejpaña), asocia a Ejpaña con Austria-Hungría, por filiación hestórica ya moral.

Austria-Hungría. Autria-Hungría, ou Imperiu Autro-Hungaru, fou un estáu européu, creao nel 1867, ya disueltu tras la Primera Guerra Mundial, nel 1919. Nel 1914 tenía una estensión de 676.000 ya una población de 51.390.000 almas).

Taba formáu por Austriacos (alemanes, católicos), Italianos, Checos, Eslovacos, Eslovenos, Polacos ya Croatas (todos ellos católicos tamién), Hungaros (católicos) ya Transilvanos (Rumanos, católicos ya Ortodoxos). Bosnia yara protectoráu, con población serbia ya musulmana, ya había tamién xudíos askenazís ya xitanos.

Cumo verán yara un estáu mui heteroxeniu. Taba descentralizáu, polo que solíase facer referencia a la "Monarquía Dual", la capitalidá dixebrabase ente Viena ya Budapest. Anque'l pesu del Imperiu cayía sou la exa Austriaca.




El Imperiu yara un bastión católicu, antimusulman (guerras col turcu), antirreformista, absolutista ya aliáu d'España, na Guerra de Sucesión (Los Austrias, Augsburgo, son orixinarios d'Austria).

Bono, durante'l sieglu XVIII, XIX ya entamos del XX, AH fou un actor destacáu na política Europea. Participóu en munchas guerras ya yara un estáu fuerte. Yara un estáu mui ricu económicamente, mui grande ya siempre defensor de los intereses católicos ya absolutistas primeiru, conservadores dempueis, siempre de dereichas, ya finalmente fou a la deriva baxo gobiernos autoritarios.

Sin embargo, na Monarquí Dual nun too yara gayola. Había munchos problemas dientro del Imperiu. Por exemplu, los eslavos (más probes que los alemanes) reivindicaban más autonomía, ya cuando asoleyóu la época del Romanticismu, munchos países eslavos touvienon movimientos nacionalistas, Paneslavistas. Esta xente quería romper l'Imperiu mentes los alemanes adiministraban pa gastallo en guerras contra Francia, Alemania, Italia...etc

¡Ui! que malos los eslavos!!! Porque yá se sabe, los bonos autriacos yaran bonos católicos cumo Dious Manda. Ya de derechas de tola vida!!! Finalmente, tras la Primera Guerra Mundial desfaise l'Imperiu (meyor dicho, lliberanse a los eslavos, pa que dempués de la segunda Guerra Mundial, xiraran al rodiu la URSS... pero eso ía outru cantar)

Anguaño, n'Asturias ya n'España, los Austriacos (nuesos austriacos) tienen miéu que los eslavos (nuestros eslavos) glayen por mor de pidir un pouco de xusticia... digamos constitucional. Pidir falar ya ser atendiu na llingua llariega (que feixeran los eslavos del Imperiu). Ya más autonomía (xestionar las cousas nuesas, ensin qu'un autriacu diga los que tenemos que facer). Ya, por últimu, ser toos miembros iguales del Imperiu, non ser unos ciudadanos de Primera ya outros de Segunda.

Asina que andai con cuidáu, proaustriacos... Que los proeslavos somos más, ya meyores, yá la hestoria cunta que, finalmente nel sieglu XXI, acabamos en plena Igualdá, ya de xuru qu'a la llarga. Yá sinon vean, señores, cumo nel Parllamentu Européu, vei haber más parlamentarios Eslavos qu'Austriacos ya Alemanes, ya las llinguas eslavas vein garrar puxu a la llarga, garrar más importancia que l'Alemán... Pero eso ía outra hestoria, ya cumo tala ha ser cuntada outra vuelta



http://www.lne.es/secciones/noticia.jsp?pNumEjemplar=1552&pIdSeccion=52&pIdNoticia=494024 Pa que vos riais


Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 8:12 pm 5 comments

10/02/2007

 

Pero eso de lo asturiano, ¿pa que sirve?


UN POUCO DE CULTURA


Si l'añu 2006 foi un bon añu pa la cultura llariega, paez que l'añu 2007 vei ser escelente (cumo las colleichas de vinu). El desaniciu de la cultura asturiana paez que vei siguir ermu outru llexislatura más, porque d'esta'l P$O€ nun fou quién.
Llan de Cubel, DRD, Tuenda, BG Candás, ente outros munchos vein asoleyar trabayu discográficu. En lliteratura tamién s'albidran dellos trabayos. La situación de la llingua na Radio paez que meyora, ya na Tele siempre peor polo menos nun dirá.

Diarios elleutrónicos, blogs, fotologs, páxinas web... too esto vei palantre.

Asturias ía en producció musical ya lliteraria bastante importante a nivel autonómicu, la nuesa producción nun se correspuende col númaru d'habitantes: Esa tasa ía mayor eiquí que la media nacional.
Esto ía una cousa chocante. Los "leaders" (puengo la palabra na V.O. polo de la úniversalidá) del antiasturianismu militante (¿¿Sigui esistiendo "Amigos de los bables"?? ¿¿Qué fou d'ellos??) yá cuanto más falan menos argumentos, menos xacíu, ya, finalmente, menos credibilidá tienen. Ya you hai cousas qu'echo de menos...



Antes salían diciendo cousas cumo "l'asturianu sedrá oficial cuando la gaita toque na sinfónica" (ou someyáu). Una gaita cola sinfónica ía una realidá. Ya se feixo ya con éxitu. Falo de gaita asturiana, pero tamién gallega, escocesa, irlandesa... ya dalgún día zamorana, Xeremia balear, sac de gemecs, boto... se nun se feixo yá.

Antias dicían que nun había lliteratura, l'asturianu nun valía pa escribir, nun valía pa nada más que pa rise, ya pal chigre. Anguañu salen dellas revistas (cada vegada más) llibros, suplementos, cartafueyos varios... ya de temática más variada.

Bono, you echo, cumo dicía, de menos los glayíos contra la normalización de la nuesa cultura del sector post-franquista asturianu. Home, nun ía que callaran dafeichu, siguen ehí esclucando, pero que nun ía lo miesmo...

Pero la realidá diznos que'l progresu cultural ía asimétricu. Mentes que na música la cousa ta enforma vivable (ya en determinaos llaos cumo'l tarrén gaiteiril pa que poner nada) noutras facenderas la cousa ta peor. La llingua ía'l casu, camiento you, con peor salú (dempués de too).

Pa min la llingua nun tien los sofitos institucionales que precisa, ya eso ía (pienso you) lo que más adolez al nuesu idioma. Del sector priváu (la xente la cai) hai sofitu asgaya, la xente fala asturianu. El problema ía que garra prestixu lentamente porque nun hai apoyos institucionales. Nun hai un Puyol ou un Garaikoetxea ou un Fraga que salgan ensin complexos falando asturianu, nin una TV asturiana que puenga tola programación integramente n'Asturianu, dende Xin Chán, a la final de la Copa d'Europa, a StarWars, a por qué non, una peli pornu. Lo cual diba tar muuui bien, haha.

Pero yá se sabe, la natura ía cousa sabia, nós nun cuntamos con too eso, pero un Areces falando en Castellanu (con esi corte xateirón -ya you sou d'un pueblu de Salas, asina que sei lo que digo cuando digo lo de xateirón, nun lo digo gratuítamente), un Alfredo Díaz (Mañana Usted Madruga), el sounormal de Goyo el de "chiscar", "Goyo Chiscar"... eso tamién aída en forma a que l'asturianu espoxigue. Ya you creo que eso ía una cousa que se ta viendo...

Asturias furrula cola Psicoloxía a la inversa. A ver se cuando nos quiten l'alcohol cumo vei ser la cousa. Ehí se que hai consensu. Naide del antiasturianismu militante gurgutóu inda... Que you m'enterara.

Lo que ta claro ía que la Marca Asturias (ou lo asturianu seique) presta, vende ya pruye, en definitiva.

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 8:16 pm 4 comments

03/02/2007

 

Eso non, eso sí que non

REPENTINA OLEADA DE NACIONALISMU N'ASTURIAS!!!!





Resulta que dende Madrid quieren quitanos el chume. A min que conste que nun m'afeuta porque dexei de beber. Pero bono.

La ministra de sanidá de ZP quier moderar el consumo d'alcohol, ya dende la pigarzosa Asturias saltan insurxente voces: ¡Col alcohol nun se xuega!

Creo qu'esti ía'l braeru feichu diferencial asturianu. Non l'idioma. La sidra ya'l vinu. Anque seya de Cangas. Ya tolos alcoholes en xeneral. Ya hai hasta consensu P$O€ ente'l P€P€. Nada une tanto cumo los cacharros.




Tien gracia la cousa, porque tolos inteleutualoides salen defendendo'l chume, cousa por outru lláu asturianisisísima. ¿Habrá cousa más asturiana qu'enfilase nun chigre colos amigos, ya echar un cantar cumo "El Miou Xuan" ou "Chalaneru"? Cuido que non.

Conque salen falando d'esto, ya lo más chocante ía que veigan contra Madrid. Que s'enfrenten a Madrid? Ía una cousa novedosa... Nun dicen nada pola RTPA, nun dicen nada pola llingua, nin pol cambéu climáticu, nin nun dicen nada por nada, pero hai amigu, cola priva...

A min préstabame una Asturias con una llei seca. Tou suchu. Venga. Ya los del SOMA traficando con culinos. Villa cumo Al Capone. Ya Lastra a lo Elliot Ness. Los malos falarían cumo nas Cuenques ya Lastra cumo los de Burgos ¡¡¡Que bona Asturias!!!

Mentes, el Conceyu Valdés proyeuta llenase de parques eólicos, cumo'l restu conceyos del Ese-Entrecabos, ya en xeneral del oucidente. Ya por outru lláu, Putin (el presidente de Rusia, non el de La Espina) vei entamar una nueva guerra fría con EEUU, por cuenta d'unas baterías antimisiles en Polonia ya Chequia. Pero cumo quiten l'alcohol n'Asturias vei haber fondonadas d'ostias pa los rusos, los americanos ya los españoles ya los que se puengan!!! Seutor Kitch dixit



P.s. ¿Áu ta agora Gustavo Bueno glayando que l'alcohol fomenta'l separatismu? ¡A ver ho, sal d'au teas!

Labels:


# ¡Las cousas qu'acontecen nesti mundu! "Poro, la realidá soupera la ficción" Diestru @ 11:02 am 3 comments

This page is powered by Blogger. Isn't yours?